ខេត្តព្រះសីហនុ៖ ក្នុងឱកាសអញ្ជើញសម្ពោធស្ពានបេតុង និងសំណេះសំណាល ជាមួយកម្មករ-និយោជិតសរុបជាង១ម៉ឺននាក់ នៅក្នុងខេត្តកោះកុង នាព្រឹកថ្ងៃទី០៨ ខែមករា ឆ្នាំ២០២៤នសម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសឲ្យដឹងថា នៅថ្ងៃទី២៥ ខែមករា ឆ្នាំ២០២៤ ខាងមុខនេះ សម្តេចនឹងអញ្ជើញប្រកាស កម្មវិធីជំរុញការវិនិយោគ នៅខេត្តព្រះសីហនុ ដើម្បីដោះស្រាយបញ្ហាជាប់គាំងមួយចំនួន។ សម្តេចធិបតី ហ៊ុន ម៉ាណែត បានលើកឡើងថា ឆ្នាំ២០២៤នេះ គឺជាឆ្នាំ ដែលត្រូវជំរុញការវិនិយោគ នៅខេត្ដព្រះសីហនុ ហើយនៅថ្ងៃទី២៥ ខែមករា ឆ្នាំ២០២៤ ខាងមុខនេះ នឹងប្រកាសដាក់កម្មវិធីពិសេស សម្រាប់បង្កើត និងជំរុញការវិនិយោគនៅខេត្ដនេះ។
ទាក់ទងបញ្ហានេះអ្នកឧកញ៉ា លឹម ហេងអនុប្រធានសភាពាណិជ្ជកម្មបានស្វាគមន៍ដោយវាយតម្លៃប្រាប់កាសែតថា ការប្រកាសពីកម្មវិធីជំរុញការវិនិយោគនៅខេត្តព្រះសីហនុ ដែលជាតំបន់ប៉ូលសេដ្ឋកិច្ចពហុបំណងនេះ គឺជារឿងមួយដ៏ល្អសម្រាប់ វិស័យឯកជន ដែលកំពុងជួបបញ្ហាប្រឈមមួយចំនួន ដូចជា ការជាប់គាំងគារមួយចំនួន និងបញ្ហាជាច្រើនទៀត ដែលថ្នាក់ដឹកនាំនៃរាជរដ្ឋាភិបាលកំពុងដោះស្រាយនោះ គឺជាក់ស្តែងការបង្កើតឲ្យមានកំពង់ផែទឹកជ្រៅ សម្រាប់ដឹកជញ្ជូនភស្តុភាកម្ម និងឡូជីស្ទីកនៅកម្ពុជា ឲ្យមានតម្លៃទាបដែលនេះជាបញ្ហាប្រឈមធំណាស់ ប៉ុន្តែបើដំណើរការនេះទៅមុខដោយរលូនវានឹងកាន់តែប្រសើរ ក្នុងការទាក់ទាញការវិនិយោគចូលមកខេត្តតំបន់ឆ្នេរនេះកាន់តែច្រើន។អ្នកឧកញ៉ា មានការជឿជាក់ថា ការយកចិត្តទុកដាក់របស់រាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នឹងជំរុញប៉ូលសេដ្ឋកិច្ចនេះ ឲ្យឈានរីកចម្រើនកាន់តែលឿន និងដោះស្រាយបញ្ហាលំបាក សេដ្ឋកិច្ចសម្រាប់ឆ្នាំ ២០២៤ និងផែនការទៅអនាគតផងដែរ។សម្រាប់អ្នកឧកញ៉ា លឹម ហេងបាន លើកឡើងផងដែរថា ចំណុចសំខាន់របស់យើងនៅពេលនេះមិនមែនតែផ្នែកឧស្សាហកម្ម កែច្នៃនាំចេញតែប៉ុណ្ណោះទេ សម្រាប់ខេត្តព្រះសីហនុ អ្វីដែលពិសេសថែមទៀតនោះ គឺខេត្តនេះជាតំបន់ទេសចរណ៍ដ៏មានសក្តានុពលរបស់ប្រទេសកម្ពុជា ដែលចាំបាច់ទាក់ទាញការវិនិយោគលើវិស័យនេះកាន់តែច្រើនដែលជាមាសបៃតងក្នុងការអភិវឌ្ឍន៍សេដ្ឋកិច្ច និងសង្គម។
សូមបញ្ជាក់ថាករណីយ៍ភាពជាប់គាំងសំណង់នៅខេត្តព្រះសីហនុនេះដែររដ្ឋបាលខេត្តព្រះសីហនុកំពុងធ្វើការជាមួយក្រសួងសេដ្ឋកិច្ចនិងហិរញ្ញវត្ថុ លៃលកធ្វើយ៉ាងណាឲ្យអគារចំនួន១១៥០ទីតាំងដំណើរការសាងសង់ឡើងវិញ ក្រោយសកម្មភាពសាងសង់ត្រូវបានផ្អឹបទុកចោលដោយសារកូវីដ១៩ និងការចាកចេញរបស់ក្រុមអ្នកវិនិយោគចិនបន្ទាប់ពីរដ្ឋាបាលបិទហ្គេមអនឡាញ។ នេះបើតាមលោកលោក ឡុង ឌីម៉ង អភិរងខេត្តព្រះសីហនុប្រាប់កាសែតកាលពីខែកក្កដាឆ្នាំ២០២៣។លោក ឡុង ឌីម៉ង មើលឃើញថា បញ្ហានេះត្រូវការជាចាំបាច់ការចូលរួមពីវិស័យឯកជនដើម្បីគៀងគររកអ្នកវិនិយោគថ្មីរួមផ្សំនឹងការលើកទឹកចិត្តយ៉ាងសំខាន់ពីរដ្ឋាភិបាល។
លោកបន្ថែមថា ភាពចាំបាច់មួយទៀតនោះអាចនឹងមានការដេញចេញជាយន្តការមួយច្បាស់លាក់នៅពេលខាងមុខដើម្បីប្រមូលធាតុចូលស្វែងដំណោះស្រាយព្រោះករណីអគារខ្លះវិវាទឡើងដល់តុលាការ។
នៅសំណុំរឿងអគារជាប់គាំងគ្មានអ្នកសាងសង់នេះដែរ កាលពីឆ្នាំទៅអភិបាលលោក គួច ចំរើន ធ្លាប់ប្រាប់ថា ក្រុមហ៊ុនអចលនទ្រព្យនៅក្នុងស្រុកចំនួន ៣ បានចុះកិច្ចព្រមព្រៀងសហការជាមួយក្រុមហ៊ុនអចលនទ្រព្យនៅប្រទេសសិង្ហបុរី ដើម្បីរួមគ្នាសម្របសម្រួលដោះស្រាយវិវាទផ្សេងៗ ដោយធ្វើយ៉ាងណា ដើម្បីឱ្យអគារដែលបានផ្អាកការសាងសង់នៅខេត្ដព្រះសីហនុ បានដំណើរការឡើងវិញ ដែលការចុះកិច្ចព្រមព្រៀងនេះ ធ្វើឡើងតាមរយៈកិច្ចសម្របសម្រួលពីក្រសួងសេដ្ឋកិច្ច និងហិរញ្ញវត្ថុ។ វិស័យសំណង់ក្នុងខេត្ដព្រះសីហនុ គិតចាប់តាំងពីឆ្នាំ ២០១៧ រហូតដល់ខែវិច្ឆិកា ឆ្នាំ ២០២១ មានសំណង់សរុប ១ ៦៦១ គម្រោង ជាមួយទុនវិនិយោគ មានប្រមាណជាង ៨ គួរដឹងដែរថាកន្លង មក បញ្ហាអគារជាប់គាំង នៅខេត្តព្រះសីហនុត្រូវបាន រដ្ឋាភិបាលបាលដាក់ចេញវិធានការជាកញ្ចប់ដើម្បីដោះស្រាយតាមគោលការណ៍២។ ទី១ អគារដែលសាងសង់មិនទាន់ចប់អាចសាងសង់បញ្ចប់ និងទី២ អគារដែលបានសាងសង់ចប់អាចមានសកម្មភាពវិនិយោគ ឬធុរកិច្ច។
សូមជម្រាបថា ខេត្តព្រះសីហនុ មានអគារ ៣៦៤កន្លែងផ្អាកការសាងសង់ អគារ ១៧៧កន្លែង សាងសង់រួច (មិនដំណើរការ) អគារ ៥៣កន្លែងកំពុងសាងសង់ និង៤៧៥កន្លែង សាងសង់រួច (ដំណើរការ)។ នេះបើយោងតាមរបាយការណ៍អំពីស្ថានភាពអគារខេត្តព្រះសីហនុ របស់មន្ទីរដែនដី និងនគរូបនីយកម្មកាលពីខែកញ្ញា ឆ្នាំ២០២៣។សូមរំព្ញកថានៅចន្លោះឆ្នាំ២០១៦-២០១៩ លំហូរវិនិយោគិនបរទេសក្នុងខេត្តព្រះសីហនុមានកំណើនសន្ធឹកសន្ធាប់ក្រោមវត្តមានសំណង់អគារធំស្កឹមស្កៃ ពិសេសផ្នែកសណ្ឋាគារ កាស៊ីណូ និងហ្គេមអនឡាញ។
អំឡុងនៃកំណើនការវិនិយោគយ៉ាងគំហុកកាលនោះ រដ្ឋបាលខេត្តព្រះសីហនុមិនបានដាក់លក្ខខណ្ឌសាងសង់ច្រើនទេ ព្រោះដើម្បីអាចទទួលបានផលប្រយោជន៍ទាំងផ្នែកសេដ្ឋកិច្ច និងការវិនិយោគពីបរទេស ខណៈច្បាប់ស្តីពីសំណង់នៅពេលនោះ ក៏មិនទាន់ត្រូវបានដាក់ឱ្យអនុវត្តពេញលេញនៅឡើយ។
មានអគារជាប់គាំងប្រមាណជាង១០០០កន្លែងក្នុងខេត្តព្រះសីហនុ បន្ទាប់ពីរដ្ឋាភិបាលប្រកាសបិទអាជីវកម្មហ្គេមអនឡាញកាលពីខែសីហា ឆ្នាំ២០១៩ និងការចាកចេញយ៉ាងគំហុករបស់អ្នកវិនិយោគចិន ចំពេលវិបត្តិនៃជំងឺកូវីដ១៩ថែមទៀត៕