ខេត្តមណ្ឌលគិរី ៖ ប្រជាពលរដ្ឋជនជាតិដើមភាគតិចចំនួន៤គ្រួសារ បានចុះទៅហាមឃាត់មិនឲ្យគេកាប់ទន្ទ្រានរំលោភមកលើដីរបស់ខ្លួន បែត្រូវកម្លាំងសមត្ថកិច្ចឃាត់ខ្លួនមនុស្សពីរនាក់នាំទៅស្នងការដ្ឋាននគបាលខេត្តព្រឹកថ្ងៃទី៤ ខែមិថុនា ឆ្នាំ២០២៣ ត្រង់ចំណុចដីទំនាស់មួយកន្លែង រវាងគ្រួសារជនជាតិដើមភាគតិច និងក្រុមឈ្មួញស្ថិតនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។ មនុស្សដែលត្រូវឃាត់ខ្លួននោះ ទី១-ឈ្មោះក្រើក ទ្រី ជាម្ចាស់ដីទី២-ឈ្មោះ ព្រើន ស្រីនាង ត្រូវជាក្មួយម្ចាស់ដី ។
ប្រភពពីបងប្អូនជនជាតិដើមភាគតិចទាំងអស់ ប្រាប់ដូចៗគ្នាថា បច្ចុប្បន្ន កំពុងមានគេរៀបចំយកដីរបស់គាត់លក់ឲ្យទៅបុគ្គលផ្សេង ហើយទាំងខ្លួនមិនបានដឹងសោះតែម្តង ពីព្រោះទីនោះធ្លាប់តែចេញចូលដាំដំណាំអាស្រ័យផលរាល់ថ្ងៃរាល់ឆ្នាំរហូតមក ។ ស្រាប់តែមកដល់ព្រឹកថ្ងៃទី៤ មិថុនា នេះ ពួកគាត់បានឃើញមានមនុស្សប្លែកចំនួន៥នាក់ មកកាប់ស្ការព្រៃលើដីរបស់ខ្លួនទៅវិញ ហើយក៏ពួកខ្លួននាំបងប្អូនទាំងបួនគ្រួសារចុះទៅសួរនាំ និងធ្វើការហាមឃាត់មិនឲ្យពួកគេកាប់ឆ្ការលើទីតាំងដីរបស់ខ្លួននោះ ។
ពួកគាត់បន្តថា ពួកគាត់កំពុងតែហាមប្រាមឃាត់មិនឲ្យកាប់នោះមិនបានប៉ុន្មានផង រយៈប្រហែល១៥នាទី ក៏ស្រាប់តែឃើញមានកម្លាំងនគបាលនៃស្នងការដ្ឋានខេត្តចុះមកបំបែកកម្លាំងពួកគាត់ ហើយថែមទាំងនាំខ្លួនមនុស្សជាសមាជិកក្រុមគ្រួសារពួកគាត់ចំនួនពីរនាក់ទៅស្នងការដ្ឋានខេត្តបាត់ភ្លាមៗដែរ ។
ប្រជាពលរដ្ឋជនជាតិដើមភាគតិចពូនង (ព្នង)ចំនួន៤គ្រួសារ នោះរស់នៅភូមិពូលូង សង្កាត់រមនា ក្រុងសែនមនោរម្យខេត្តមណ្ឌលគិរី ហើយមានដីចម្ការនៅចំណុចភូមិអូរស្ពាន សង្កាត់ស្ពានមានជ័យ ក្រុងសែនមនោរម្យខេត្តមណ្ឌលគិរី ។ ពួកគាត់បន្តថា បច្ចុប្បន្ន ពួកគាត់កំពុងតែមានការភ័យខ្លាច និងព្រួយបារម្ភយ៉ាងខ្លាំងគ្រប់បញ្ហាទាំងឡាយដែលពាក់ព័ន្ធនឹងដីព្រៃកប់ផ្នូរខ្មោចបូរាណ និងជាដីព្រៃតំណមដីភូមិចាស់ៗរបស់ពួកគាត់នោះប្រឈមនិងបុគ្គលអ្នកមានអំណាចចំនួនពីរនាក់ជាឈ្មួញដើររៀបដីលក់បន្តឲ្យឈ្មួញធំៗ និងអង្កន់ធ្វើជាដីឡូត៍លក់ផងរៀបឯកសាររំលោភយក។
កន្លងមក ប្រសាសន៍របស់សម្ដេចតេជោ ហ៊ុន សែន នាយករដ្ឋមន្ត្រី បានមានប្រសាសន៍ថា ពាក់ព័ន្ធនឹងដីធ្លីមិនត្រូវឲ្យពលរដ្ឋណាម្នាក់ ឬជនណាម្នាក់ជាប់គុក ដោយសាររឿងដីធ្លីឡើយ។ តែចម្លែកអី នៅក្នុងខេត្តមណ្ឌលគីរី ឲ្យតែពាក់ព័ន្ធនឹងរឿងដីធ្លី តែងតែកម្លាំងសមត្ថកិច្ចនគរបាលផ្នែកព្រហ្មទណ្ឌ កោះហៅជនស្លូតត្រង់យកទៅសាកសួរបំភិតបំភ័យ ឬកសាងសំណុំរឿងបញ្ជូនទៅតុលាការ ។បើនិយាយរឿងផ្លូវច្បាប់វិញ…បើដីដែលកំពុងតែមានទំនាស់ភាគីទាំងសង់ខាង ឬភាគីណាមួយ មិនអាចចូលកាន់កាប់ទន្ទ្រានបានទេ..រង់ចាំការដោះស្រាយបញ្ចប់សិន..។ បើតាមសេចក្តីរាយការណ៍មកថា នៅក្នុងខេត្តមណ្ឌលគិរីភាគច្រើនជនជាតិព្នងមានដី ក៏ប៉ុន្តែមិនដែលបានធ្វើប្លង់កម្មសិទ្ធិស្របច្បាប់ឲ្យបានគ្រប់ៗគ្នានោះបានទេ..ភាគច្រើនពួកគាត់មិនសូវចេះអក្សរ ។
នៅវេលាម៉ោង៤ និង៥១នាទីថ្ងៃទី៤ ខែមិថុនា ឆ្នាំ២០២៣ លោកឡោ សុខា ស្នងការនគរបាលខេត្តមណ្ឌលគិរីបានឲ្យដឹងតាមទូរសព្ទដល់ក្រុមអ្នកយកព័ត៌មានថា កម្លាំងរបស់គាត់ធ្វើយោងតាមពាក្យបណ្ដឹងរបស់គេ ហើយក៏បានជូនដំណឹងទៅខាងតុលាការអស់ហើយដែរ។តុលាការអនុញ្ញាតឲ្យហៅមកសួរនាំសិន តើមានឯកសារអីខ្លះដែលពាក់ព័ន្ធ ដើម្បីយកមកថ្លឹងថ្លែងទាំងសងខាង ទាំងដើមបណ្ដឹងទាំងចុងបណ្ដឹង។ ហើយលោកស្នងការបន្តទៀតថា ..អត់មានអ្នកណាឃាត់ខ្លួនទេ ដីនឹងជាប់នៅក្នុងបណ្ដឹង ហើយគេប្រាប់គាត់ថា កុំឲ្យធ្វើគាត់នៅតែធ្វើលើដីហ្នឹងបន្តទៀត ។ រង់ចាំដោះស្រាយតាមផ្លូវច្បាប់ មានឯកសារអ្វីពាក់ព័ន្ធ យកមកបង្ហាញមកតែគាត់ អត់មានបានយកឯកសារអីមកបង្ហាញទេ បែរជាគាត់មកធ្វើលើដីនឹងអញ្ចឹងខាងខ្ញុំ ត្រូវហៅគាត់មកសួរនាំ ។ ហើយលោកស្នងការបន្តទៀតថា ការឃាត់..ការអី..លើព្រះរាជអាជ្ញាគេទេ) ។តែខាងប្រជាពលរដ្ឋប្រាប់ថាគាត់មានឯកសារបញ្ជាក់ពីអាជ្ញាធរឃុំដែរតើ?៕
