សៀមរាប៖ ពេញមួយឆ្នាំ២០២៣ គ្រឹះស្ថានអង្គរ រកចំណូលបានពីការលក់សំបុត្រជូនអ្នកទេសចរបរទេសចូលទស្សនារមណីយដ្ឋានអង្គរ បានចំនួន៣៧ ១៩៨.៩៨៨ដុល្លារអាម៉េរិក ស្មើនឹងជាង២០០ភាគរយធៀបនឹងឆ្នាំ២០២២។យោងតាមរបាយការណ៍គ្រឹះស្ថានអង្គរ ដែលចេញផ្សាយនៅថ្ងៃទី១ មករា ឆ្នាំ២០២៤ បានបញ្ជាក់ថា ក្នុងឆ្នាំ២០២៣ មានទេសចរបរទេសសរុប ៧៩៨ .០៦៩នាក់ បានចូលទិញសំបុត្រទស្សនារមណីយដ្ឋានអង្គរ ដែលចំនួននេះ កើនឡើង១៧៧,៧៣ភាគរយធៀបនឹងឆ្នាំ២០២២។
របាយការណ៍របស់គ្រឹះស្ថានអង្គរ ក៏បានរាយការណ៍ពីការលក់សំបុត្រនៅប្រាសាទកោះកែរផងដែរ ដែលសរុបទាំង១២ខែ ឆ្នាំ២០២៣ បានចំនួន២២២. ០៩០ដុល្លារ លើអ្នកទេសចរបរទេស ១៤.៨០៦នាក់ និង រកចំណូលពីការលក់សំបុត្រទូកនៅតំបន់ចុងឃ្នៀស ភ្នំក្រោមបានចំនួន ៥៦៤.៦៧១ដុល្លារអាម៉េរិក។ជាមួយគ្នានេះ ថវិកាដែលបានមកពីការលក់សំបុត្រទស្សនេះ ក៏បានឧបត្ថម្ភចូលនិធិគន្ធបុប្ផារយៈពេល១២ខែ ឆ្នាំ២០២៣ សរុបមានចំនួន ១.៥៩៦ .១៣៨ដុល្លារអាម៉េរិកផងដែរ..។
ទាក់ទងចំនួនភ្ញៀវនេះដែរក្រសួងទេសចរណ៍ នាថ្ងៃទី២ ខែមករា ឆ្នាំ២០២៤នេះ បានផ្ដល់របាយការណ៍ស្ថិតិទេសចរណ៍រយៈពេល៣ថ្ងៃ នាឱកាសឆ្លងឆ្នាំសកល ចាប់ពីថ្ងៃទី៣០ ខែធ្នូ ឆ្នាំ២០២៣ ដល់ថ្ងៃទី១ ខែមករា ឆ្នាំ២០២៤ សរុបចំនួន ៣,២៨៥,៨៦៨នាក់។របាយការណ៍បានលម្អិតទៀតថា ក្នុងចំណោមភ្ញៀវទេសចរជាង៣លាននាក់នោះ រួមមាន៖ ភ្ញៀវទេសចរជាតិ ៣,២២៧,១៤៦នាក់ ភ្ញៀវទេសចរបរទេស ៥៨,៧២២នាក់។រាជធានី/ខេត្តដែលទទួលបានទេសចរច្រើនជាងគេទាំង៥ រួមមាន៖* រាជធានីភ្នំពេញ៖ ៦១០,៣៥៦នាក់។* ព្រះសីហនុ៖ ៤៧២,៦៩៧នាក់។* កំពត៖ ៤២៧,៤៩៥នាក់។* សៀមរាប៖ ៣៧៧,២១៩នាក់។* បាត់ដំបង៖ ៣៤៦,៣៣៣នាក់៕
