កម្ពុជា៖តាមរយៈសំណេរខ្លីមួយបង្ហោះនៅលើបណ្តាញសង្គមអមនឹងរូបភាពម្តាយលោក កង សារ៉ន អតីតនិស្សិតផ្នែកបណ្ឌឹសភាយោធាអាមេរិកលោក ម៉ូន ពេជ្រអះអាងថា ការជួយរបស់លោកនាពេលនេះ មិនមែនបង្ហាញពីការគាំទ្រ ឬប្រឆាំងទៅនឹងសកម្មភាពណាមួយឡើយ។ ក៏ប៉ុន្តែ ការផ្តល់ថវិកាប្រចាំខែបន្តិចបន្តួចទៅកាន់ស្ត្រីវ័យ១០២ឆ្នាំដែលត្រូវជាម្តាយរបស់លោក កង សារ៉ន គឺលោកខ្លួនឯងផ្ទាល់ ចង់ឃើញស្ត្រីវ័យចំណាស់រូបនេះទទួលបានការមើលថែ និងមានអាហារហូបចុកគ្រប់គ្រាន់។
លោក ម៉ូន ពេជ្រ អះអាងតាមហ្វេសប៊ុកថា លោកក៏នឹងទូរស័ព្ទសួរសុខទុក្ខម្តាយរបស់លោក កង សារ៉នជាប្រចាំខែផងដែរ ដើម្បីតាមដានបញ្ហាសុខភាព និងជីវភាពរស់នៅបន្ត។ក្រៅពីលោកម៉ូនពេជ្រលោកយាយអាយុ១០២ឆ្នាំដែលកំពុងល្បីតាមបណ្តាញសង្គមដោយសារសម្លេងអំពាវនាវរបស់គាត់បន្ទាប់ពីសមត្តកិច្ចចាប់ខ្លួនកូនប្រុសក្រោមបទចោទថាញុះញង់ឡូវនិងប្រមាថព្រះមហាក្សត្រមានអ្នកចេញមុខម្នាក់ទៀតប្រកាសជួយឧបត្ថម្ភលោកយាយរហូតដល់ថ្ងៃស្លាប់ផងដែរ។លោកផនផល្លាអតីតអនុប្រធានគណបក្សយុវជនកម្ពុជាបានប្រកាសរឿងនេះតាមហ្វេសប៊ុក។
សូមបញ្ជាក់ថាកាលពីថ្ងៃទី២៥ វិច្ឆិកា សមត្ថកិច្ចបានចុះមកចាប់ខ្លួនលោក កង សារ៉នដែលជាកូនប្រុសលោកយាយអាយុ១០២ឆ្នាំដល់ផ្ទះដែលមានទីតាំងស្ថិតនៅភូមិបន្ទាយទី១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យតាមអំណាចសាលក្រមរបស់តុលាការខេត្តបន្ទាយមានជ័យកាលពីថ្ងៃទី២២ វិច្ឆិកា។ លោក កង សារ៉នត្រូវបានតុលាការសម្រេចឱ្យជាប់ពន្ធនាគារ៣ឆ្នាំ ពីបទជេរប្រមាថ ញុះញង់ និងប្រមាថព្រះមហាក្សត្រ។លោក កង សារ៉ន ត្រូវបានគេស្គាល់ថាជាបុគ្គលមួយរូបដែលតែងរិះគន់មិនសំចៃមាត់មកលើរដ្ឋាភិបាលកម្ពុជា ពិសេសរិះគន់ទៅលើរឿងពលរដ្ឋវៀតណាមកំពុងរស់នៅក្នុងប្រទេសកម្ពុជា បូករួមនឹងការស្រែកសួរទៅកាន់ក្បួនឃោសនាបោះឆ្នោតរបស់គណបក្សប្រជាជនកម្ពុជាកាលពីខែកក្កដាថា បើជាប់ឆ្នោតហ៊ានដេញយួនចេញពីស្រុកខ្មែរទេ។គេមិនដឹងថាតើហេតុអីបានជាលោកកងសារ៉នបែជាត្រូវតុលាការចោទប្រកាន់រឿងញុះញង់និប្រមាថព្រះមហាក្សត្រទៅវីញ?៕
