ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចាត់ទុកអគារថ្មីនៃក្រសួងមហាផ្ទៃ ជាមរតកដ៏ថ្លៃថ្លារបស់រាជរដ្ឋាភិបាលនីតិកាលទី៦ ដែលផ្តួចផ្តើមសាងសង់ដោយសម្តេចក្រឡាហោម ស ខេង អតីតឧបនាយករដ្ឋមន្ត្រី-រដ្ឋមន្ត្រីក្រសួងមហាផ្ទៃ និងក្រោមការគាំទ្រពីសំណាក់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។
ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារថ្មីនៃទីស្តីការក្រសួងមហាផ្ទៃ នាព្រឹកថ្ងៃទី៦ ខែវិច្ឆិកា ឆ្នាំ២០២៣សម្ដេចធិបតីបានថ្លែងយ៉ាងដូច្នេះថា «ខណៈដែលយើងកំពុងសម្ពោធដាក់ឱ្យប្រើប្រាស់អគារទីស្ដីការក្រសួងមហាផ្ទៃនេះ យើងក៏មិនអាចបំភ្លេចបានផងដែរនូវសមិទ្ធផល ស្នាដៃ និងមរតកដ៏វិសេសវិសាលរបស់រាជរដ្ឋាភិបាលនីតិកាលទី៦ ក្រោមការផ្ដួចផ្ដើមរបស់សម្ដេចក្រឡាហោម ស ខេង អតីតឧបនាយករដ្ឋមន្ត្រី-រដ្ឋមន្ត្រីក្រសួងមហាផ្ទៃ និងដោយមានការគាំទ្រពេញទំហឹងពីសំណាក់សម្ដេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា»។
សម្ដេចធិបតីនាយករដ្ឋមន្ត្រីបានជំរុញណែនាំដល់ថ្នាក់ដឹកនាំ មន្ត្រីរាជការរបស់ក្រសួងមហាផ្ទៃគ្រប់ៗរូបគប្បីដឹងគុណ និងចងចាំជានិច្ចនូវគុណូបក្ការរបស់ថ្នាក់ដឹកនាំជំនាន់មុន ពិសេសសូមតបស្នងសងគុណដោយការតាំងចិត្តបម្រើប្រជាពលរដ្ឋឱ្យអស់ពីលទ្ធភាពប្រកបដោយប្រសិទ្ធភាព និងក្រមសីលធម៌វិជ្ជាជីវៈខ្ពស់។ក្នុងឱកាសនោះដែរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញអនុសាសន៍គន្លឹះចំនួន៥ចំណុច ជូនអភិបាលរាជធានី-ខេត្តពង្រឹងប្រសិទ្ធភាពអភិបាលកិច្ច ជានយោបាយវិមជ្ឈការ និងវិសហមជ្ឈការ។
អនុសាសន៍ទាំង៤នោះរួមមាន៖១៖ ត្រូវពង្រឹងខ្លួន រៀបចំកែសម្រួលយន្តការនានា គោលការណ៍ស្តង់ដារ ពង្រឹងភាពស្អាតស្អំ។២៖ ពង្រឹងការត្រួតពិនិត្យ ការតាមដាន និងគាំទ្រដល់មូលដ្ឋានលើ គម្រោងនៃការអនុវត្តឱ្យបានប្រសិទ្ធភាព។៣៖ ពង្រឹងយន្តការច្រកចេញចូលតែមួយឱ្យមានប្រសិទ្ធភាព។៤៖ ការគ្រប់គ្រងហិរញ្ញវត្ថុ និងប្រើប្រាស់ទ្រព្យសម្បត្តិឱ្យបានល្អ ហើយត្រូវម្ចាស់ការដោះស្រាយបញ្ហា ដោយក្តាប់ឱ្យជាប់បញ្ហា ដែលកើតមាននៅមូលដ្ឋានរបស់ខ្លួន។៥៖ ខិតខំអភិវឌ្ឍរាជធានី-ខេត្ត និងទាក់ទាញវិនិយោគ និងដៃគូ ដើម្បីបង្កើតភាពទាក់ទាញផ្សេងៗ។អគារថ្មីនៃទីស្តីការក្រសួងមហាផ្ទៃត្រូវបានបានបញ្ចុះបឋមសិលាបើកការដ្ឋានសាងសង់កាលពីឆ្នាំ២០២១ ដែលមានផ្ទៃដីសរុបទំហំ៥.៧ហិកតា ខណៈសំណង់អគារមានទំហំ១៥៣ម៉ែត្រគុណ៨៣ម៉ែត្រ និងមានកម្ពស់៩ជាន់៕
