ភ្នំពេញ៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាសហប្រធានយន្តការនៃអគ្គនាយករដ្ឋានពន្ធដារ-ផ្នែកឯកជន បានដឹកនាំសមាជិក-សមាជិកាសភាពាណិជ្ជកម្មកម្ពុជា ចូលរួមនៅក្នុងកិច្ចប្រជុំភាពជាដៃគូអគ្គនាយករដ្ឋានពន្ធដារ-ផ្នែកឯកជន ដើម្បីពិភាក្សា និងដោះស្រាយបញ្ហាប្រឈមនានាដែលវិស័យឯកជនទាំងអស់ បាន និងកំពុងតែប្រឈមពាក់ព័ន្ធទៅនិងពន្ធអាករផ្សេងៗ នៅថ្ងៃទី០២ វិច្ឆិកា ឆ្នាំ២០២៣ នាអគ្គនាយកដ្ឋានពន្ធដារ។
នៅក្នុងពិភាក្សា និងដោះស្រាយបញ្ហាប្រឈមនានាពាក់ព័ន្ធពន្ធដារនេះ គឺវិស័យឯកជនទាំងអស់បានលើកឡើងមានចំនួន ១៩ចំណុចសំខាន់ៗ សុំអគ្គនាយកដ្ឋានពន្ធដារជួយពន្យល់ និងបកស្រាយឲ្យបានច្បាស់លាស់ចៀសវាងមានការភាន់ច្រឡំលើការបង់ពន្ធអាករផ្សេងៗ ដែលពុំទាន់អាចដោះស្រាយបាននៅកម្រិតក្រុមការងារបច្ចេកទេសនៃយន្តការនេះ។
ចំនុចដែលមិនយល់មានចំនួន ១៩ចំណុច ទាមទារឲ្យអគ្គនាយកដ្ឋានពន្ធដារជួយពន្យល់ និងបកស្រាយ រួមមាន៖
១.សេចក្តីជូនដំណឹងស្តីពីការកែសម្រួលអាត្រាអាករ ពិសេសលើផលិតផលភេសជ្ជៈគ្មានជាតិសុរាដែលផលិតក្នុងស្រុក,
២.ការលើកលែងពន្ធអប្បបរមា,
៣.ម្ចាស់អាជីវកម្មថ្មីនឹងត្រូវទទួលខុសត្រូវនូវបំណុលពន្ធទាំងអស់ ក្នុងករណីមានការផ្ទេរអាជីវកម្ម ភាគហ៊ុន និងការរួមបញ្ចូលគ្នានៃសហគ្រាស,។
៤.មិនមានរយៈពេលកំណត់ច្បាស់លាស់សម្រាប់ឆ្លើយតបទៅនឹងការស្នើសុំលើកលែងពន្ធ ឬបន្ថយពន្ធក្រោមកិច្ចព្រមព្រៀងស្តីពីការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនិងពន្ធលើប្រាក់ចំណូល,
៥.សេចក្តីណែនាំស្តីពីនីតិវិធីនៃការស្នើសុំឥណទាន និងការស្នើសុំបង្វិលសងអាករលើតម្លៃបន្ថែម,
៦.ពន្ធលើអត្ថប្រយោជន៍បន្ថែមលើពន្ធលើប្រាក់បៀវត្ស និងពន្ធកាត់ទុកបង់ជួស,
៧.ការលក់ក្រៅព្រំដែនកម្ពុជា,
៨.ការទទួលស្គាល់ប្រាក់កក់របស់អតិថិជនជាប្រាក់ចំណូលជាប់ពន្ធ,
៩.ការផ្ទេរភាគហ៊ុន៖ការកំណត់ពន្ធឡើងវិញនៃពន្ធកាត់ទុកលើភាគលាភ។
ដោយឡែក ចំណុចទី ១០.សុំជាចំណាយកាត់កងបានក្នុងឆ្នាំចរន្តសម្រាប់ចំណាយការប្រាក់បង្គរទៅអោយបុគ្គលទាក់ទិនលើ ១៨០ថ្ងៃសម្រាប់គ្រឹះស្ថានធនាគារនិងហិរញ្ញវត្ថុ,
១១.ប្រតិបត្តិការពាណិជ្ជកម្មមួយចំនួន ដែលត្រូវលើកលែងអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក,
១២.សំណើសុំអនុគ្រោះ និងសម្របសម្រួលលើការអនុម័តចំពោះការស្នើសុំកិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនិងពន្ធលើប្រាក់ចំណូល,
១៣.ការលើកលែងពន្ធដារ,
១៤.សុំការលើកលែងពន្ធអាករលើតម្លៃបន្ថែម VAT ១០% ទៅលើការលក់ជ័រកៅស៊ូកែច្នៃរួចហើយ,
១៥.សំណើរសុំលើកលែង ឬព្យួរពន្ធរំដោះលើប្រាក់ចំណូល ១% សំរាប់រយៈពេលពីឆ្នាំ២០២៤ រហូតដល់ឆ្នាំ២០២៨ នៃរាជរដ្ឋាភិបាលអាណ្ណត្តិទី៧,។
១៦.ការកាប់ដើមកៅស៊ូដែលអស់ប្រសិទ្ធិភាពសេដ្ឋកិច្ច គឺដើមកៅស៊ូដែលធ្វើអាជីវកម្ម មិនមានប្រាក់ចំណេញ ដោយមិនអាចផ្តល់ផលចំណេញបានបន្តទៀត,
១៧.ថ្លៃដើមក្នុងការផលិតមានតម្លៃខ្ពស់ធៀបនឹងតម្លៃលក់ទាប និងការបង់ពន្ធនាំចេញសម្រាប់ផលិតផលកៅស៊ូ, ការកំណត់យកតម្លៃជ័រកៅស៊ូរបស់ប្រទេសម៉ាឡេស៊ី ជាតម្លៃកៅស៊ូអន្តរជាតិគោលនៃការគណនាកំណត់តម្លៃអាករនាំចេញរបស់ផលិតផលកៅស៊ូកម្ពុជា,
១៨.ការបង់ពន្ធជាកញ្ចប់
និង ១៩.ការមិនទទួលស្គាល់ព្រទ្យដោយមិនមានវិក្កយបត្រ ឬវិក្កយបត្រមិនមានលក្ខណៈសម្បត្តិគ្រប់គ្រាន់។
សូមបញ្ជាក់ថា សម្រាប់ពេល ៩ខែ ឆ្នាំ២០២៣លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានឲ្យដឹងថា៖ប្រមូលបានជាក់ស្ដែងតាមប្រព័ន្ធគ្រប់គ្រងទិន្នន័យចំណូលអនឡាញ មានចំនួនប្រមាណជា ២៨០៦,៣៧លានដុល្លារ ស្មើនឹង ៧៨,៥៧% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ ហើយគិតត្រឹមថ្ងៃទី៣០ ខែតុលា ឆ្នាំ២០២៣ នេះ គឺសម្រេចបានប្រមាណជា ៣០៦០,៩៥លានដុល្លារ ស្មើនឹង ៨៥,៧០% នៃផែនការប្រចាំឆ្នាំ ២០២៣។
នៅក្នុងកិច្ចប្រជុំបូកសរុបលទ្ធផលការងារប្រមូលចំណូលពន្ធប្រចាំខែកញ្ញា និងប្រចាំត្រីមាសទី៣ ឆ្នាំ២០២៣ ព្រមទាំងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ នៅថ្ងៃទី៣០ ខែតុលា ឆ្នាំ២០២៣ ក្រោមវត្តមាន របស់លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុលោក គង់ វិបុល បានបង្ហាញថា ក្នុងខែកញ្ញា ឆ្នាំ២០២៣ចំណូលពន្ធអាករគ្រប់ប្រភេទដែលអគ្គនាយកដ្ឋានពន្ធដារប្រមូលបានជាក់ស្តែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារមានចំនួនប្រមាណ ២៥៥,៧៧លានដុល្លារ ស្មើនឹង ៧,១៦% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។
ទោះបីយ៉ាងណាសម្រាប់ការប្រមូលលើអ្នកជាប់ពន្ធនេះដែរលោកជាចន្ទ័បរិបូរណ៍រដ្ឋលេខាធិការក្រសួងពត៍មានបានរិះគន់ថាអគ្គនាយកពន្ធដាគួតែផ្សព្វផ្សាយឲ្យប្រជាពលរដ្ឋបានដឹងថាអ្វីទីតាំងណាខ្លះជាប់ពន្ធកុំចាំតែអង្គុយយកពន្ធនិងផាកពិន័យ។ មន្ត្រីពន្ធដាត្រូវចុះពិនិត្យមើលនិងបិតប្រកាសឲ្យគេដឹងផង។