ព្រះវិហារ៖ ចាប់ពីថ្ងៃទី១-៤ ខែតុលា ឆ្នាំ២០២៣ បណ្តាញសហគមន៌ព្រៃឡង់ បានចុះស៊ើបអង្គេតបទល្មើសព្រៃឈើនៅក្នុងតំបន់ព្រៃឡង់ជាថ្មីទៀត បានប្រទះឃើញបទល្មើសជាច្រើនករណី។ក្នុងនោះ ការបរបាញ់សត្វព្រៃចំនួន២ករណី ដែលមានអាវុធកែច្នៃចំនួន៥ដើម និងគោយន្តចំនួន២គ្រឿង, ការកាប់រានយកដីធ្វើជាកម្មសិទ្ធ ចំនួន៣ទីតាំងមាន៖ នៅចំណុចអូរអាស្រង់ចំនួន ១៥ហិចតា, ចំណុចភ្នំចំបក់ក្អែកខាងជើងអូរគោលចំនួន ៥ហិចតា និងចំណុចជ្រាប់ព្រាលចំនួន ១៥ហិចតា។
ជួបឈើសុក្រំឃ្លុំចំនួន១២ដុំស្មើនឹង២ម៉ែត្រគូប។អាវុធកែច្នៃចំនួន ៥ដើម ដែលបណ្តាញសហគមន៌យើងយកបានពីបទល្មើស បានប្រគល់ជូនប៉ុស្តិនគរបាលរដ្ឋបាលឃុំរួសរាន់ ស្រុករវៀង ចាត់ការតាមនីតិវិធី។មានការកត់សម្គាល់ថាក្រុមសហគមន៍ព្រៃឡង់នេះកាលពីរាជរដ្ឋាភិបាលអាណត្តិទី៦ត្រូវបានក្រសួងបរិស្ថានហាមឃាត់មិនឲ្យចូលត្រួតពិនិត្យក្នុងព្រៃឡង់ឡើយដោយសំអាងថាក្រុមនេះគ្មានច្បាប់អនុញ្ញាតិនិងថាវាគ្មានបទល្មើសព្រៃឈើអីទៀតទេ។ប្រការនេះបានធ្វើឲ្យអង្គការជំនួយសហរដ្ឋអាមេរិកកាត់ជំនួយដែលត្រូវជូនក្រសួងបរិស្ថានសម្រាប់កម្មវិធីការពារព្រៃឈើ។ជំនួយនេះត្រូវបានអាមេរិកប្រកាសផ្តល់ជូនរាជរដ្ឋាភិបាលកម្ពុជាវិញចំនួន១៨លានដុល្លារកាលពីថ្ងៃទី២៩កញ្ញាពេលសម្តេចធិបតីហ៊ុនមាំណែតជួបអនុរដ្ឋមន្ត្រីស្តីទីក្រសួងការបរទេសអាមេរិកនៅទីក្រុងញូវយ៉កអាមេរិក។
សម្រាប់ការងារជួយការពារព្រៃឈើខ្មែរនេះដែរនាឱកាសអញ្ជើញ ជួបពិភាក្សាការងារជាមួយលោក អ៊ាង សុផល្លែត រដ្ឋមន្ត្រីក្រសួងបរិស្ថាន នាថ្ងៃទី៤ ខែតុលា ឆ្នាំ២០២៣ នៅទីស្តីការក្រសួង លោក Patrick Murphy បានថ្លែងថា ការគ្រប់គ្រងធនធានធម្មជាតិដោយចីរភាព គឺជាកត្តាសំខាន់ នៃកិច្ចសហប្រតិបត្តិការទ្វេភាគីរវាងសហរដ្ឋអាមេរិក និងកម្ពុជា ។លោក ឯកអគ្គរដ្ឋទូត បានគូសបញ្ជាក់ពីកិច្ចសហប្រតិបត្តិការ ដែលមានកន្លងមកលើកិច្ចការពារសត្វព្រៃ Mekong US និង ព្រៃឡង់បៃតង ហើយលើសពីនេះ សហរដ្ឋអាមេរិក បានត្រៀមខ្លួនរួចជាស្រេចក្នុងកិច្ចសហប្រតិបត្តិការបន្ត លើការអភិវឌ្ឍអនាគតបៃតង(Green future) តំបន់ជុំវិញបឹងទន្លេសាប និងវេទិកានៃកិច្ចប្រជុំកំពូលស្តីពី ការប្រែប្រួលអាកាសធាតុ (Cambodia Climate Summit) ដែលរៀបចំនៅខែវិច្ឆិកាខាងមុខ។លោក ឯកអគ្គរដ្ឋទូត បន្ដថា អាមេរិក បានផ្តល់ហិរញ្ញប្បទានច្រើនជាងគេដល់មូលនិធិអាកាសធាតុបៃតង ដើម្បីឆ្លើយតបនឹងការប្រែប្រួលអាកាសធាតុ ក្នុងចំណោមប្រទេស កំពុងអភិវឌ្ឍន៍ដែលមានកម្ពុជាផងដែរ។ បន្ថែមពីនេះ លោក ឯកអគ្គរដ្ឋទូត បានស្នើសុំ លោករដ្ឋមន្ត្រី ស្វែងយល់ពីការងារ អាទិភាពរបស់ក្រសួងបរិស្ថាន។
លោក អ៊ាង សុផល្លែត ឆ្លើយតបនឹងកិច្ចសហប្រតិបត្តិការទ្វេភាគី បានថ្លែងអំណរគុណចំពោះ អាមេរិក បានរួមចំណែកក្នុងការពារធនធានធម្មជាតិ និងកិច្ចសហការទប់ស្កាត់ការប្រែប្រួលអាកាសធាតុដែលជាបញ្ហាសកល។ លោក រដ្ឋមន្ត្រី បានជម្រាបពីការងារអាទិភាព ក្រសួងបានដាក់ចេញ ទី១ គឺការកាត់បន្ថយការប្រើប្រាស់ប្លាស្ទិក ដោយមានការចូលរួមពីសិស្សានុសិស្ស ដែលជាយុវជនជំនាន់ក្រោយជាង ១.៤លាននាក់ ។ កត្តានេះជាជោគជ័យមួយ ឈានឆ្ពោះទៅការគ្រប់គ្រងសំណល់ដោយប្រសិទ្ធិភាព។ ទី២ គឺការស្តារ និងដាំដើមឈើឡើងវិញ ដើម្បីឈានឆ្ពោះ ទៅទទួលបាននូវអព្យាក្រឹតកាបូន និងការលើកកម្ពស់ជីវភាព ប្រជាសហគមន៍ ឆ្លើយតបទៅនឹងការប្រែប្រួលអាកាសធាតុ ស្របតាមយុទ្ធសាស្ត្រ បញ្ចកោណ របស់រាជរដ្ឋាភិបាលកម្ពុជា ក្នុងដំណាក់កាលទី១នៃមុំទី២ ទី៤ និងទី៥ គឺធានាចីរភាពនៃការអភិវឌ្ឍសង្គម សេដ្ឋកិច្ច និងកសាងភាពធន់ ទៅនឹងការប្រែប្រួលអាកាសធាតុ ការអភិវឌ្ឍប្រកបដោយភាពធន់ ចីរភាព និងបរិយាបន្ន ដោយជំរុញការលើកកម្ពស់ ការទាក់ទាញវិនិយោគ ក្នុងឧស្សាហកម្ម ដែលមានតម្លៃបន្ថែមខ្ពស់ និងឧស្សាហកម្មបៃតង។ ទី៣ គឺចូលរួមជាមួយដៃគូអន្តរជាតិដោះស្រាយបញ្ហាសកល ដែលយកចិត្តទុកដាក់ ជាចម្បងទៅលើការ ប្រែប្រួលអាកាសធាតុ ៕