កំពង់ឆ្នាំង៖ ប្រភពព័ត៌មានពីប្រជាពលរដ្ឋនៅស្រុកទឹកផុសបានរាយការណ៍មកថា: មេឈ្មួញប្រមូលទិញធ្យូងដុះស្លែឈ្មោះ លីរស់នៅភូមិក្បាលឡាន ឃុំខ្លុងពពក ស្រុកទឹកផុស បានគៀងគរក្រុមរកស៊ីដុតឡធ្យូងឱ្យដឹកធ្យូងយកទៅលក់ឲ្យខ្លួននៅទីកន្លែងតែម្តង។
កន្លងមកដោយសារតែមានការរិះគន់យ៉ាងចាស់ដៃពីបណ្ដាញសង្គមហ្វេសប៊ុកទើបបុគ្គលរូបនេះមិនហ៊ានមកដឹកផ្ទាល់ខ្លួនទេ តែទោះជាយ៉ាងណាបុគ្គលឈ្មោះ លីនៅតែឆ្លៀតពេលឆក់ឱកាសដឹកយ៉ាងសកម្មចេញពីចំណុចភូមិសាស្ត្រភូមិកោះខ្ពុម ក្នុងឃុំជៀប ស្រុកទឹកផុស ខេត្តកំពង់ឆ្នាំងយកទៅស្តុបនៅទីកន្លែងផ្ទាល់ខ្លួនហើយចែកចាយបន្តតាមគោយន្តដូចសត្វកណ្ដៀរ។
តើដូចពាក្យគេនិយាយតៗគ្នាថា ឈើឈរជាឈើបរិស្ថាន
ឈើឡើងលើឡានជាឈើមេព្រៃ?។
ក្រុមអ្នកសារព័ត៌មានយើងតាមអង្គភាពមួយចំនួនដែលបានដឹងរឿងនៅតែព្យាយាមតាមស៊ើបអង្កេតស្រាវជ្រាវនិងឃ្លាំចាំមើលថាតើជំនាញពាក់ព័ន្ធដែលមានបរិស្ថាន មេព្រៃ ព្រមទាំងប៉េអឹមនិងប៉ូលីសស្រុកទឹកផុសហ៊ានបង្ក្រាបបុគ្គលរូបនេះបានដែរឬទេ?.ឬមួយបានទទួលលាភសក្ការៈពីមេឈ្មួញធ្យូងដុះស្លែរូបនេះ?។គួររំលឹកផងដែរថាបទល្មើសកាប់បំផ្លាញព្រៃឈើយកដុតឡធ្យូងគឺជាបទល្មើសជាក់ស្ដែងនិងជាវិនាសកម្មយ៉ាងធ្ងន់ធ្ងរជាទីបំផុត ដោយសារក្រុមអ្នកដុតឡកាប់យកឈឺយកទៅដុតឡនោះគឺមិនរើសមុខឡើយ..។
អំណឹះតទៅប្រសិនបើគ្មានចំណាត់ការនិងមានវិធានការទប់ស្កាត់ឱ្យបានតឹងរឹងទេនោះព្រៃឈើនៅតំបន់ស្រុកទឹកផុសតាមបណ្ដាព្រៃសហគមន៍ក៏ដូចជាតាមព្រៃជួរភ្នំទាំងនោះនឹងរត់លាយសាបសូន្យជាវាលរហោឋានជាក់ជាមិនខាន។
កន្លងទៅមុនយុទ្ធនាការបោះឆ្នោត អាជ្ញាធរបានសុំឲ្យមន្ត្រីជំនាញពាក់ព័ន្ធទាំងអស់មេត្តាបន្ធូរដៃសិនរង់ចាំបោះឆ្នោតហើយ។
ពេលនេះយុទ្ធនាការបោះឆ្នោតក៏បានរួចរាល់អស់ហើយដែរ។តើអស់លោកមន្ត្រីជំនាញនិងសមត្ថកិច្ចពាក់ព័ន្ធមានបញ្ហាអ្វីយកមកធ្វើជាលេសទៀត?។
