បាត់ដំបង៖ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ បានធ្វើការហាមឃាត់ដាច់ខាតមិនអនុញ្ញាតឱ្យមានការបង្កបង្កើនផលបន្តនៅក្នុងតំបន់៣ នារដូវទឹកសម្រកឬដុតបំផ្លាញព្រៃលិចទឹកនោះ ដើម្បីដុតព្រៃលិចទឹកយកដីបានទៀតទេនៅរដូវទឹកសម្រកនេះ។
លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ បានថ្លែងបែបនេះ ក្នុងពេលដែលលោក បានដឹកនាំក្រុមប្រតិភូអន្តរក្រសួង រួមជាមួយសមត្ថកិច្ចពាក់ព័ន្ធនិងអាជ្ញាធរ ដែនដីចុះពិនិត្យទីតាំងដីព្រៃលិចទឹក ដែលត្រូវបានរំលោភទន្ទ្រានកាន់កាប់កន្លងមក ក្នុងភូមិសាស្ត្រស្រុកសង្កែ និងការបើកកិច្ចប្រជុំក្រុមការងារអន្តរក្រសួង ដើម្បីចាត់វិធានការបង្ក្រាបការទន្ទ្រានដីរដ្ឋ ក្នុងដែនព្រៃលិចទឹកនៃតំបន់បឹងទន្លេសាប ស្ថិតក្នុងភូមិសាស្ត្រខេត្តបាត់ដំបង នៅសាលាខេត្តបាត់ដំបង។
លោក បានបញ្ជាក់ថា ចាប់ពីពេលនេះតទៅ ការធ្វើកិច្ចសន្យានៅលើការទិញ លក់ដូរ បញ្ចាំ នៅក្នុងធនាគារ លើដីរដ្ឋតំបន់៣ គឺត្រូវបានហាមដាច់ខាត ករណីនេះប្រគល់ទៅឱ្យអាជ្ញាធរខេត្ត ដើម្បីចេញលិខិតមួយដើម្បីឱ្យគាត់បានជ្រាបនិងអនុវត្ត ហើយការចុះបញ្ជីដីរដ្ឋគឺត្រូវផ្ទៀងផ្ទាត់និយាមការដោយជំនាញ និងចុះបញ្ជីដីរដ្ឋនៅក្នុងតំបន់៣។
លោក ជា សុផារ៉ា បានលើកឡើងថា ការអនុវត្តការគ្រប់គ្រងដីរដ្ឋក្តីឬកិច្ចការជំនាញផ្សេងៗនៅក្នុងដែនសមត្ថកិច្ចរបស់រដ្ឋបាលខេត្ត ដែលស្ថានភាពនៅពេលនេះគឺដីនៅក្នុងតំបន់៣ ត្រូវបានប្រគល់ភារកិច្ចពេញលេញជូនគណៈបញ្ជាការឯកភាពរដ្ឋបាលខេត្ត ដើម្បីដឹកនាំកិច្ចការអនុវត្ត។លោក បានបញ្ជាក់ថា អត់មានឆ្លើយដាក់មករដ្ឋបាលជលផល អាជ្ញាធរទន្លេសាប ឬអ្នកពាក់ព័ន្ធផ្សេងទៀតទេ គឺបានប្រគល់ភារកិច្ច ប្រតិភូកម្មអំណាច ដែលសមត្ថកិច្ចបានដឹងគ្រប់គ្នាហើយ ហើយត្រូវដឹកនាំគ្រប់គ្រងការអនុវត្ត ជាពិសេសមិនអាចឆ្លើយថា ដីនេះមិនទាន់បោះបង្គោល ដោយមិនទទួលខុសត្រូវ បើគ្មានសមត្ថភាព ត្រូវរកអ្នកមានសមត្ថភាព។
លោក បានណែនាំបន្ថែម ពេលធ្វើគឺធ្វើឲ្យបានជាក់លាក់ ច្បាស់លាស់ មិនអាចធ្វើហើយ ក្រោយមកត្រជាក់ល្អូក អត់បានជាដាច់ខាត ហើយត្រូវតាមដានឲ្យបានជាប់ស្អិត អត់មានពាក្យថាហត់នឿយ ឬរវល់ច្រើន មិនអាចជាដាច់ខាត ហើយកុំខ្លាចញញើត មិនហ៊ានធ្វើ បើមិនហ៊ានធ្វើទេ វិធានការនេះនឹងធ្លាក់មកលើយើងវិញ គឺយើងធ្វើទៅតាមច្បាប់ ទៅតាមបទបញ្ជារបស់រាជរដ្ឋាភិបាល។
ដោយឡែកក្នុងកិច្ចប្រជុំជាមួយមន្ត្រីពាក់ពន្ធ័នៅសាលាខេត្តបាត់ដំបង ដើម្បីដាក់វិធានការរួមគ្នាអនុវត្តឱ្យទទួលបានជោគជ័យ តាមបទបញ្ជារបស់សម្តេចនាយករដ្ឋមន្ត្រី ហ៊ុន សែន ក្រោមការដឹកនាំដោយផ្ទាល់ពីលោកឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ដោយសំណូមពរពន្លឿននីតិវិធីតុលាការឱ្យបានលឿនចំពោះរាល់សំណុំរឿងនៃការទន្ទ្រានព្រៃលិចទឹកនៅតំបន់ទន្លេសាប ក្នុងនោះត្រៀមបោះបង្គោលថ្មីកម្ពស់ ៨ម៉ែត្រចំនួ ៥២បង្គោលទៀត ដើម្បីបង្គ្រប់ ចំនួន ១១២បង្គោល និងបោះបង្គោលថ្មីតូចៗបន្ថែមទៀត ឬដាំដើមឈើនៅចន្លោះបង្គោលកម្ពស់ ៨ម៉ែត្រ ដើម្បីសម្គាល់ព្រំតំបន់៣ ហើយដើមឈើដែលត្រូវដាំមានដើមរាំង ដើមម្តេញ និងដើមសន្តាន់។
សូមបញ្ជាក់ថាបើតាមលោក តេង គឹមស៊ាន នាយករងរដ្ឋបាលខេត្តបាត់ដំបង បានរាយការណ៍ឲ្យដឹងពីដីលិចទឹកក្នុងភូមសាសស្ត្រខេត្តបាត់ដំបងថា តំបន់១: ជាតំបន់រស់នៅរបស់ប្រជាពលរដ្ឋ បានចុះបញ្ជីដីធ្លី និងបានផ្តល់ប័ណ្ណកម្មសិទ្ធិ ក្នុងចន្លោះពី៥ ទៅ៩គម គិតចេញពីផ្លូវជាតិលេខ៥ ។ តំបន់២: ជាតំបន់ដែលនៅចន្លោះរវាងតំបន់ ១និងតំបន់៣ បច្ចុប្បន្នប្រជាពលរដ្ឋបានចូលអាស្រ័យផលអស់ហើយ និងតំបន់៣ ជាតំបន់ព្រៃលិចទឹក និងហាមឃាត់ដាច់ខាត ប៉ុន្តែមានការចូលទន្ទ្រានជាបន្តបន្ទាប់ ទោះបីអាជ្ញាធរមានសមត្ថកិច្ចខិតខំចុះបង្ក្រាបនិងទប់ស្កាត់យ៉ាងណាក៏ដោយ។
លោកបានបញ្ជាក់ថា ស្រុកចំនួន ៤របស់ខេត្តបាត់ដំបង មានភូមិសាស្ត្រជាប់នឹងតំបន់បឹងទន្លេសាប ដែលបានរងនូវការកាប់ទន្ទ្រានដីព្រៃលិចទឹក មានស្រុកមោងប្ញស្សី ចំនួន ២.២១៤ហ.ត ស្រុកសង្កែ ចំនួន ៦.១១៤ហ.ត ស្រុកឯកភ្នំ ចំនួន ៣.០៥៣ហ.ត និងស្រុកថ្មគោល ចំនួន៨៣៨ហ.ត សរុបទាំងអស់ មានចំនួន ១២.២២១ហ.ត និងមានទីតាំងចំនួន ២៣ទីតាំង ទន្ទឹមនឹងនោះក៏មានការខូចខាតដោយភ្លើងឆេះព្រៃ សរុបចំនួន ២០.៩៤៧ ហ.តផងដែរ។
