ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានផ្តល់លិខិតអនុញ្ញាតសាងសង់ទូទាំងប្រទេសមានចំនួនជិត ៣ពាន់គម្រោង ដែលមានផ្ទៃក្រឡាកម្រាលសំណង់សរុបចំនួន ១២,៣៣លានម៉ែត្រការ៉ែ និងមានទុនវិនិយោគប្រមាណ ៥,១០ពាន់លានដុល្លារអាមេរិក។ក្នុងនោះមាន គម្រោងអគារខ្ពស់ៗ ចាប់ពី ៥ជាន់ ឡើងមានចំនួន ១៤៦គម្រោង ស្មើនឹង ១៥៤អគារ ប្រើលំនៅឋាន និងបណ្តុំលំនៅឋានមានលក្ខណៈជាប្រើមានចំនួន ៧៩គម្រោង សំណង់អគារពហុមុខងារមានចំនួន ១៨គម្រោងក្នុងរយៈពេល១០ ខែដើមឆ្នាំ ២០២៣នេះ។នេះបើតាមលោក ផារ៉ា មង្គល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ថ្លែងក្នុងពិធីបើកសន្និបាតបូកសរុបការងារប្រចាំឆ្នាំលើកទី១៣របស់សមាគមអ្នកសាងសង់កម្ពុជា និងពិធីសម្ពោធបើកការតាំងពិព័រណ៍ឧស្សាហកម្មសំណង់កម្ពុជា-អន្តរជាតិ ឆ្នាំ២០២៣ នៅថ្ងៃទី០៦ ខែធ្នូ ឆ្នាំ២០២៣។
លោក ផារ៉ា មង្គល បានឲ្យដឹងទៀតថា ការរៀបចំពិព័រណ៍ឧស្សាហកម្មសំណង់កម្ពុជា-អន្តរជាតិ របស់សមាគមអ្នកសាងសង់កម្ពុជាសម្រាប់ឆ្នាំ២០២៣នេះ ឃើញមានក្រុមហ៊ុនជាច្រើនបានចូលរួមដាក់តាំងបង្ហាញពីផលិតផល សម្ភារៈ បរិក្ខារ ឧបករណ៍ និងគ្រឿងចក្រសំណង់ទំនើបៗ ប្រមាណ ២.០០០ប្រភេទ ដែលខ្លះជាផលិតផលក្នុងស្រុក និងខ្លះជាផលិតផលនាំចូលពីបរទេស និងក៏មានការដាក់បង្ហាញអំពីបច្ចេកវិទ្យាថ្មីៗ ផ្នែកសេវាកម្ម និងកម្រោង អភិវឌ្ឍអចលនវត្ថុជាច្រើនទៀតផង។ទោះបីយ៉ាងណាលោករដ្ឋលេខាធិការក្រសួងដែនដីមិនបានពន្យល់ពីមូលហេតុដែលកម្ពុជាជួបវិបត្តិលក់ផ្ទះមិនដាច់នោះទេ?។ចំណែកគម្រោងវិនិយោកថ្មីមានការចាប់ផ្តើមសាងសង់ហើយឬក៏មិទាន់នោះទេ?៕
