ខេត្តសៀមរាប៖ បុគ្គលមានឥទ្ធិពលម្នាក់ នៅក្នុងខេត្តសៀមរាបត្រូវបានរកឃើញថា បានធ្វើរបងថ្មកាត់យកអូរធម្មជាតិមួយកន្លែង នៅជើងភ្នំគូលែនដើម្បីយកដីធ្វើកម្មសិទ្ធ។ ប្រភពព័ត៌មានពីមន្ត្រីមូលដ្ឋាន សុំមិនបញ្ចេញឈ្មោះ បានឲ្យដឹងថា ទីតាំងដែលបុគ្គលមានអំណាចនេះ ធ្វើរបងរំលោភយកនោះ ជាអូរធម្មជាតិ ស្ថិតនៅក្នុងភូមិគូលែនថ្មី ឃុំត្បែង ស្រុកបន្ទាយស្រី ខេត្តសៀមរាប។ ម្ចាស់របងថ្មនោះ មានឈ្មោះ ឃឹម ប៉ូសាយដែលគេស្គាល់ថា ជាបងប្អូនបង្កើត របស់លោកឃឹម ប៊ុនសុង រដ្ឋលេខាធិការក្រសួងការពារជាតិ និងជាអតីតជាអភិបាលខេត្តសៀមរាប។
ប្រភពព័ត៌មាន បានឲ្យដឹងថា ទីតាំងនេះ កាលពីដើមឡើយ ជាចម្ការពនាចររបស់ប្រជាពលរដ្ឋ លុះបន្ទាប់ក៏មានឈ្មួញចុះទៅប្រមូលទិញ និងលក់បន្តមកឲ្យលោក ឃឹម ប៉ូសាយ។ចាប់តាំងពីបានទិញដីនោះមក លោកឃឹម ប៉ូសាយ បានព្យាយាមធ្វើរបងកាត់អូរនេះ តាំងពីជំនាន់ លោកឃឹម ហ្វីណង់ ដែលជាក្មួយប្រុសបង្កើតរបស់លោក នៅធ្វើជាអភិបាលស្រុកបន្ទាយស្រីមកម្ល៉េះ ប៉ុន្តែមិនអាចធ្វើបានដោយរលូនបានទេ ដោយសារមានបណ្តឹងពីប្រជាពលរដ្ឋ។ ប៉ុន្តែដោយឃើញឱកាសល្អ ក្នុងពេលអាជ្ញាធរ មានសមត្ថកិច្ចជាប់រវល់ក្នុងការរៀបចំសណ្តាប់ធ្នាប់សម្រាប់ការបោះឆ្នោតជាតិនេះផង លោកឃឹម ប៉ូសាយ ក៏បានលបលួចធ្វើម្តងទៀត។
ករណីយ៍នេះសារព័ត៌មានមិនអាចទាក់់ទងសុំបំភ្លឺពីលោក ឃឹម ប៉ូសាយ បាននៅឡើយទេ ដោយមិនមានលេខទូរស័ព្ទទំនាក់ទំនង។ទោះបីយ៉ាងណាអាជ្ញាធរស្រុកបន្ទាយស្រីនៅថ្ងៃទី១៧ ខែកក្កដា ឆ្នាំ២០២៣ បានចុះទៅទប់ស្កាត់សំណង់នេះ ហើយកោះហៅ ម្ចាស់សំណង់ឲ្យចូលខ្លួនមកដោះស្រាយ នៅសាលាស្រុកនៅថ្ងៃទី១៩ ខែកក្កដា ឆ្នាំ២០២៣៕
