ខេត្តបន្ទាយមានជ័យ ៖ កាលពីវេលាម៉ោងជាង២ទាបភ្លឺ ត្រូវនិងថ្ងៃទី៤ ខែកញ្ញា ឆ្នាំ២០១៦ សមត្ថកិច្ចនគរបាល និងសន្តិសុខ៣នាក់ទៀត ត្រូវជនបរទេស១ក្រុម មានជនជាតិចិននិងវៀតណាម ដេញវាយរហូតដល់មុខបន្ទប់នៅក្នុងបរិវេណកាសីុណូផ្កាយ៥ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
តាមប្រភពព័ត៌មានបានឲ្យដឹងថា ជនរងគ្រោះទាំង៣នាក់ មានម្នាក់ជានគរបាល ឯ២នាក់ទៀតជាសន្តិសុខកាសុីណូផ្កាយ៥ ប៉ុន្តែមិនអាចប្រាប់ពីអត្តសញ្ញាណឡើយ ។ ចំណែកជនបង្កទាំងអស់មានគ្នាន៥នាក់ មានជនជាតិចិនប្រុសៗ៤នាក់ និងនារីស្រស់ស្អាតម្នាក់ទៀតជាជនជាតិវៀតណម ។
ក្រុមសន្តិសុខកាស៊ីណូផ្កាយ៥បានប្រាប់អ្នកយកព័ត៌មាន ឲ្យដឹងថា ករណីខាងលើនេះ ពិតជាកើតមានមែន ដោយដំបូងក្រុមបង្កខាងលើនេះស្រវឹងស្រា បានស្រែកឡួឡា ពេលនោះ សមត្ថកិច្ចនិងសន្តិសុខ បានទៅហាមឃាត់ ព្រោះខ្លាចរំខានដល់ភ្ញៀវដទៃទៀត ស្រាប់តែក្រុមជនទំនើងទាំង៥នាក់នោះ ដេញវាយនគរបាល និងសន្តិសុខតែម្តង ។
ក្រុមសន្តិសុខបានបន្តថា នគរបាលម្នាក់ត្រូវរបួសត្រង់ពោះ ឯសន្តិសុខ២នាក់ទៀតរបួសតិចតូចហើយរត់ចូលបន្ទប់ស្ទើរតែមិនទាន់ ព្រោះក្រុមជនបង្កទាំង៥នាក់ ដេញវាយរហូតដល់មុខបន្ទប់ ។ ដោយក្រុមជនបង្កមានដូចជា ដុំថ្ម ចង្ក្រានហ្គាសជាដើម ប៉ុន្តែពួកគេមិនដឹងថា បញ្ហាខាងលើនេះត្រូវបានដោះស្រាយយ៉ាងណាទេ ជាមួយជនរងគ្រោះ ស្រាប់តែក្រុមជនបង្កត្រឡប់ទៅផ្ទះវិញអស់ដោយរលូនតែម្តង ។
គួរបញ្ជាក់ទៀតថា មួយរយះចុងក្រោយនេះជនជាតិចិនសម្រុកមករស់នៅក្នុងក្រុងប៉ោយប៉ែត មីេលទៅហាក់ដូចជាមានចំនួនច្រើនឡើងៗហើយ មិនដឹងថា មកធ្វើការងាអ្វីនោះទេ ហើយនៅផ្ទះសំណាក់ និងភោជនីយដ្ឋានមួយចំនួន ត្រូវពួកជនជាតិជួលរស់នៅជាក្រុមៗយ៉ាងច្រើនទៀតផង ៕