ប្រជាពលរដ្ឋដែលរស់នៅក្នុងភូមិខ្សាច់ស ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង បានឲ្យដឹងថា កំណាត់ផ្លូវលំមួយខ្សែ មានប្រវែងប្រហែល២-៣គ.ម ចាប់ពីចំនុច ភូមិខ្សាច់ស រហូតមកដល់ផ្លូវបំបែកទៅសាលាឃុំក្រាំងល្វា ត្រូវបានរងនូវការខូចខាតស្ទើរតែទាំងស្រុង ដោយសារតែ ជារៀងរាល់់ថ្ងៃមានរថយន្តកង់១០ជាច្រើនគ្រឿងដឹកជញ្ជួនខ្សាច់ ចេញពីការដ្ឋានគ្មានឈ្មោះ ០២កន្លែង ដែលស្ថិតនៅក្នុងភូមិខ្សាច់ស ឃុំក្រាំងល្វា យកទៅលក់តាមដេប៉ូនានាទូទាំងខេត្ត។
ប្រភពបន្តទៀតថា ចំពោះទីតាំងការដ្ឋានបូមខ្សាច់ទាំង០២ខាងលើនេះ បានធ្វើសកម្មភាពជីកនិងបូមខ្សាច់លក់ ដោយពុំដឹងថាមានច្បាប់ រឺពុំមាននោះឡើយ។ ក្នុងមួយថ្ងៃៗ គេឃើញតែរថយន្តកង់១០ចេញចូលៗ ក្នុងការរដ្ឋាន មិនថារដូវប្រាំង រឺរដូវវស្សា ដែលជាហេតុធ្វើអោយផ្លូវលំមួយខ្សែនេះត្រូវខូចខាត ដោយមានគ្រលុក ដូចរន្ធបាយខុម ពិបាកក្នុងការធ្វើដំណើរទៅប្រកបរបរចិញ្ចឹមជីវិតប្រចាំថ្ងៃរបស់ប្រជាពលរដ្ឋ។
ប្រជាពលរដ្ឋក្នុងមូលដ្ឋានសំណូមពរដល់លោក ឈួន ចាន់ណា អភិបាលនៃគណ:អភិបាលស្រុកសាមគ្គីមានជ័យ និងឯកឧត្តម ស៊ុន សុវណ្ណរិទ្ធ អភិបាលនៃគណៈអភិបាលខេត្តកំពង់ឆ្នាំង មេត្តាមានវិធានការដោះស្រាយផ្លូវខាងលើនេះផងព្រោះថាពិបាកក្នុងការធ្វើដំណើរណាស់។
