សៀមរាប៖ប្រភពព័ត៌មានពីប្រជាពលរដ្ឋបានឲ្យដឹងថា នៅព្រឹកថ្ងៃទី៨ខែធ្នូ ឆ្នាំ២០២៣កន្លងមកនេះ មានពលរដ្ឋអត់បានទទួលប័ណ្ណ ប្រាប់ថា អត់មាន ខ្សែ អត់ឈ្មោះចូលជួប សម្ដេចធិបតី នាយករដ្ឋមន្ត្រី ដូចគេទេ?។គេមិនដឹងថា ហេតុអ្វី អាជ្ញាធរមូលដ្ឋាននៃស្រុកបន្ទាយស្រី មិនព្រមចែកបណ្ណឲ្យប្រជាជនដែលមានក្បាលដីក្មុង តំបន់រុនតាឯកនោះទេ? ។ក្រៅពីរឿងមិនមានបណ្ឌចូលក៏មានពត៍មានថា មានអ្នកមិនរស់នៅក្នុងភូមិធម្មជាតិរុនតាឯក បានប័ណ្ណចូលរួមកម្មវិធីជាមួយថ្នាក់ដឹកនាំដែរ។ ចំណែកពលរដ្ឋដែលរស់នៅរាល់ថ្ងៃមួយចំនួនមិនបានប័ណ្ណចូលរួមនោះទេ។ សូមរំលឹកផងដែរថា កាលពីពេលថ្មីៗកន្លងទៅនេះអ្នកភូមិនៅតំបន់អង្គរត្រូវ បានតម្រូវឲ្យរុះរើផ្ទះមករស់នៅតំបន់រុនតាឯក ស្រុកបន្ទាយស្រី។
សូមបញ្ជាក់ថានៅក្នុងពិធីសំណេះសំណាលជាមួយប្រជាពលរដ្ឋរស់នៅភូមិធម្មជាតិរុនតាឯក និងតំបន់ពាក់ស្នែង សរុបជិត៣ពាន់នាក់ កាលពីថ្ងៃទី៨ ខែធ្នូ ឆ្នាំ២០២៣ នៅភូមិធម្មជាតិរុនតាឯក ស្រុកបន្ទាយស្រី ខេត្តសៀមរាប សម្ដេចធិបតីបានថ្លែងថា «ខ្ញុំមើលកន្លែងនេះមិនមែនជាស្រុកធម្មតាទេ ហើយសម្ដេចតេជោក៏បានដាក់ទិសដៅហើយថា ហេដ្ឋារចនាសម្ពន្ធកន្លែងនេះគួររៀបចំទៅជាទីក្រុង ដូច្នេះត្រូវរៀបចំបំពេញលក្ខខណ្ឌទៅជាក្រុងរុនតាឯក»។
សម្ដេច បានណែនាំដល់ក្រសួង ស្ថាប័នពាក់ព័ន្ធសហការរៀបចំហេដ្ឋារចនាសម្ពន្ធ និងប្រព័ន្ធរដ្ឋបាលឱ្យសម្រេចបានតាមទិសដៅនេះ ខណៈហេដ្ឋារចនាសម្ពន្ធសម្រេចបានជាច្រើនគួរឱ្យកត់សម្គាល់ហើយ។
សម្ដេចធិបតីបានបញ្ជាក់ថា នៅតំបន់អភិវឌ្ឍន៍រុនតាឯកនេះមានផ្លូវច្រើនហើយ គឺមានដល់ទៅជាង២០០ខ្សែ ឬជិត៣០០ខ្សែឯណោះ ក្នុងនោះមានផ្លូវបេតុង៥៥ខ្សែ។ ចំណែកទឹកស្អាត និងអគ្គិសនីក៏បានតភ្ជាប់ជាបណ្ដើរៗហើយ ទោះបីថាមិនទាន់គ្រប់១០០ភាគរយ ក៏ធ្វើបានច្រើនជាង៤០០ថ្ងៃឬ៥០០ថ្ងៃមុនដែរ។ ពេលវេលា៤០០ថ្ងៃ ធ្វើបានប៉ុណ្ណេះ ពិតជាមិនធម្មតាទេ គឺខិតខំប្រឹងប្រែងណាស់ ដើម្បីបានផ្ដល់ជូនប្រជាពលរដ្ឋ។
សម្ដេចធិបតី ហ៊ុន ម៉ាណែត បានថ្លែងប្រាប់ប្រជាពលរដ្ឋថា មិនយូរទេ ហេដ្ឋារចនាសម្ពន្ធនៅតំបន់អភិវឌ្ឍន៍រុនតាឯកនេះនឹងរីកចម្រើនទៅជាទីក្រុងមួយ។សម្ដេចធិបតីនាយករដ្ឋមន្ត្រី បានយកចិត្តទុកចំពោះតំបន់អភិវឌ្ឍន៍រុនតាឯកនេះតាំងពីដើមអាណត្តិមកម្ល៉េះ ដោយបានដាស់តឿនឱ្យលោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី តាមដានការងារអភិវឌ្ឍន៍នៅទីនេះឱ្យបានជាប់ ព្រោះមិនអាចព្រលែងដៃចោលបានទេ។ សម្ដេចធិបតីបានបញ្ជាក់ទៀតថា កិច្ចការទាំងឡាយនៅតែមិនបន្តអនុវត្តជូនប្រជាពលរដ្ឋទៅមុខទៀត មិនទុកប្រជាពលរដ្ឋចោលនៅតំបន់អភិវឌ្ឍន៍ទាំង២នេះឡើយ៕
