ខេត្តបាត់ដំបង៖ លោកឧត្តមសេនីយ៍ទោ ប៉ិ វ៉ាន់ ដែលជានាយកសាលានគរបាលជាតិភូមិភាគ៥ត្រូវបានកម្លាំងនគរបាលនាយកដ្ឋានព្រហ្មទណ្ឌ នៃក្រសួងមហាផ្ទៃ ចាប់ឃាត់ខ្លួនដីចម្ការរបស់គាត់មួយកន្លែងនៅស្រុកសំឡូតកាលពីថ្ងៃទី១៧ ខែធ្នូ ឆ្នាំ២០២៣តាមដីកាបង្គាប់ឲ្យចាប់ខ្លួនឃុំខ្លួនរបស់ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ភ្នំពេញ ពីបទរំលោភលើទំនុកចិត្ត ។
សមត្ថកិច្ច បានឱ្យដឹងថា លោក ប៉ិ វ៉ាន់ ហៅ គ្រូឡុង មានឋានន្តរស័ក្ដិឧត្តមសេនីយ៍ទោ និងមានតួនាទីជានាយកសាលានគរបាលជាតិភូមិភាគ៥ ដែលមានទីតាំងនៅចំណុចទូលម្កាក់ ស្ថិតក្នុងភូមិស្រះកែវ ឃុំកំពង់ព្រះ ស្រុកសង្កែ ។ លោកផ្កាយ២រូបនេះសំបូររឿងអាស្រូវណាស់ ជាពិសេស សំណុំរឿងដីធ្លី នៅស្រុកសំឡូត ត្រូវបានកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ ចុះស្រាវជ្រាវនិងឃាត់ខ្លួនតាមដីកាបង្គាប់ឱ្យចាប់ខ្លួនឃុំខ្លួនលេខ៧ ដកឧ/២៣ ចុះថ្ងៃទី២២ មិថុនា ឆ្នាំ២០២៣ ដោយប្រធានក្រុមប្រឹក្សាជំនុំជម្រះទី៧ នៃសាលាឧទ្ធរណ៍ភ្នំពេញ លោក សួស សំអាត។
ប្រភពព័ត៍មានពីសាលាឧទ្ធរណ៍រាជធានីភ្នំពេញ បានឱ្យដឹងនៅព្រឹកថ្ងៃទី១៨ ខែធ្នូ ឆ្នាំ២០២៣នេះថា៖ ជនជាប់ចោទឈ្មោះ ប៉ិ វ៉ាន់ ភេទប្រុស អាយុ៥៤ឆ្នាំ ជាមន្ត្រីនគរបាលត្រូវបានចាប់ខ្លួនពីបទ «រំលោភលើទំនុកចិត្ត» ដែលប្រព្រឹត្តនៅរាជធានីភ្នំពេញ កាលអំឡុងឆ្នាំ២០០៨ ដល់ឆ្នាំ២០១៥ បទល្មើសព្រហ្មទណ្ឌ ដែលមានចែងឱ្យផ្ដន្ទាទោសតាមបញ្ញត្តិមាត្រា៣៩១,៣៩២នៃក្រមព្រហ្មទណ្ឌ។បច្ចុប្បន្នជនជាប់ចោទឈ្មោះ ប៉ិ វ៉ាន់ ត្រូវបានសមត្ថកិច្ចជំនាញ នៃក្រសួងមហាផ្ទៃ បានបញ្ជូនខ្លួនទៅឃុំខ្លួនបណ្ដោះអាសន្ននៅពន្ធនាគារព្រៃសរ ក្រោយខ្លួនបញ្ជូនដល់សាលាឧទ្ធរណ៍រាជធានីភ្នំពេញ៕