ភ្នំពេញ៖ នគរបាល នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានចេញ លិខិតកោះហៅ ឈ្មោះ កឹម ជាតិ ភេទប្រុស ជនជាតិខ្មែរ ទីលំនៅបច្ចុប្បន្ន ផ្ទះលេខ៣៩E0 ផ្លូវលេខ៤៤០. សង្កាត់ទួលទំពូងទី១ ខណ្ឌចំការមន រាជធានីភ្នំពេញដែលទើបត្រូវបានបណ្តេញចេញពីតួនាទីអនុរដ្ឋលេខាធិការក្រសួងមហាផ្ទៃឲ្យចូលមក នាយកដ្ឋាននគរបាលព្រហ្មទណ្ឌ អគ្គស្នងការដ្ឋាននគរបាលជាតិ នៅថ្ងៃទី ២៨ ខែធ្នូ ឆ្នាំ ២០២៣ វេលាម៉ោង៨និង៣០នាទី ដើម្បីមកបំភ្លឺបណ្ដឹងរបស់ក្រុមហ៊ុន ឈីវ ទីមិច គ្រុប។
នៅរសៀលថ្ងៃទី១៨ ខែធ្នូ ឆ្នាំ២០២៣ លោក ទូច សុខ: អ្នកនាំពាក្យក្រសួងមហាផ្ទៃ បានប្រាប់ កាសែត ថា, គឺជាលិខិតពិតប្រាកដហើយ មិនមែនក្លែងក្លាយទេ ដែលចេញដោយអង្គភាពនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ បានកោះហៅ លោក កឹម ជាតិ លើកទី១ ដើម្បីចូលខ្លួនមកបំភ្លឺចំពោះ បណ្ដឹងមួយដែលចោទប្រកាន់ ថាលោកយកស្រារបស់គេ និងថវិកាប្រមាណជា ១០ម៉ឺនដុល្លារនោះ។លោកបញ្ជាក់ទៀតថា, ដើមឡើយអគ្គាធិការដ្ឋាន នៃក្រសួងមហាផ្ទៃ ទទួលបទបញ្ជាពី លោកអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ឱ្យចាត់ចែងទទួល ស៊ើបអង្កេត ស្រាវជ្រាវ ទៅលើក្រុមទាំងឡាយ ដែលបានចុះប្រតិបត្តិការបង្ក្រាប ឬត្រួតពិនិត្យ នូវ ផលិតផលក្លែងក្លាយ ដែលរងបណ្ដឹង រងការរិះគន់ ជាពិសេសពីម្ចាស់អាជីវកម្ម អាជីវករ ផលិតផលនានា ហើយពាក់ព័ន្ធទៅនឹងសំណុំរឿង ប្ដឹងផ្ដល់លោក កឹម ជាតិ នេះ ! គឺអគ្គាធិការដ្ដាន ស្នើសុំគោលការណ៍ ពីលោកអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បញ្ជូនមកកាន់អគ្គស្នងការដ្ឋាននគរបាលជាតិ ជាសមត្ថកិច្ចវិញ អញ្ចឹងហើយបានជា ពេលនេះ អង្គភាពនាយកដ្ឋាននគរបាលព្រហ្មទណ្ឌក្រសួងមហាផ្ទៃ គឺចាត់ការ កោះហៅ លោក កឹម ជាតិ មកបំភ្លឺចំពោះបណ្ដឹងទាំងនេះ។
កាលពីថ្ងៃ,ទី១៦ ខែធ្នូ ឆ្នាំ២០២៣ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យ ត្រាស់បង្គាប់ បញ្ចប់មុខតំណែង លោក គឹម ជាតិ ពីអនុរដ្ឋលេខាធិការ ក្រសួងមហាផ្ទៃ ។សូមបញ្ជាក់ថាលោកកឹមជាតិធ្លាប់បានបញ្ជាក់ក្នុងលិខិតមួយច្បាប់ ចុះថ្ងៃទី ២៣ ខែវិច្ឆិកា ឆ្នាំ ២០២៣ ទៅកាន់លោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយថា ខ្លឹមសារនៃពាក្យបណ្តឹងរបស់ក្រុមហ៊ុន «គ្មានភស្តុតាង បំផ្លើសខុសពីការណ៍ពិត»។
មេធាវីការពារក្តីឱ្យក្រុមហ៊ុន ឈីវទីម៉ិច គ្រុប បានដាក់ពាក្យបណ្តឹងមួយទៅកាន់អគ្គាធិការដ្ឋានក្រសួងមហាផ្ទៃ កាលពីថ្ងៃទី ៦ ខែតុលា ឆ្នាំ ២០២៣ ដោយប្តឹងលោក ឧត្តមសេណីយ៍កឹម ជាតិ អនុប្រធានគណៈកម្មាធិការនៃគណៈកម្មាធិការប្រយុទ្ធប្រឆាំងនឹងផលិតផលក្លែងក្លាយ និងក្រុមការងាររបស់អង្គភាពនេះ ពាក់ព័ន្ធនឹងការយកស្រារបស់ក្រុមហ៊ុនចំនួន ៤៨ ដប និងជំរិតទារលុយចំនួន ១០ ម៉ឺនដុល្លារអាមេរិក ជាថ្នូរនឹងការមិនបិទផ្អាកដំណើរការអាជីវកម្ម កាលពីឆ្នាំ ២០២១។ មេធាវីក្រុមហ៊ុនលោក អ៊ូច សុភត្រា បន្ថែមថា ការណ៍ដែលក្រុមហ៊ុនឱ្យលុយទៅក្រុមការងាររបស់គណៈកម្មាធិការប្រយុទ្ធប្រឆាំងនឹងផលិតផលក្លែងក្លាយ ដែលបានចុះពិនិត្យឃ្លាំងក្រុមហ៊ុនកាលពីឆ្នាំ ២០២១ ដោយសារមន្ត្រីព្រមានបិទឃ្លាំងអាជីវកម្មរបស់ក្រុមហ៊ុន ដែលធ្វើឱ្យក្រុមហ៊ុនព្រួយបារម្ភអំពីដំណើរការអាជីវកម្ម ដែលបានចុះបញ្ជីត្រឹមត្រូវតាមច្បាប់។
យោងតាមពាក្យបណ្តឹងរបស់លោកមេធាវី អ៊ូច សុភត្រា ដែលប្តឹងទៅកាន់អគ្គាធិការក្រសួងមហាផ្ទៃបានរៀបរាប់ថា៖ «កាលពីថ្ងៃទី ៥ ខែវិច្ឆិកា ឆ្នាំ ២០២១ ក្រុមការងាររបស់អង្គភាពគណៈកម្មាធិការប្រយុទ្ធប្រឆាំងនឹងផលិតផលក្លែងក្លាយ ដែលដឹកនាំដោយលោក កឹម ជាតិ អនុរដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មាធិការនៃគណៈកម្មាធិការប្រយុទ្ធប្រឆាំងនឹងផលិតផលក្លែងក្លាយ បានចូលមកក្នុងទីតាំងឃ្លាំងស្រាស្របច្បាប់របស់ក្រុមហ៊ុនកូនក្តីខ្ញុំបាទ ដោយចោទប្រកាន់ថា ផលិតផលរបស់ក្រុមហ៊ុនកូនក្តីខ្ញុំបាទ មានដូចជាស្រាចម្រុះ និងប្រេងកូឡា ប្រេងខ្យល់ មិនស្របច្បាប់ ហើយតម្រូវឱ្យដកហូតស្រាមួយចំនួនទៅពិនិត្យ និងតម្រូវឱ្យបិទសៀលលើទ្វារឃ្លាំងមិនឱ្យក្រុមហ៊ុនកូនក្តីខ្ញុំបាទធ្វើអាជីវកម្មបាន និងទាមទារប្រាក់ចំនួន ១០០.០០០ ដុល្លារអាមេរិក ជាថ្នូរនឹងការបើកឱ្យដំណើរការអាជីវកម្មធម្មតាវិញ។ ដោយខ្លាចរាំងស្ទះដល់ដំណើរការអាជីវកម្មក្រុមហ៊ុន កូនក្តីខ្ញុំបាទក៏បានយល់ព្រមប្រគល់សាច់ប្រាក់សុទ្ធឱ្យក្រុមឯកឧត្តម កឹម ជាតិ តាមការទាមទារនៅល្ងាចថ្ងៃដដែល និងបង្គាប់ឱ្យតំណាងក្រុមហ៊ុនផ្តិតមេដៃព្រមទទួលលើកិច្ចសន្យាស្នើសុំកែប្រែកំហុស ដោយលិខិតនោះ ពុំមានចុះលេខចេញរបស់លេខាធិការដ្ឋានជាផ្លូវការឡើយ»។
មូលហេតុដែលក្រុមហ៊ុនទើបប្តឹងមកអគ្គាធិការដ្ឋាននៃក្រសួងមហាផ្ទៃ កាលពីដើមខែតុលា ឆ្នាំ ២០២៣ នេះ ដោយសារតែក្រុមហ៊ុនទើបតែឃើញក្រសួងមហាផ្ទៃផ្សព្វផ្សាយឱ្យអ្នកទទួលរងភាពអយុត្តិធម៌ ដោយគណៈកម្មាធិការនេះ មកដាក់ពាក្យប្តឹងនៅអគ្គាធិការដ្ឋាននៃក្រសួងមហាផ្ទៃ។ លោក អ៊ូច សុភត្រា ដែលជាមេធាវីការពារក្តីឱ្យក្រុមហ៊ុន ឈីវទីម៉ិច គ្រុប បានឱ្យដឹងទៀតថា រហូតមកដល់ពេលនេះ ក្រុមហ៊ុនមិនទាន់ទទួលបានស្រា និងលុយចំនួន ១០ ម៉ឺនដុល្លារអាមេរិកត្រឡប់មកវិញឡើយ។សូមបញ្ជាក់ថាក្រុមហ៊ុន ឈីវទីម៉ិច គ្រុប ត្រូវបានគ្រប់គ្រងដោយឧកញ៉ាម្នាក់ឈ្មោះ ដួង តិច ដែលគេដឹងថាជាកូនប្រុសលោកឧកញ៉ាឌួងឈីវដែលជាអ្នកគាំទ្រគណបក្សប្រជាជនយូអង្វែងមកហើយ។លោកដួងតិចក៏បានបង្កើតក្រុមហ៊ុនមួយទៀតឈ្មោះថា រ៉ូហ្វាខេម គ្រុប (Roffa Cam Group) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន ឈីវទីម៉ិច គ្រុប។ ក្រុមហ៊ុននេះបាននាំចូលផលិតផល ដូចជាស្រា ភេសជ្ជៈ និងផលិតផលវេជ្ជសាស្ត្រជាដើម។
គួរបញ្ជាក់ថា កាលពីថ្ងៃទី ១៥ ខែកញ្ញា ឆ្នាំ ២០២៣ ក្រសួងមហាផ្ទៃបានចេញសេចក្តីសម្រចមួយស្តីពីការផ្អាកសកម្មភាពស្រាវជ្រាវ ស៊ើបអង្កេត និងបង្ក្រាបផលិតផលក្លែងក្លាយ ស្ថិតនៅក្នុងសមត្ថកិច្ចក្រសួងមហាផ្ទៃ ដោយបានប្រគល់ភារកិច្ចជូនអគ្គាធិការដ្ឋានក្រសួងមហាផ្ទៃ ដើម្បីស៊ើបអង្កេតស្រាវជ្រាវតាមពាក្យបណ្តឹងរបស់ប្រជាពលរដ្ឋ ពាក់ព័ន្ធនឹងប្រតិបត្តិការរបស់មន្ត្រីនគរបាលជាតិ ក្នុងការប្រយុទ្ធប្រឆាំងផលិតផលក្លែងក្លាយ៕
