កំពង់ឆ្នាំង ៖ តើសហគមន៍នេសាទភូមិស្ទឹងស្ងួតនិងមន្ត្រីជំនាញជលផលខេត្តកំពង់ឆ្នាំង និងសង្កាត់កំពង់ត្រឡាច មានទំនាក់ទំនងជាមួយគ្នាល្អឬយ៉ាងម៉េចបានជាបណ្ដែតបណ្ដោយឲ្យក្រុមជនខិលខូចដាក់របាំងកាត់ព្រែកស្ទឹងស្ងួតជាច្រើនសង្កាត់និងរបាំងតាមវាលំហរ ស្អេក ឆ្កាស់ គ្មានការបង្ក្រាបទាល់តែសោះចឹង?។ក្រសួងកសិកម្មរុក្ខាប្រមាញ់និងនេសាទ ដែលមានឯកឧត្តមឌឹត ទីណាជារដ្ឋមន្ត្រី ហាមដាច់ខាតមិនឲ្យមានដាក់របាំងកាត់ព្រែករបាំងវែងៗដែលមានរបាំងស្បៃមុង និងការដាក់សម្រាស់ព្រមទាំងការដាក់លបប្រឹសមួយរយនៅក្នុងទន្លេជាដាច់ខាតនោះ បើបងប្អូនណាដឹងដឹងសូមជួយឆ្លើយប្រាប់ផង។
ព្រោះបើតាមសេចក្ដីរាយការណ៍ពីប្រជាពលរដ្ឋនៅភូមិស្ទឹងស្ងួត ឃុំអំពិលទឹក ស្រុកកំពង់ត្រឡាញ់ ខេត្តកំពង់ឆ្នាំង បានឲ្យដឹងថា សព្វថ្ងៃនៅក្នុងព្រែកស្ទឹងស្ងួតបទល្មើសនេសាទដាក់របាំងកាត់ព្រែកនៅតែមានយ៉ាងច្រើនសន្ធឹកសន្ធាប់ មិនមានការទប់ស្កាត់ពីមន្ត្រីជំនាញនិងអាជ្ញាធរពាក់ព័ន្ធឡើយ មិនតែប៉ុណ្ណោះរបាំងវែងៗដូចជារបាំងស្បៃមុងដាក់នៅតាមវាលំហរនៅចំណុចរនាលចងក កន្លែងលាវ កន្លែងបី និងព្រែកអណ្ដើក ក្នុងមួយកន្លែងមួយកន្លែងមិនក្រោមពី 3 ខ្សែឡើងទៅនោះទេ ចំណែកនៅក្នុងព្រែកស្ទឹងស្ងួតការដាក់របាំងស្កាត់ព្រែកក៏មិនក្រោមប្រមាណដប់កន្លែងផងដែរ។ករណីនេះគេសង្កេតឃើញមន្ត្រីជំនាញចុះទៅបង្ក្រាបជាបន្តបន្ទាប់ផងដែរ ប៉ុន្តែជនខិលខូចហាក់មិនញញើតនិងមន្ត្រីជំនាញទាល់តែសោះ។
បើតាមការឲ្យដឹងពីលោកអ៊ឹម អឿនប្រធានសហគមន៍នេសាទភូមិស្ទឹងស្ងួតបានឲ្យអ្នកយកព័ត៌មានយើងដឹងថា នៅភូមិស្ទឹងស្ងួតគាត់ចង់សំណូមពរឱ្យរំលាយសហគមន៍ចោលទៅ ដោយសារតែមានមេខ្យល់រត់ការនៅពីក្រោយខ្នងហើយ ស្និទ្ធិនិងមន្ត្រីជំនាញសង្កាត់កំពង់ត្រឡាច ជាអ្នកទំនាក់ទំនងបានយ៉ាងល្អប្រសើរ ទើបពួកគេហ៊ានធ្វើសកម្មភាពដោយមិនខ្លាចញញើតសមត្ថកិច្ចទំនាញនិងអាជ្ញាធរពាក់ព័ន្ធនោះឡើយ។
លោកអ៊ឹម អឿនបន្តឲ្យដឹងផងដែរថា សព្វថ្ងៃមានអតីតអនុប្រធានសហគមន៍ចាស់ឈ្មោះជួន ផង់ ជាអ្នកនៅពីក្រោយខ្នងអ្នករកស៊ីដើម្បីសម្របសម្រួលជាមួយមន្ត្រីជំនាញក្នុងការ ប្រព្រឹត្តទៅបានហើយការធ្វើសកម្មភាពបង្ក្រាបកន្លងទៅហាក់បីដូចជាគ្មានប្រសិទ្ធភាព។
ចំណែកក្រុមអ្នកប្រព្រឹត្តគឺមានឈ្មោះដដែលៗហើយក៏ធ្លាប់មានបញ្ជីឈ្មោះដែលប៉ុស្តិ៍រដ្ឋបាលឃុំអំពិលទឹក ស្រង់ឈ្មោះបញ្ជូនទៅលោកស្នងការនគរបាលខេត្តកំពង់ឆ្នាំង តាមបញ្ជារបស់លោកស្នងការ ដើម្បីធ្វើសៅវត្តាជាតិរួចហើយផងដែរប៉ុន្តែនៅតែមិនឃើញជននោះខ្លាចរអាសោះឡើយ។លោកប្រធានសហគមន៍នេសាទភូមិស្ទឹងស្ងួតបានបន្តឲ្យដឹងទៀតថាការដែលជនខិលខូចធ្វើសកម្មភាពនេះបានមិនមែនជាផលប្រយោជន៍របស់ប្រជាពលរដ្ឋ ឬរបស់សហគមន៍នោះទេដូច្នេះស្នើឲ្យថ្នាក់លើជួយពិនិត្យនិងរកដំណោះស្រាយ ព្រោះប្រជាពលរដ្ឋមិនបានទទួលផលអ្វីទាំងអស់។