ភ្នំពេញ៖ ឧកញ៉ា ហ៊ី គឹមហុង ម្ចាស់ក្រុមហ៊ុនពិភពដីមាស រួមទាំងគូកន៥នាក់ផ្សេងទៀតដែលត្រូវបានចាប់ឃុំខ្លួនកាលពីល្ងាចថ្ងៃទី៧ ខែសីហា ឆ្នាំ២០២៣ ពាក់ពន្ធ័និងការបើកប្រាសប្រជាពលរដ្ឋក្នុងទឹកប្រាក់ប្រមាណជាង១២លានដុល្លារងាមេរិកឡូវ ត្រូវបានដោះលែងអោយនៅក្រៅឃុំបណ្រោះអាសន្នចេញពីពន្ធនាគារប៉េហ្ស៊ីហើយ កាលពីព្រឹកថ្ងៃទី ០២ ខែវិច្ឆិកា ឆ្នាំ២០២៣ ។
ប្រភពព័ត៌មានពីពន្ធនាគារប៉េហ្ស៊ីភ្នំពេញ បានអោយដឹងថា ការដោះលែងលោក ឧកញ៉ា ហ៊ី គឹមហុង និងគូកនរបស់គាត់អោយនៅក្រៅឃុំនេះគឺយោងតាមសេចក្ដីសម្រេចរបស់សភាស៊ើបសួរសាលាឧទ្ធរណ៍កាលពីថ្ងៃទី០១ខែវិច្ឆិកា ឆ្នាំ២០២៣ ។ គេមិនដឹងថាតើលោកឧកញ៉ារូបនេះបានតំកល់ប្រាក់ធានាខ្លួននៅតុលាការប៉ុន្មាននោះទេទើបឈនដល់ការដោះលែងនៅក្រៅឃុំចឹងនោះ?។
លោក ហ៊ី គឹមហុង មានងារជាឧកញ៉ាផងម្ចាស់ក្រុមហ៊ុនពិភពដីមាស ត្រូវបានឃាត់ខ្លួននៅនឹងទីស្នាក់ការក្រុមហ៊ុនពិភពដីមាស នៅភូមិត្រពាំងថ្ងាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ កាលពីល្ងាចថ្ងៃទី៧ ខែសីហា ឆ្នាំ២០២៣ ក្រោយពីមានការប្រទូស្តរាយផ្ទុះអាវុធគំរាមគ្នារវាងសមត្ថកិច្ច និងកងអង្គរក្សរបស់អ្នករកស៊ីដីធ្លីនេះ ។
តុលាការបានចោទលោក ហ៊ី គឹមហុង ម្ចាស់ក្រុមហ៊ុនពិភពដីមាស ពីបទ រំលោភសេចក្តីទុកចិត្ត និងឆបោកពលរដ្ឋរាប់រយគ្រួសារ និងត្រូវឃុំខ្លួនបណ្ដោះអាសន្នចំនួន៦នាក់ ចំណែកមនុស្សប្រុស ស្រី ៨នាក់ផ្សេងទៀតត្រូវដោះលែងអោយមានសេរីភាពវិញ ។
កន្លងមកក្រុមហ៊ុនពិភពដីមាស ត្រូវបានប្រជាពលរដ្ឋរាប់រយគ្រួសារដាក់ពាក្យប្តឹងទៅកាន់ស្នងការដ្ឋាននគរបាលខេត្តកំពត ដើម្បីសំណូមពរឱ្យជួយពន្លឿនក្នុងការរកដំណោះស្រាយបញ្ចប់វិវាទជាមួយក្រុមហ៊ុនមួយនេះ។
ក្រុមប្រជាពលរដ្ឋបានបញ្ជាក់ថា មកដល់ពេលនេះក្រុមហ៊ុនគ្មានដំណោះស្រាយសមស្របណាមួយសម្រាប់ពួកគាត់នោះឡើយ ខណៈបុគ្គលិកធនាគារកាន់តែបង្ខំទារលុយដោយនាំគ្នាមកដល់ផ្ទះពួកគាត់ស្ទើររាល់ថ្ងៃ ដោយអ្នកខ្លះមិនហ៊ាននៅផ្ទះទេ ព្រោះបុគ្គលិកធនាគារខ្លះប្រើពាក្យសម្តីពិបាកស្តាប់ណាស់។ ក្រុមហ៊ុនពិភពដីមាស ខកខានផ្តល់លុយជាច្រើនខែមកហើយទៅឱ្យពលរដ្ឋតាមកិច្ចសន្យា។
យោងតាមរបាយការណ៍ពី ស្នងការដ្ឋាននគរបាលខេត្តកំពតថា បានទទួលពាក្យបណ្តឹងពីប្រជាពលរដ្ឋដែលពាក់ព័ន្ធនឹងក្រុមហ៊ុនពិភពដីមាសចំនួន ៦៧៨បណ្តឹង ក្នុងទំហំទឹកប្រាក់ប្រមាណ ១២.៦៤៧.៣៥០ដុល្លារ (ដប់ពីរលានប្រាំមួយរយសែសិបប្រាំពីរពាន់បីរយហាសិបដុល្លារអាមេរិក)៕
