ភ្នំពេញ ៖ លោកជំទាវឧកញ៉ា ឡេង បញ្ចពណ៌ អគ្គនាយិកាក្រុមហ៊ុន GMS Leng Navatra Cosmetics ចូលរោងការហើយខួច នៅថ្ងៃចន្ទ ទី៦ ខែធ្នូ ឆ្នាំ ២០២១ នេះ ជាមួយនឹងកូនកំលោះអ្នកជំនួញវ័យក្មេងមួយរូបនៅប្រទេសកម្ពុជា គឺលោក វ៉ន ។អាពាហ៍ពិពាហ៍ប្អូនស្រីសេដ្ឋីមានប្រវត្តិជាកម្មករមកពីកូរ៉េត្រូវបាន រៀបចំឡើងនៅភូមិកំណើត ស្ថិតនៅស្រុកបាភ្នំ ខេត្តព្រៃវែង ។
មង្គលការនេះគេឃើញមានវត្តមានឯកឧត្តមនាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ នាយករងខុទ្ទកាល័យ សម្តេចតេជោនាយករដ្ឋមន្ត្រី និងជាមេបញ្ជាការ បញ្ជាការដ្ឋានអង្គរក្ស ក៏បានផ្តល់កិត្តិយសអញ្ជើញចូលរួមក្នុងពិធីកាត់សក់បង្កក់សិរីជូនដល់ប្អូនស្រីពៅរបស់អ្នកឧកញ៉ា ឡេង ណាវ៉ាត្រា។
ក្រៅពីនេះក្នុងលាងសាយភជន៍ពិធីអាពាហ៍ពិពាហ៍ ក៏មានវត្តមានដ៏ខ្ពង់ខ្ពស់ពីសំណាក់កូនប្រុសច្បងសម្តេចតេជោ ហ៊ុន សែន គឺឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ផ្តល់ជាកិត្តិយសអញ្ជើញចូលរួមផងដែរ។
បន្ថែមលើនេះ ក៏មានវត្តមាន អភិបាលខេត្តកំពង់ស្ពឺ ត្បូងឃ្មុំ រួមនឹងអភិបាលខេត្តមួយចំនួនទៀត។ កំពូលតារាចម្រៀងល្បីៗប្រចាំផលិតកម្មហ្គាឡាក់ស៊ី ណាវ៉ាត្រា ក៏រំលេចវត្តមាននៅក្នុងមង្គលការប្អូនស្រីអ្នកឧកញ៉ា ឡេង ណាវ៉ាត្រា រួមមាន លោក ព្រាប សុវត្ថិ លោក ខេមរៈ សិរីមន្ត និងលោក ខេម ជាដើម។
តាមរយៈទំព័រហ្វេសប៊ុកផ្លូវការអ្នកឧកញ៉ា ឡេង ណាវ៉ាត្រា បានថ្លែងថា៖ “ឈើកាច់បាភ្នំអនុស្សាវរីយដ៏កម្សត់ភូមិកំណើតដ៏ជូរចត់អ្នកម្ដាយបានលាចាកលោកទៅមិនបានឃើញកូនរស់នៅក្នុងជីវភាពសមរម្យទេប្អូនស្រីពៅ ដែលជាថ្លើមប្រមាត់របស់អ្នកម៉ែបានរៀបការហើយកូនចង់ឲ្យម៉ែសប្បាយចិត្តចង់ឲ្យម៉ែឃើញកូនពៅម៉ែនៅលើភូមិដ៏កម្សត់របស់យើងណាម៉ែ”។ អ្នកឧកញ៉ា ក៏សូមទោសផងដែរ ដែលកម្មវិធីដ៏តូចនេះ មិនបានអញ្ជើញបងប្អូនចូលរួមកម្មវិធី ព្រោះធ្វើនៅស្រុកកំណើតឆ្ងាយពេក។
សម្រាប់គ្រួសារត្រកូលឡេងនេះ នៅថ្ងៃទី២០ ខែមករា ឆ្នាំ២០២១ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ទ្រង់ព្រះរាជទានផ្តល់គោរមងារ ឧកញ៉ា ដល់លោកជំទាវឧកញ៉ា ឡេង បញ្ចពណ៌ ស្រពពេលជាមួយគ្នានេះ បងបង្កើតរបស់លោកជំទាវចំនួននាក់ទៀត ក៏ទទួលបានគោរមងារដ៏ឧត្តុង្គឧត្តម គឺ លោកឧកញ៉ា ឡេង ប្រុស និងលោកឧកញ៉ា ឡេង និមល៕
