កំពង់ធំ ៖ សកម្មភាពនេសាទលៀសដោយប្រើឧបករណ៍ឆក់កាវបាននិងកំពុងកើតមានយ៉ាងអានាធិបតេយ្យនៅចំណុច កោះតា បរ ស្នែងក្របី និងទន្លេរឆ្មា ក្នុងភូមិសាស្ត្រឃុំពាមបាង និងឃុំផាត់សណ្ដាយ ខេត្តកំពង់ធំ យកលក់ឈ្មួញល្បីៗឈរចាំប្រមូលទិញ ។
សេចក្តីរាយការណ៍ឲ្យដឹងថាមានការប្រមូលដឹក ជញ្ជូនលៀស តាមកាណូតធំៗមួយថ្ងៃៗរាប់សិបគ្រឿង ពីតំបន់បឹងទន្លេរសាបយកមកលក់ឲ្យឈ្មួញឈ្មោះគីម អ៊ីម អ្នកឈរចាំប្រមូលទិញនៅឃុំឆ្នុកទ្រូ ស្រុកបរិបូរណ៍ខេត្តកំពង់ឆ្នាំងច្រកដាក់ការ៉ុង រួចដឹកតាមឡានចេញទៅស្រុកយួន ។
ប្រភពព័ត៌មានពីកម្មករនេសាទឆក់កាវលៀសខុសច្បាប់ទាំងនោះបាននិយាយប្រាប់អ្នកសារព័ត៌មានថា លៀសទាំងនេះពួកគេបានកាវកើបយក ពីក្នុងភូមិសាស្ត្រទឹកដីខេត្តកំពង់ធំនិងទឹកដីខេត្តពោធិ៍សាត់ហើយបាននាំគ្នាដឹក យកមកលក់ឱ្យមេឈ្មួញឈ្មោះ គីម អ៊ីម នៅមាត់ទឹកកំពង់ឆ្នុកទ្រូ។
ពួកគាត់ឲ្យដឹងថា ក្នុងមួយថ្ងៃពួកគាត់ អាចកាវលៀស បានចំនួន២តោន ទៅ៣តោន ដើម្បីដឹកទៅលក់ឲ្យយាយអុីម នៅខាងឆ្នុកទ្រូ ស្រុកបរិបូរណ៍។ចំពោះសកម្មភាពនេសាទលៀស និងការដឹកជញ្ជូនលៀសចម្រុះក្នុងរូបភាពទ្រង់ទ្រាយធំបែបនេះ គេសង្កេតឃើញកើត មានតាំងពីរដូវបិទនេសាទរហូតដល់រដូវបើក ខួបប្រាំងវស្សាហើយគេប្រើឧបករណ៍កាវលៀសវែងៗឆក់បានទាំងតូច ទាំងធំ ដែលអាចកាវចូលដល់ជម្រៅបាតទន្លេ ។ចំណែកម៉ាស៊ីនដែលគេប្រើសំរាប់អូស និងកាវលៀសវិញទូកខ្លះ ដាក់ម៉ាសុីន៤ទៅដល់៦គ្រឿង។
ពាក់ព័ន្ធនឹងករណីនេះ ប្រភពព័ត៌មានទុកចិត្តបានបង្ហើបឲ្យដឹងថា ឈ្មួញឈ្មោះគីម អ៊ីម ប្រមូលទិញលៀសដោយមិនញញឺតនេះ គឺដោយសារគាត់រៀបជាកញ្ចប់ឲ្យទៅឈ្មោះ ងិន វាសនា ជាអ្នករត់ការ ក្នុងមួយទូកត្រូវបង់៧០ម៉ឺនរៀល ដើម្បីឲ្យឈ្មោះងិន វាសនា រត់ការជាមួយមន្ត្រីជំនាញជលផល និងមន្ត្រីពាក់ព័ន្ធនៅខាងកំពង់ធំ? ។
កាលពីថ្ងៃទី១៨ វិច្ឆិកា ២០២៣ មានទូកកាវលៀស៧គ្រឿងដឹកយមមកលក់ឲ្យឈ្មួញឈ្មោះយាយ អ៊ីម បាននិយាយថា គាត់រកស៊ីប្រមូលទិញលៀសយូរហើយគ្មានទើសក្បាលអាណាទេ ?។ ឈ្មួញរូបនេះថែមទាំងបានជេរ កប់ៗមាត់ និងចោទមិនសំចៃមាត់ ថា មន្ត្រីជលផលខាងខេត្តកំពង់ធំស៊ីលុយគាត់រួចហើយ គឺគ្មានអាឆ្កែណាហ៊ានអឺតក្បាលមកហាមឃាត់គាត់ដែរ? ។
ទាក់ទងករណីនេះ មន្ត្រី បឹងទន្លេសាប បានប្រាប់ឲ្យដឹងថា ការនេសាទលៀសប្រើដោយកម្លាំងម៉ាស៊ីន គឺខុសច្បាប់ស្ដីពីជលផល មិនអនុញ្ញាតដាច់ខាត។ បច្ចុប្បន្នដែលមានការអនុញ្ញាតឱ្យពលរដ្ឋមួយចំនួន ដឹកជញ្ជូនលៀសយកទៅផ្គត់ផ្គង់ក្នុងទីផ្សារ ដោយសារតែយល់ឃើញថា ពួកគាត់មិនមានដីសម្រាប់ធ្វើស្រែ ហេតុនេះហើយទើបបានអនុ គ្រោះឲ្យពួកគាត់ខ្លះ តែសុំឲ្យពួកគាត់អនុវត្តទៅតាមការណែនាំរបស់មន្ត្រីជំនាញ ដោយមិនអនុញ្ញាតឲ្យពួកគាត់ដឹកលៀសឆាកាយកទៅលក់ឡើយ។បើដូចសម្តីមន្ត្រីជលផលមែនគឺសមត្តកិច្ចច្បាស់ជាប្រើល្បិចកន្ទេលធំបន្លំដែកក្បាលទំពែកបន្លំអេះហើយ?។
មន្ត្រីជំនាញរដ្ឋបាលជលផលម្នាក់បានប្រាប់ថា ករណីការនេសាទលៀស ខ្យង ខ្ចៅ គ្រុំ នៅបាតទន្លេគឺច្បាប់ស្ដីពីជលផលហាមដាច់ខាត ការនេសាទប្រើដោយកម្លាំងម៉ាស៊ីនធំៗដូចខាងលើនេះ ព្រោះវាបានធ្វើឲ្យមានផល ប៉ះពាល់យ៉ាងធ្ងន់ធ្ងរណាស់ ដល់ប្រព័ន្ធអេកូឡូស៉ី និងប្រព័ន្ធជីវៈចម្រុះនៅបាតទន្លេ ព្រោះថា៖ លៀស ខ្យង ខ្ចៅ និងគ្រុំ នៅបាតទន្លេយូរៗទៅវានិងរលួយ ហើយក្លាយជាចំណីរពពួកត្រីធំៗជាច្រើនប្រភេទ ដូចជាប្រភេទត្រី ប្រាខ្ចៅ ត្រីប្រម៉ា ត្រីដំរី ត្រីគល់រាំង ត្រីសណ្ដាយ ត្រីក្រពាត់ ត្រីគ្រុំ និងពពួកត្រីល្អៗជាច្រើនប្រ ភេទទៀត។បើ ចឹងម៉េចក៏មិនហាមឃាត់?៕
