រតនគិរី៖ ដីរដ្ឋរាប់រយហិកតាស្ថិតនៅទីតាំងផ្សេងគ្នាក្នុងស្រុកកូនមុំ ខេត្តរតនគិរីចំនួន២កន្លែង ត្រូវបានគេលួចកាប់ទន្ទ្រានយកដាំកូនកៅស៊ូយកធ្វើជាកម្មសិទ្ធិដោយមិនស្របច្បាប់។ ករណីនេះ លោក ខ័ណ្ឌ ចំណាន អភិបាលរងខេត្តរតនគិរី ទទួលបន្ទុកកិច្ចការដីធ្លី បាន ប្រាប់ នៅថ្ងៃទី៥ ខែធ្នូ ឆ្នាំ២០២៣ថា ក្នុងពេលឆាប់ៗខាងមុខនេះ លោកនឹងដឹកនាំក្រុមការងារចុះទៅពិនិត្យដល់ទីតាំងដីព្រៃ ដែលគេបានកាប់រានដោយបំពានច្បាប់នោះ ដើម្បីរកអ្នកដែលជាប់ពាក់ព័ន្ធឲ្យទទួលខុសត្រូវនៅចំពោះមុខច្បាប់?។មិនដឹងតើហេតុអ្វីករណីយ៍ចឹងអាជ្ញាមូលដ្ឋានឃុំស្រុកមិនរាយការណ៍ទៅខេត្ត?.
ដីរដ្ឋរាប់រយហិកតាដែលកាប់ព្រៃទន្រានយកទៅដាំកូនកៅស៊ូនោះ រួមមាន៖*ទី១៖ មានទីតាំងនៅចំណុចព្រៃកាទឹង*ទី២៖ នៅក្បែរភ្នំថ្មគ្រែ។ ដីទាំងពីរកន្លែងនោះស្ថិតនៅភូមិ៣ ឃុំត្រពាំងក្រហម ស្រុកកូនមុំ។
មន្ដ្រីនៅស្រុកកូនមុំម្នាក់ដែលសុំលាក់ឆ្មោះបានឲ្យដឹងថា ដីព្រៃរបស់រដ្ឋរាប់រយហិកតាដែលរងកាកាប់បំផ្លាញកន្លងមកនោះ បានក្លាយជាចម្ការកៅស៊ូ និងចន្ទីអស់ទៅហើយ គឺផ្ដើមចេញពីមនុស្សមួយចំនួនបាន ផ្ដល់លុយទៅឲ្យប្រជាពលរដ្ឋ ដែលមានជីវភាពខ្វះខាត កាប់ទន្ទ្រានព្រៃឈើ យកដីនោះជាលក្ខណ:គ្រួសារ។
មន្ត្រីរូបនោះបានពន្យល់ថា «គ្មានពលរដ្ឋណាប៉ះពាល់ដីព្រៃរបស់រដ្ឋបានទេ បើគ្មានមន្ត្រីខិលខូចគប់គិតគ្នានៅពីក្រោយ គឺគេបានតម្រូវឲ្យគ្រួសារនីមួយៗ ទទួលដីព្រៃចាប់ពី៥ទៅ១០ហិកតា ដែលអាចកាប់ឆ្ការសម្អាតព្រៃរួចរាល់ ហើយម្ចាស់លុយបានដើរតួជាអ្នកទិញដីនោះរួចផ្ទេរកម្មសិទ្ធិ តាមរយ:អាជ្ញាធរភូមិឃុំនៅមូលដ្ឋាននោះ រួចបំលែងទៅជាដីស្របច្បាប់របស់អ្នកទី តែម្ដង។ វិធីនេះត្រូវបានក្រុមអ្នកមានលុយមួយចំនួន កំពុងពេញនិយមប្រើ យកដីរដ្ឋនៅស្រុកកូនមុំ ទៅធ្វើជាកម្មសិទ្ធិជាបន្ដបន្ទាប់ ចំណែកអាជ្ញាធរពាក់ព័ន្ធបាននៅស្ងាត់ស្ងៀមធ្វើគរធ្វើថ្លង់ មើលអ្វីក៏មិនឃើញនោះទេ»។
លោក ពេជ្យ ហ៊រ ប្រធានក្រុមប្រឹក្សាឃុំត្រពាំងក្រហម កាលពីពេលថ្មីៗនេះ ប្រាប់ឲ្យដឹងថា កូនប្រុសរបស់លោកម្នាក់ឈ្មោះ ប៉ាវ បានទិញដីនៅចំណុចព្រៃកាទឹងនោះបានចំនួន១០ហិកតា និងបានដាំកូនកៅស៊ូរួចមួយចំនួន ហើយនៅលើដីនោះ។ ថ្ងៃក្រោយបើរដ្ឋត្រូវការដីនោះ លោកក៏ឲ្យកូនប្រគល់ដីនោះជូនទៅរដ្ឋវិញដោយឥតលក្ខខណ្ឌទេ។ដោយឡែកលោក សេក ហៃ អភិបាលស្រុកកូនមុំកន្លងទៅថ្មីៗ ក៏បានប្រាប់ថា ដីនោះនៅចំណុចណា លោកនឹងឲ្យនគរបាល និងអាវុធហត្ថស្រុកទៅស្រាវជ្រាវ។
លោក ថោ ប៊ុនថេត ប្រធានភូមិបាលស្រុកកូនមុំ បានប្រាប់ឲ្យដឹងដែរថា ដីរាប់រយហិកតាស្ថិតនៅទីតាំងដូចខាងលើនោះ បើទោះជាគេខំដាំដំណាំយុទ្ធសាស្ត្រ (ដំណាំកៅស៊ូ) នៅពេញលើដីនោះក៏មិនអាចទៅធ្វើប័ណ្ណសម្គាល់ កម្មសិទ្ធិបានទេ។បើតាមមន្ត្រីជំនាញ ដីនោះរដ្ឋមានសិទ្ធិដកហូតយកនៅពេលណាក៏បានដែរ ព្រោះមានចំណង៤ចំណុច រួមមាន៖*ទី១៖ ជាដីរដ្ឋបាលឃុំស្រុកនិងខេត្ដ។*ទី២៖ ជាដីច្រករបៀងរបស់ក្រសួងបរិស្ថាន។*ទី៣៖ ជាដីអចិន្ត្រៃយ៍របស់រដ្ឋ.។*ទី៤៖ ជាគម្របព្រៃឈើឆ្នាំ២០០២ផងដែរ៕