កំពង់ឆ្នាំង÷យោងតាមប្រភពព័ត៌មានពីប្រជាពលរដ្ឋនៅភូមិឆ្នុកទ្រូបានឲ្យដឹងថា ជារៀងរាល់ថ្ងៃនៅក្នុងរដូវបិទនេសាទនេះបន្ទាប់ពីមេឈ្មួញរកស៊ីប្រមូលទិញលៀស នៅមានឈ្មួញរកស៊ីប្រមូលទិញត្រីចម្រុះ(ត្រីនុយ) មួយថ្ងៃៗមិនក្រោមចាប់ពី 4 ទៅ 5 តោនឡើងនោះទេ។
ជារៀងរាល់ថ្ងៃគេសង្កេតឃើញមានទូកបាឡាស្មាច់ជាច្រើនបានដឹកត្រីនុយបន្តកន្ទុយគ្នាពីតំបន់ផ្សេងៗ យកមកច្រកថុងយួរដៃធំៗហើយជញ្ជូនដាក់ឡានកូរ៉េដើម្បីដឹកយកបចែកចាយឲ្យអ្នករកស៊ីចិញ្ចឹមត្រីឆ្ដោ ឬត្រីផ្សេងៗតាមបណ្ដាខេត្តនានា ដោយមួយថ្ងៃរថយន្តដឹកត្រីនុយចេញពីតំបន់ឆ្នុកទ្រូមិនក្រោមពី3ឡានទៅ5ឡានកូរ៉េនោះទេ។
ប្រភពព័ត៌មានខាងលើបានបង្ហើមឲ្យដឹងទៀតថាសមត្ថកិច្ចជំនាញជលផលដែលមានលោក អ៊ូ ចាន់ធាហៅ(កែវ ធូ)ជានាយសង្កាត់រដ្ឋបាលជល់ផលស្រុកបរិបូណ៌ឈរជើងនៅតំបន់ឆ្នុកទ្រូមិនមានវិធានការបង្ក្រាបឡើយ ថែមទាំងចេញលិខិត ពាក់មីអនុញ្ញាតឲ្យដឹកថែមទៀតផង។
ករណីនេះត្រូវបានប្រជាពលរដ្ឋដាក់ការសង្ស័យថាមន្ទ្រីជំនាញ ដែលស៊ីប្រាក់ខែរាស្ត្រជារៀងរាល់ខែនេះគឺមិនបានបម្រើរាស្ត្រទេបែរជារួមគំនិតគ្នាឃុបឃិតជាមួយឈ្មួញបំភ្លេចបំផ្លាញធនធានជលផលដែលជាផលប្រយោជន៍រួមសម្រាប់ចិញ្ចឹមជីវិតប្រជាពលរដ្ឋទូទៅទៅវិញទេ ព្រោះឈ្មួញរកស៊ីបទល្មើសនេសាទគគ្រឹកគគ្រេងពាសពេញទឹកពេញដីដូចជាករណីឈ្មួញរកស៊ីប្រមូលទិញលៀសនិងដឹកជញ្ជូនលៀស និងឈ្មួញរកស៊ីប្រមូលទិញត្រីនុយដឹកឡើងខូចផ្លូវខ្ទេចខ្ទី ស្ទើរគ្មានសល់ក៏គ្មានសមត្ថកិច្ចជំនាញឬអាជ្ញាធរពាក់ព័ន្ធនៅតំបន់ឆ្នុកទ្រូងស្រុកបរិបូណ៌នេះចេញមុខបង្ក្រាបឱ្យមានប្រសិទ្ធភាពម្ដងណាឡើយ។
ប្រជាពលរដ្ឋ សំណូមពរដល់ថ្នាក់លើពិសេសអាជ្ញាធរខេត្តកំពង់ឆ្នាំងមេត្តាចាត់វិធានការឲ្យបានតឹងរឹងជាទីបំផុតចំពោះមន្ត្រីថ្នាក់ក្រោមដែលឈរជើងប្រចាំការនៅតំបន់ឆ្នុកទ្រូនេះឱ្យបានឱ្យបានច្បាស់លាស់ម៉ឺងម៉ាត់ ដើម្បីកុំឱ្យប្រជាពលរដ្ឋដែលជាម្ចាស់ឆ្នោតខកចិត្តនិងអស់សង្ឃឹមទៅលើការដឹកនាំរបស់ថ្នាក់លើដែលជាក្ដីសង្ឃឹមរបស់ពួកគាត់។
