ភ្នំពេញ: នៅថ្ងៃទី៧ ខែធ្នូ ឆ្នាំ២០២៣ អគ្គនាយកដ្ឋានអន្តោប្រវេសន៍ បានសហការជាមួយអគ្គស្នងការដ្ឋាននគរបាលជាតិ ធ្វើការបណ្តេញជនជាតិវៀតណាមសរុប ២៥៨នាក់ ពាក់ព័ន្ធបទល្មើសឆបោកតាមប្រព័ន្ធអនឡាញ(Online Scam) ចេញពីកម្ពុជា តាមច្បាប់ស្តីពីអន្តោប្រវេសន៍ និងប្រកាសរបស់ក្រសួងមហាផ្ទៃ។
ជនជាតិវៀតណាមទាំង២៥៨នាក់ ត្រូវបានសមត្ថកិច្ចឃាត់ខ្លួនកាលពីថ្ងៃទី០១ ខែធ្នូ ឆ្នាំ២០២៣ នៅសង្កាត់ស្វាយជ្រុំ ក្រុងអរិយ្សត្រ ខេត្តកណ្តាល ពាក់ព័ន្ធបទល្មើសទី១ បទល្មើសឆបោកតាមប្រព័ន្ធអនឡាញ(Online Scam) ទី២ បទល្មើសធ្វើការងារខុសច្បាប់ដោយគ្មានប័ណ្ណការងារ ទី៣ ប្រើប្រាស់ទិដ្ឋាការខុសគោលបំណង (ប្រើទិដ្ឋាការទេសចរណ៍ មកធ្វើការងារ) និងទី៤ឆ្លងដែនខុសច្បាប់ ចូលមកប្រទេសម្ពុជា ។ការបណ្តេញជនជាតិវៀតណាមលើកនេះបានកើតឡើងបន្ទាប់ពីកម្ពុជាផ្ទុះការព្រួយបារម្ភថានឹងមានការផ្តល់សញ្ជាតិឲ្យអនិកជនវៀតណាមដែលរស់នៅកម្ពុជាប្រមាណ១០ម៉ឺននាក់ផងដែរ។
តែយ៉ាងណាក្រសួងមហាផ្ទៃតាមរយៈអ្នកនាំពាក្យបានបដិសេធដោយបញ្ជាក់ថា៖រដ្ឋាភិបាលគ្មានគម្រោងណាមួយចេញប័ណ្ណស្នាក់នៅអចិន្ត្រៃយ៍ដល់ពលរដ្ឋវៀតណាមរហូតដល់ជិត១០ម៉ឺននាក់នោះទេ។ តែយ៉ាងណាលោកទទួលស្គាល់ថា មានពលរដ្ឋវៀតណាមមួយចំនួនបានបន្តដាក់ពាក្យស្នើសុំប័ណ្ណស្នាក់នៅអចិន្ត្រៃយ៍មកក្រសួងមហាផ្ទៃដែរ។ ប៉ុន្តែក្រសួងមិនទាន់អាចចេញប័ណ្ណស្នាក់នៅបានដោយហេតុថា ពលរដ្ឋវៀតណាមទាំងនោះមិនទាន់បានបំពេញលក្ខខណ្ឌស្របតាមច្បាប់របស់ប្រទេសកម្ពុជា ពិសេសពាក់ព័ន្ធនឹងច្បាប់អន្តោប្រវេសន៍។
បើតាមអ្នកនាំពាក្យរូបនេះ កម្ពុជាមិនចេះតែចេញប័ណ្ណស្នាក់នៅ ឬផ្តល់សញ្ជាតិដល់ជនបរទេសណាមួយដោយមិនបានគិតពីផលប៉ះពាល់នោះទេ ពីព្រោះថា ទាំងការចេញបណ្ណស្នាក់នៅក្តី ឬផ្តល់សញ្ជាតិក្តី ជនបរទេសទាំងនោះត្រូវឆ្លងកាត់នីតិវិធីច្បាប់ច្រើនទម្រាំសម្រេចផ្តល់សិទ្ធិអ្វីមួយ។កាលពីថ្ងៃទី២២ ខែសីហា ឆ្នាំ២០២២ ក្រសួងមហាផ្ទៃបានប្រកាសថា ជនបរទេសដែលមានប័ណ្ណស្នាក់នៅអចិន្ត្រៃយ៍មានសិទ្ធិអាចទិញលក់ដី ផ្ទះ អាចប្រើប្រាស់សេវាសាធារណៈ សេវាសុខភាព និងសេវាធនាគារផង។ យោងតាមរបាយការណ៍របស់ក្រសួងមហាផ្ទៃ គិតមកត្រឹមឆ្នាំ២០២២ ពលរដ្ឋវៀតណាមជាង១០ម៉ឺននាក់ទទួលបានប័ណ្ណស្នាក់នៅស្របច្បាប់ ខណៈពលរដ្ឋជិត១០០នាក់បានចូលសញ្ជាតិខ្មែរពេញលេញ។
សមាគមខ្មែរ-វៀតណាមនៅកម្ពុជាបានឱ្យដឹងថា ពលរដ្ឋវៀតណាមដែលទទួលបានបណ្ណស្នាក់នៅអចិន្ត្រៃយ៍ជិត១០ម៉ឺននាក់ ពួកគេកំពុងបន្តរៀបចំបែបបទស្នើសុំចូលសញ្ជាតិខ្មែរជាបន្តបន្ទាប់ ត្បិតពលរដ្ឋវៀតណាមខ្លះនៅខ្វះខាតឯកសារមួយចំនួននិងបន្តបំពេញលក្ខខណ្ឌដែលតម្រូវពីក្រសួងមហាផ្ទៃ។យោងតាមរបាយការណ៍កាលពីឆ្នាំ២០២០របស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានបង្ហាញថា កម្ពុជាមានជនអន្តោប្រវេសន៍ត៍បរទេសស្របច្បាប់ជាង២០ម៉ឺននាក់ ខណៈជនអន្តោប្រវេសន៍តវៀតណាមមានចំនួនលើសពាក់កណ្តាល។
