ខេត្តកំពង់ឆ្នាំង៖ នៅវេលាម៉ោង១និង៣០ នាទីរសៀល ថ្ងៃទី ២៦ ខែតុលា ឆ្នាំ ២០២៣នគរបាលការិយាល័យប្រឆាំងបទល្មើសសេដ្ឋកិច្ច នៃស្នងការនគរបាលខេត្តកំពង់ឆ្នាំង បានចាប់ឃាត់រថយន្ត១គ្រឿងចំណុះ ១០ តោនដឹកសាច់បង្កក សាច់ប្រហិតដែលដឹកជញ្ជូននាំចូល គ្មានច្បាប់អនុញ្ញាត ប្រគល់ជូន មន្ត្រីការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទ ខេត្តកំពង់ឆ្នាំងបន្តនីតិវិធី ។
សមត្ថកិច្ចនគរបាលឲ្យដឹងថា រថយន្តដឹកគ្រឿងប្រហិតនិងគ្រឿងបង្កកគ្មានច្បាប់អនុញ្ញាតខាងលើម៉ាកហ៊ីយ៉ាន់ដាយ ពាក់ស្លាកលេខ បាត់ដំបង 3B.3255 បើកបរដោយបុរសបុរសមិនស្គាល់ឈ្មោះព្រោះចុះរត់ពេលសមត្ថកិច្ចចាប់ឃាត់រថយន្តនៅចំណុច ភូមិព្រែកកោង ឃុំជើងគ្រាវស្រុករលាប្អៀរ ។នៅរសៀលថ្ងៃដដែល មានការចូលរួមត្រួតពិនិត្យ ពីក្រឡាបញ្ជីអម ព្រះរាជអាជ្ញាអមសាលាដំបូងខេត្ត និងមន្ត្រីសមត្ថកិច្ចចម្រុះ រួចរក្សាទុកជាបណ្តោះ ដើម្បីរង់ចាំធ្វើការត្រួតពិនិត្យ ជាក់ស្ដែង។
ប្រមុខរាជរដ្ឋាភិបាលក៏ដូចជាក្រសួងពាក់ព័ន្ធបានបញ្ឈប់ការនាំប្រហិតនិងសាច់បង្កកចូលក្នុងព្រះរាជាណាចក្រកម្ពុជាដោយគ្មានច្បាប់ ដូច្នេះបើមានការនាំចូលសាច់ប្រហិតសាច់បង្កក គឺជាក្រុមល្មើសច្បាប់ លោតឆ័ត្រលួចនាំចូល ប្រទេសកម្ពុជាដោយលួចលាក់។គេមិនដឹងថាតើហេតុអីបានជាឈ្មួញអាចនាំចូលពីប្រទេសសៀមចូលស្រុកខ្មែរទាំងឡានបើកបានរហូតដល់ខេត្តកំពង់ឆ្នាំងបែបហ្នឹងនោះទេ។ករណិយ៍នេះទុកឲ្យប្រជាពលរដ្ឋគិតចុះ?៕