ខេត្តបាត់ដំបង៖ ជនសង្ស័យពាក់ព័ន្ធនឹងបទល្មើសគ្រឿងញៀនសរុបចំនួន២៩នាក់ ត្រូវបានឃាត់ខ្លួនពីកម្លាំងនគរបាលស្រុកថ្មគោល ខណៈដែលជនសង្ស័យទាំងនោះបានធ្វើសកម្មភាពប្រព្រឹត្តបទល្មើសគ្រឿងញៀននៅក្នុងមូលដ្ឋានយ៉ាងគគ្រឹកគគ្រេងបង្កឱ្យពលរដ្ឋរស់នៅក្នុងមូលដ្ឋាននោះមានការភាពភ័យខ្លាច។
សូមបញ្ជាក់ថា នៅក្នុងប្រតិបត្តិការឆ្មក់ចូលបង្ក្រាបសំបុកគ្រឿងញៀននេះ គឺកម្លាំងនគរបាលស្រុកថ្មគោលធ្វើឡើងដោយយប្រើពេលវេលាអស់២១ម៉ោងនិងកម្លាំងនគរបាលជាច្រើននាក់។ ចាប់ផ្តើមពីវេលាម៉ោង១២ថ្ងៃត្រង់ថ្ងៃទី១ ខែកញ្ញា រហូតដល់ម៉ោង ៨ ព្រឹកថ្ងៃទី២ ខែកញ្ញា ឆ្នាំ២០១៦ ស្ថិតនៅចំណុចភូមិពពាលខែ ឃុំអូរតាគី ស្រុកថ្មគោល ខេត្តបាត់ដំបង។ កម្លាំងនគរបាលបានធ្វើការត្រួតពនិត្យឆែកឆេរដកហូតបានថ្នាំញៀនមេតំហ្វេតាមីនទឹកកកចំនួន១៦ថង់ស្មើនិងទម្ងន់ ១០៣.២៩ក្រាម ជញ្ជីងថ្លឹងថ្នាំញៀន១គ្រឿង ដាវសាំម៉ូរ៉ៃ១ដើម កាំភ្លើងខ្យល់កែច្នៃបាញ់គ្រាប់កង់ អាចបង្កឱ្យមនុស្សស្លាប់១ដើម កន្ត្រៃចំនួន២ ម៉ូតូ១៦គ្រឿង ស្លាកលេខម៉ូតូ១ និងឧបករណ៍សម្ភារៈសម្រាប់ប្រើប្រាស់ថ្នាំញៀនមួយចំនួនផងដែរ។
លោកវរសេនីយ៍ត្រី ផង់ សុភាព អធិការនគរបាលស្រុកថ្មគោលប្រាប់ឱ្យដឹងថា កម្លាំង នគរបាលចុះបង្ក្រាបទីតាំងជួញដូរថ្នាំញៀនស្ថិតនៅចំណុចខាងលើបានសម្រេចនៅពេលនេះ ក្រោយពីមានការសហការពីប្រជាពលរដ្ឋល្អរាយការណ៍មកលោកផ្ទាល់អំពីសកម្មភាពក្រុមជនសង្ស័យគ្រឿងញៀនបាននិងកំពុងតែប្រព្រឹត្តបទល្មើសគ្រឿងញៀនយ៉ាងគគ្រឹកគ្រេង ។ បន្ទាប់មកលោកក៏សុំគោលការណ៍ពីលោកឧត្តមសេនីយ៍ទោស ថេត ស្នងការនគរបាលខេត្តបាត់ដំបង ដឹកនាំកម្លាំងចុះបង្ក្រាបក្រុមជនសង្ស័យទាំងនេះតែម្តង ពេលទៅចុះដល់កន្លែងមេខ្លោងធំដែលជាអ្នកផ្គត់ផ្គង់គ្រឿងញៀន ផ្តល់ទីតាំងលក់ចែកចាយនិងប្រើប្រាស់ បានរត់គេចខ្លួនបាត់មេខ្លោងធំនោះមានឈ្មោះ សឿម សីកូ ភេទប្រុសអាយុ៣៥ឆ្នាំ រស់នៅក្នុងភូមិ ឃុំខាងលើ។
លោកអធិការប្រាប់ឱ្យដឹងទៀតថា ជនសង្ស័យទាំង២៩នាក់នេះ គឺមានមុខសញ្ញាជួញដូរថ្នាំញៀន៣នាក់ និងមុខសញ្ញាប្រើប្រាស់ចំនួន២៦នាក់ ។ជនសង្ស័យជួញដូរថ្នាំញៀនទាំង៣នាក់មានឈ្មោះ ១,ឈុន សុផល ភេទប្រុស អាយុ៣៥ឆ្នាំ រស់នៅភូមិចបកាប់ ឃុំអន្លង់រុណ ស្រុកថ្មមគោល ២,វិន វឌ្ឍនា ភេទប្រុសអាយុ ២០ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល ៣,តែ ប៊ុន លៀង ភេទប្រុស អាយុ៣៦ឆ្នាំរស់នៅក្នុងភូមិអូរតាគាំ សង្កាត់ទួលតាឯក ក្រុងបាត់ដំបង។ ហើយបច្ចុប្បន្នកំពុងស្ថិតក្នុងការសាកសួរ ក របស់កម្លាំងការិយាល័យជំនាញខេត្តមុន នឹងបញ្ជូនទៅកាន់តុលាការដើម្បីអនុវត្តតាមផ្លូវច្បាប់។
ពាក់ព័ន្ធគ្រឿងញៀននេះដែរកាលពីកន្លងទៅថ្មីៗនេះ កម្លាំងនគរបាលខេត្តបាត់ដំបង ក៏បានធ្វើការបង្ក្រាបមុខសញ្ញាជនសង្ស័យមេខ្លោងជួញដូរគ្រឿងញៀន២នាក់ផងដែរធ្វើឡើងនៅស្រុកភ្នំព្រឹកនិងក្រុងនៅក្រុងបាត់ដំបងក្នុងនោះដកហូតបានថ្នាំញៀនមួយចំនួនធំ។
គួរកត់សម្គាល់ថា ខេត្តបាត់ដំបងត្រូវគេមើលឃើញថា បានដាក់ចេញនូវផែនការប្រយុទ្ធប្រឆាំងគ្រឿងញៀនដែលជាការអនុវត្តដើម្បី រក្សាឱ្យបានសុវត្ថិភាព នៃភូមិឃុំសង្កាត់ដោយមានការដឹកនាំបញ្ជាផ្ទាល់របស់ លោកឧត្តមសេនីយ៍ទោ ស ថេត ស្នងការនគរបាលខេត្តបាត់ដំបងក្នុងការជម្រុញ និងរិតបន្តឹងទៅលើវិធានការបង្ការទប់ស្កាត់ បង្ក្រាបគ្រឿងញៀនឱ្យមានប្រសិទ្ធភាពខ្ពស់ ។ គ្រឿងញៀន ត្រូវគេនិយាយថាជាផ្នែកមូយបង្កឱ្យកើតមានបទល្មើសលួច ឆក់ ប្លន់ ប្រើអំពើហិង្សាជាដើមនោះ៕
