ព្រះអគ្គិជ័យកីឡាបានធ្វើដំណើរគោលចរអស់រយៈពេល ៣៧ថ្ងៃ តាមបណ្ដាប្រទេសក្នុងតំបន់ចំនួន ៩ ក្នុងតំបន់អាស៊ីអាគ្នេយ៍ រួមមានវៀតណាម ហ្វីលីពីន ឥណ្ឌូនេស៊ី ទីម័រខាងកើត ម៉ាឡេស៊ី សិង្ហបុរី ថៃ មីយ៉ាន់ម៉ា និងឡាវ (លើកលែងព្រុយណេ ជាប់បុណ្យរ៉ាម៉ាដន ពុំអាចរៀបចំបាន) ប្រកបដោយភាពជោគជ័យ និងការសាទរជាខ្លាំងពីបណ្ដាប្រទេសសមាជិក ។
បេសកជនពិសេសលោក ហោ សារុន រដ្ឋលេខាធិក្រសួងទេសចរណ៍ អមដោយប្រតិភូ ៨រូបផ្សេងទៀតនេះ ទទួលបានការស្វាគមន៍យ៉ាងកក់ក្ដៅពីសំណាក់លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន និងជាអនុប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ (CAMSOC-CAMAPGOC) ព្រមទាំងថ្នាក់ដឹកនាំខេត្តស្ទឹងត្រែង ប្រជាពលរដ្ឋ និងសិស្សានុសិស្សរ៉ាប់ពាន់នាក់ ដែលឈរអបអរសាទរតាមដងផ្លូវ ។
ក្នុងដំណើរបេសកកម្មរយៈពេល ៣៧ថ្ងៃនេះដែរ ឯកឧត្តម ហោ សារុន បានរាយការណ៍នូវសមិទ្ធផល ចំពោះព្រះអគ្គិជ័យកីឡាដែលបានបំពេញតួនាទីដ៏ឧត្ដុង្គឧត្តម និងសម្រេចបានលទ្ធផលល្អគួរជាទីមោទនៈ នៅ ដោយបាននាំមកជាមួយនូវជោគជ័យត្រចះត្រចង់ជូនជាតិមាតុភូមិ ក្នុងនាមម្ចាស់ផ្ទះលើកដំបូង នៃការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ។
សូមរំឭកថា ពិធីដង្ហែព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ទៅតាមបណ្ដាប្រទេសក្នុងតំបន់នេះ កើតឡើងក្រោយព្រះរាជពិធីសុំភ្លើងព្រះអគ្គិអាទិទេព និងព្រះរាជពិធីប្រោសព្រះរាជទានព្រះអគ្គិជ័យកីឡា នៅប្រាសាទអង្គរវត្ត ខេត្តសៀមរាប ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី២១ ខែមីនា ឆ្នាំ២០២៣ មុនចាកចេញពីកម្ពុជា ។
ពេលត្រឡប់មកដល់កម្ពុជា ព្រះអគ្គិជ័យកីឡា ត្រូវបានដង្ហែជុំវិញក្រុងស្ទឹងត្រែង មុនយកទៅតម្កល់ទុកនៅវត្តស្រះកែវមុន្នីវណ្ណ (វត្តលើ) ១យប់ មុនបន្ដពិធីដង្ហែពីខេត្តស្ទឹងត្រែង ឆ្ពោះទៅរាជធានីភ្នំពេញ នៅថ្ងៃទី២៨ ខែមេសា ។ ក្រោយទៅដល់រាជធានីភ្នំពេញ ១យប់ទៀត ពោលគឺនៅព្រឹកថ្ងៃទី២៩ ខែមេសា ព្រះអគ្គិជ័យកីឡា នឹងត្រូវបន្ដដំណើរគោលចរជុំវិញបឹងទន្លេសាបវិញម្ដង ដោយត្រូវដង្ហែឆ្លងកាត់ខេត្តកណ្ដាល កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ និងខេត្តកំពង់ចាម រហូតដង្ហែចូលពហុកីឡដ្ឋានជាតិមរតកតេជោ នាយប់ថ្ងៃទី០៥ ខែឧសភា ឲ្យត្រូវនឹងពិធីបើកការប្រកួតកីឡាស៊ីហ្គេមលើកទី៣២ ជាផ្លូវការតែម្ដង ៕
