ប្រធានផ្នែកលក់ប្រចាំស្ថាប័នចង្ក្រានបរិស្ថានACE លោក សែម ចាន់វាសនា បានឲ្យដឹង កាលពីថ្ងៃទី០៨ សែសីហា ឆ្នាំ២០២៣នេះថា កាលពីឆ្នាំ២០១៩ ដោយមើលឃើញពីការបំពុលបរិស្ថានដែលកើតចេញពីការប្រើប្រាស់អុសធម្មជាតិ ប្រើធ្យូងដោយកាប់ឈើព្រៃ ក្នុងការចម្អិនម្ហូបប្រចាំថ្ងៃរបស់ប្រជាពលរដ្ឋកម្ពុជានេះ កូនខ្មែរមួយក្រុមបានផ្តួចផ្តើមបង្កើតជាចង្ក្រានបរិស្ថានមួយប្រភេទ ដែលវាបានជួយកាត់បន្ថយការបំភាយផ្សែងពុលចេញពីផ្ទះបាយបានប្រមាណជា ៩០%។ លោកថា “ប្រជាពលរដ្ឋកម្ពុជាភាគច្រើន គាត់បាននិយមប្រើប្រាស់ចង្ក្រាន ដែលដុតអុស ដុតធ្យូង និងខ្លះទៀតប្រើចង្ក្រានហ្គាស ដែលការប្រើប្រាស់វត្ថុធាតុដើមទាំងនេះ វាបានចំណាយថវិកាច្រើន និងប៉ះពាល់បរិស្ថានខ្លាំង ដូចជាអុស និងធ្យូង យើងត្រូវកាប់ឈើពីព្រៃធម្មជាតិ ចំណែកហ្គាសយើងត្រូវនាំចូលពីប្រទេសជិតខាង។ អីចឹងវាចំណាយលុយច្រើន ហើយអុស ធ្យូង វាបានបញ្ចេញផ្សែងពុលទៅក្នុងបរិយាកាសជាច្រើន និងប៉ះពាលសុខភាពផងដែរ”។
លោកវាសនា លើកឡើងថា ស្របពេលដែលបង្កើតចង្ក្រានបរិស្ថាននេះ ក្រុមការងារក៏បានមើលឃើញនូវ កាកសំណល់មួយចំនួនដូចជាកាកអំពៅ កម្ទិចកម្ទីឈើអាចម៍រណាជាដើម ត្រូវបានគេយកទៅបោះចោល ដុតចោល រាយប៉ាយស្ទើរគ្រប់ទីកន្លែង ដែលអាចយកកែច្នៃជាអុសប្រើប្រាស់ជាមួយចង្ក្រានបរិស្ថានបាន។ លោកថា អុសបរិស្ថាននេះដែរ ត្រូវបានផលិតពីសំណល់កាកអំពៅ ឬកម្ទេចអាចម៍រណា មិនប៉ះពាល់បរិស្ថាន ដូចការប្រើប្រាស់ធ្យូងឬអុសធម្មតា ដែលអាចបំផ្លាញធនធានធម្មជាតិនៅកម្ពុជា។ ជាពិសេសការប្រើប្រាស់អុសនេះជាមួយចង្ក្រានបរិស្ថាន វាកាន់តែល្អប្រសើរ សន្សំ សំចៃថវិកា កាត់បន្ថយផ្សែង និងឧស្ម័ន មិនប៉ះពាល់សុខភាពជាដើម។
លោកវាសនា បានពន្យល់ថា ទោះបីជាវាមានឈ្មោះជាអុសបរិស្ថានតែយើងមិនមានទៅកាប់ព្រៃមកធ្វើអុសទេ គឺយើងយកកាកអំពៅ មែកឈើដែលបងប្អូនយើងកាប់ចោល ស្លឹកឈើ កម្ទេចកម្ទីអាចម៍រណាអី យើងប្រមូលពីសិប្បកម្មកែច្នៃមកវិញយើងអត់កាប់មែកឈើធំៗមកធ្វើជាអុសនោះទេ ហើយបើយើងធ្វើអ៊ីចឹងមិនមានជាការជួយបរិស្ថានទេ។
សូមបញ្ជាក់ថា ស្ថាប័នចង្ក្រានបរិស្ថានACE គឺមានទីតាំងក្នុងភូមិតាចេក សង្កាត់ជ្រាវ ក្រុងសៀមរាប ខេត្តសៀមរាប។ ដោយក្នុងមួយថ្ងៃ ស្ថាប័នចង្ក្រានបរិស្ថាន មានលទ្ធភាពផលិតចង្ក្រាន បានចំនួន២០ ទៅ ៣០ចង្ក្រាន ដោយចង្ក្រានមួយឈុត មានតម្លៃ១០៥ដុល្លារ អាចប្រើប្រាស់បានរហូតជិត១០ឆ្នាំ និងធានាសេវាកម្មជួសជុលជូនអតិថិជននៅពេលខូចខាតជាដើម។ ចំណែកអុសបរិស្ថានវិញ អាចផលិតបានជិត៥០០គីឡូក្រាមក្នុងមួយថ្ងៃ ដោយលក់ចេញក្នុងតម្លៃ ៨,០០០រៀលក្នុង១៥គីឡូក្រាមឬស្មើនឹង ១គីឡូ ៥០០រៀល។
