ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រាប់ទៅ នាយឧត្តមសេនីយ៍ ហឺ វ័យទុង (He Weidong) អនុប្រធាន(ទីពីរ) នៃគណៈកម្មាធិការយោធាមជ្ឈឹមបក្ស នៃសាធារណរដ្ឋប្រជាមានិតចិន ថា រាជរដ្ឋាភិបាល នីតិកាលទី៧ នៅតែបន្តរក្សាការពង្រឹង និងពង្រីកទំនាក់ទំនងកិច្ចសហប្រតិបត្តិការល្អ នៃប្រទេសទាំងពីរ។សម្តេចមហាបវរធិបតីបានទទួលជួប ជាមួយនាយឧត្តមសេនីយ៍ ហឺ វ័យទុង ដធ្វើឡើងនៅវិមានសន្តិភាព នៅព្រឹកថ្ងៃចន្ទ ទី៤ ខែធ្នូ ឆ្នាំ២០២៣។
តាមសេចក្តីប្រកាសព័ត៌មានពីកិច្ចប្រជុំបាន បញ្ជាក់យ៉ាងដូច្នេះថា «សម្តេចធិបតី ហ៊ុន ម៉ាណែត បានបញ្ជាក់ថា ឆ្នាំនេះគឺជាខួបលើកទី៦៥ នៃទំនាក់ទំនងការទូតកម្ពុជា-ចិន ដែលចំណងការទូតនេះ បានចាប់ផ្តើមតាំងពីឆ្នាំ១៩៥៨ ក្នុងសម័យកាលថ្នាក់ដឹកនាំជំនាន់មុន គឺព្រះនរោត្តម សីហមុនី ព្រះបរមរតនកោដ្ឋ និងឯកឧត្តម ម៉ៅ សេទុង និងឯកឧត្តម ជូ អេនឡាយ ហើយទំនាក់ទំនងនេះ ត្រូវបានពង្រឹង និងពង្រីកជាបន្តបន្ទាប់ ដោយសម្តេចតេជោ និងឯកឧត្តម ស៉ី ជិនពីង ហើយរាជរដ្ឋាភិបាល នីតិកាលទី៧ នៅតែបន្តរក្សាការពង្រឹង និងពង្រីកទំនាក់ទំនងកិច្ចសហប្រតិបត្តិការល្អ នៃប្រទេសទាំងពីរ»។ នាយឧត្តមសេនីយ៍ ចិនថា ក្រោមការដឹកនាំរបស់ សម្តេចធិបតី ក្នុងអាណត្តិទី៧ ទំនាក់ទំនងជាប្រពៃណីរវាងប្រទេសទាំងពីរ កាន់តែរឹងមាំ និងសម្រេចបាននូវលទ្ធផលជាផ្លែផ្កា នៃការជំរុញការកសាង សហគមន៍ជោគវាសនារួមកម្ពុជា-ចិន ផងដែរ។
ព្រឹកថ្ងៃទី៤ធ្នូនេះដែរប្រតិភូក្រសួងមហាផ្ទៃដឹកនាំដោយ រដ្ឋលេខាធិការក្រសួងមហាផ្ទៃ លោក សុខ ផល បាន ជួបប្រជុំជាមួយ គណៈប្រតិភូជាន់ខ្ពស់ចិន ដឹកនាំដោយ លោក YANG CHUNLEI អគ្គលេខាធិការរងនៃគណៈកម្មាធិការនយោបាយច្បាប់ មជ្ឈឹមបក្សកុំម្មុយនីស្តចិន នៅទីស្តីការក្រសួងមហាផ្ទៃ ។កិច្ចប្រជុំ បានផ្តោតលើការពង្រឹងកិច្ចសហប្រតិបត្តិការអនុវត្តច្បាប់ លើការប្រយុទ្ធប្រឆាំងល្បែងស៊ីសងតាមអនឡាញ(online) និងការឆបោកតាមប្រព័ន្ធអ៊ីនធឺណិត។ភាគីសមត្ថកិច្ចកម្ពុជា ជាពិសេសក្រសួងមហាផ្ទៃ បានបញ្ជាក់ជំហរយ៉ាងម៉ឺងមាត់លើការអនុវត្តច្បាប់តាមការសម្រេចរបស់រាជរដ្ឋាភិបាល ដែលមានសម្តេចមហាបវរធិបតី ជានាយករដ្ឋមន្ត្រីកម្ពុជា និងលោក ស សុខា ជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសហការជាមួយសមត្ថកិច្ចចិន និងបណ្តាប្រទេសពាក់ព័ន្ធស៊ើបអង្កេត និងបង្ក្រាបឃាត់ខ្លួនជនសង្ស័យពាក់ព័ន្ធជាច្រើនពាន់នាក់ បញ្ជូនទៅផ្តន្ទាទោសតាមច្បាប់នាពេលកន្លងមក និងកំពុងធ្វើជាបន្តបន្ទាប់។
សូមបញ្ជាក់ថា កាលថ្ងៃទី១៤ ខែកញ្ញា ឆ្នាំ២០២២ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃអាណត្តិទី៦ បានចេញលិខិតបង្គាប់ការចាត់តាំង លោក សុខ ផល រដ្ឋលេខាធិការក្រសួងមហាផ្ទៃ ដឹកនាំក្រុមការងារ ដើម្បីសហការ បង្ក្រាបល្បែងស៊ីសង ខុសច្បាប់គ្រប់ប្រភេទ ទូទាំងប្រទេស។ កាលនោះជាលទ្ធផលសមត្ថកិច្ចនៅទូទាំង២៥រាជធានី-ខេត្ត បានចុះបង្ក្រាបទីតាំងល្បែងស៊ីសងខុសច្បាប់គ្រប់ប្រភេទ បានប្រមាណជាង ៩ពាន់ទីតាំង និងឃាត់ខ្លួនមនុស្សចំនួន ១៣.០៣២នាក់(ស្រីចំនួន ៥.៥៨៩នាក់) ក្នុងនោះមានមួយចំនួនធ្វើការអប់រំ និងធ្វើកិច្ចសន្យា និងមួយចំនួនទៀត ក៏បានចាត់វិធានការច្បាប់ បញ្ជូនទៅតុលាការ គិតត្រឹមរយៈពេល ១៧ថ្ងៃ ពោលគឺ ចាប់ពីថ្ងៃទី១៥ ខែកញ្ញា ដល់ថ្ងៃទី១ ខែតុលា ឆ្នាំ២០២២។ក្រសួងមហាផ្ទៃមិនបានបង្ហាញថាមានចិនប៉ុន្មាននាក់ត្រូវបានចាប់ខ្លួននោះឡើយកាលនោះ។
លោក សុខ ផល ប្រធានក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទ បានឱ្យដឹងថា ជនសង្ស័យចំនួន ១២.៧៨៦នាក់(ស្រី ៥.៤៩៤នាក់) បានធ្វើការអប់រំ និងធ្វើកិច្ចសន្យា និងបានបញ្ជូនទៅតុលាការចំនួន ២៤៦នាក់(ស្រី ៩៥នាក់)។ការបង្ក្រាបនេះបានធ្វើឡើងក្រោយពីរកឃើញថាបទបញ្ជាបិទល្បែងស៊ីសងដែលជាសំណូមពររបស់ភាគីចិនដូចជាមិនបានលទ្ធផលអ្វីឡើយពិសេសនៅក្រុងព្រះសីហនុ។