ខេត្តបាត់ដំបង ៖ កាលពីថ្ងៃទី០១ ខែ កញ្ញា ឆ្នាំ២០១៦ វេលាម៉ោង១២ និង ៣០ នាទីកន្លងទៅនេះ មានគ្រាប់មីនតោនមួយគ្រាប់បានផ្ទុះឡើងយ៉ាងរំពងព្រៃលាយឡំដោយផ្សែងខ្មៅខ្មួលខ្មាញ់ គួរឲ្យរន្ឋត់ ដែលបណ្ដលឱ្យបុរសម្នាក់ឈ្មោះជិន កំសាន អាយុ ៣៣ឆ្នាំ ជាកសិករ រស់នៅភូមិបួររុន ឃុំត្រែង ស្រុករតនមណ្ឌល ខេត្តបាត់ដំបង បានខ្ទាតប៉ើងចេញពីតួត្រាក់ទ័រមួយគ្រឿងដែលគាត់កំពុងបើកបរភ្ជួរដីចំការរបស់គាត់នៅទីនោះ បានបាត់បង់ជីវិតភ្លាមៗនៅនឹងកន្លែង រីឯត្រាក់ទ័ររបស់គាត់ត្រូវរងការខូចខាតទាំងស្រុង ។
សូមបញ្ជាក់ជូនថា ក្នុងភូមិសាស្ត្រស្រុករតនមណ្ឌលនេះជាអតីតសមរភូមិប្រយុទ្ឋដ៏ក្តៅគគុកមួយកាលពីអតីតកាល ហើយបច្ចុប្បន្ននៅមានយុទ្ឋភ័ណ្ឌ មិនទាន់ផ្ទុះជាច្រើននៅកប់រាយប៉ាយក្នុងដីនៅឡើយ បើទោះបីជាមានការរុករាវដោះយកគ្រឿងផ្ទុះពីសំណាក់អាជ្ញាធរជំនាញក្តី តែជារឿយៗគ្រោះថ្នាក់ដែលបង្ករឡើងដោយ (យុទ្ឋភ័ណ្ឌ )បែបនេះតែងតែឆក់យកអាយុជីវិតប្រជាកសិករស្លូតត្រង់ដោយក្តីឈឺចាប់យ៉ាងអាណោចអាធ័ម ។
ក្រោយកើតហេតុ សពរបស់ជនរងគ្រោះ ជិន កំសាន ត្រូវបានក្រុមគ្រួសារចាត់ចែងធ្វើបុណ្យតាមប្រពៃណី។ ក្នុងនាមស្នងការដ្ឋាននគរបាលខេត្តបាត់ដំបងសូមចូលរួមរំលែកទុក្ខដល់ក្រុមគ្រួសារសព និងសូមអំពាវនាវដល់ប្រជាកសិករមេត្តាយកចិត្តទុកដាក់ ប្រុងប្រយ័ត្នឲ្យបានខ្ពស់បំផុតលើបញ្ហានេះ ចៀសវាងកុំឲ្យកើតមានឧប្បត្តិហេតុដូចករណីនេះទៀត ៕
