ខេត្តកំពង់ឆ្នាំង៖ កាលពីថ្ងៃទី៦ធ្នូលោក សាន់ យូ អភិបាលរងខេត្តកំពង់ឆ្នាំងបានដឹកនាំកម្លាំងចុះពិនិត្យដកហូតនិងឃាត់គ្រឿងចក្រ ដែលជនល្មើសបានឈូសឆាយបំផ្លាញ ទន្ទ្រានយកធ្វើជាកម្មសិទ្ធិ នៅក្នុងឃុំក្រាំងស្គារ ស្រុកទឹកផុស ខេត្តកំពង់ឆ្នាំង យកមកទុកជាសម្បត្តិរដ្ឋវិញ។
ករណីនេះកសិកម្ម រុក្ខាប្រមាញ់ និងនេសាទខេត្តកំពង់ឆ្នាំងបានចេញលិខិតមួយចុះលេខ ៤៨៩ ខរព.កឆ ចុះថ្ងៃទី០៨ ខែវិច្ឆិកា ឆ្នាំ២០២១ ប្រកាសជូនដំណឹង ជាសាធារណៈចំពោះបណ្តាជនទាំងឡាយណា ដែលបានធ្វើការកាប់រាន ឈូសឆាយ ហ៊ុមព័ទ្ធវាតយកដីព្រៃឈើទំហំ៧១១ហត២៨១៣ ស្ថិតក្នុងភូមិក្រាំងស្គារត្បូង ឃុំក្រាំងស្គារ និងភូមិកោះខ្ទម្ភ ភូមិតាន ឃុំជឿប ទឹកផុស មានចំណុចនិយាមកាជាពហុកោណបិទជិតចំនួន៣២ចំណុច ហើយត្រូវបានសមត្ថកិច្ចខណ្ឌរដ្ឋបាលព្រៃឈើកំពង់ឆ្នាំង ធ្វើការស្រាវជ្រាវរកឃើញកន្លងមក។
ដូច្នេះស្នើជនទាំងឡាយណាដែលបានធ្វើការកាប់រាន ឈូសឆាយ ហ៊ុមព័ទ្ធវាតយកដីព្រៃឈើចំណុចខាងលើ ត្រូវចូលមកបង្ហាញខ្លួននៅទីចាត់ការខណ្ឌរដ្ឋបាលព្រៃឈើកំពង់ឆ្នាំង ស្ថិតនៅជាប់ដងផ្លូវជាតិលេខ៥ ក្នុងភូមិទី១ សង្កាត់ ខ្សាម ក្រុងកំពង់ឆ្នាំង ដោយយកភ្ជាប់នូវអត្តសញ្ញាណប័ណ្ណសញ្ជាតិខ្មែរ និងឯកសារពាក់ព័ន្ធនឹងការកាន់កាប់ដីនេះមក ជាមួយ ដើម្បីធ្វើការពិនិត្យដោះស្រាយតាមច្បាប់ស្ដីពីព្រៃឈើ នៅរៀងរាល់ម៉ោងធ្វើការក្នុងរយៈពេល៣០(សាមសិប)ថ្ងៃ ដោយគិតចាប់ពីថ្ងៃចេញសេចក្តីប្រកាសជូនដំណឹងនេះតទៅ។
ករណីផុតកាលបរិច្ឆេទដូចបានកំណត់ខាងលើនៅតែពុំឃើញសាមីជនណាចូលមកដោះស្រាយទេ ខណ្ឌរដ្ឋ បាលព្រៃឈើខេត្តកំពង់ឆ្នាំង នឹងបន្តចាត់ការតាមនីតិវិធីនៃច្បាប់ស្ដីពីព្រៃឈើ ។ករណីរំលោភព្រៃទន្ទ្រានយកដីនេះដែរមានសេចក្តីរាយការថាអាជ្ញាធរខេត្តក្រោមការដឹកនាំរបស់លោកស៊ុនសុវណ្ណរិទ្ធ នឹងធ្វើការបន្តដកហូតនៅកន្លែងផ្សេងទៀត ដែលស្ថិតនៅក្នុងស្រុកទឹកផុសដែល ជាប្រភេទដីគម្របព្រៃឈើឆ្នាំ ២០០២ ហើយត្រូវបានគេរំលោភយកកន្លងមក ។
