ភ្នំពេញ ៖ លោកកិត្តិសេដ្ឋាបណ្ឌិត ជាម យៀប ត្រូវបានអង្គសភាពេញអង្គបោះ ឆ្នោតផ្តល់សេចក្តីទុកចិត្តជាអនុប្រធានទី១ រដ្ឋសភាហើយកាលពីថ្ងៃទី២៥ខែវិច្ឆិកា ឆ្នាំ២០២១ដោយមានសំឡេងគាំទ្រ១០៧សំឡេង ។
បន្ទាប់ពីសម្តេចអគ្គមហាពញាចក្រី ហេង សំរិន ប្រធានរដ្ឋសភា ប្រកាសទទួលស្គាល់លោកកិត្តិសេដ្ឋាបណ្ឌិត ជាម យៀបបានឡើងចាប់អារម្មណ៍ដោយ បានប្តេជ្ញាចិត្តគោរពឥតងាករេនៃច្បាប់រដ្ឋធម្មនុញ្ញ និងច្បាប់រដ្ឋដែលមានជាធរមាន ពិសេសរាល់គោលការណ៍នៃស្មារតីបទបញ្ជាផ្ទៃ ក្នុងរដ្ឋសភា និងគោរពមាគ៌ាគោលនយោបាយដ៏ត្រឹមត្រូវរបស់គណបក្សប្រជាជនកម្ពុជា និងស្មោះត្រង់ឥតងាករេចំពោះការដឹក នាំដ៏ត្រឹមត្រូវរបស់គណបក្សប្រជាជនកម្ពុជា ដោយមានការ ដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា។
លោកកិត្តិសេដ្ឋាបណ្ឌិត ជាម យៀប បានប្តេជ្ញាទៀតថា៖ គោរពអនុវត្តយ៉ាងម៉ឹងម៉ាត់នូវរាល់គោល ការណ៍រីកចំរើនក្រោមការដឹកនាំដ៏ត្រឹមត្រូវរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា។
ជលោកកិត្តិសេដ្ឋាបណ្ឌិត ជាម យៀប បានថ្លែងអំណរគុណថ្នាក់ដឹកនាំកំពូលរបស់គណបក្សប្រជាជនកម្ពុជា ដែលដឹកនាំដោយសម្តេចតេជោ ហ៊ុន សែន និងសម្តេចអគ្គមហាពញាចក្រី ហេង សំរិន ប្រធានរដ្ឋសភា ព្រមទាំងអនុប្រធានទី២ នៃរដ្ឋសភា និងអង្គប្រជុំរដ្ឋសភាទាំងមូល។
សូមបញ្ជាក់ថា៖ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជាបានស្នើលោកកិត្តិសេដ្ឋាបណ្ឌិត ជាម យៀបជាបេក្ខភាពអនុប្រធានទី១រដ្ឋសភាជំនួសលោកងួនញឹលដែលចូលមរណៈភាព.។
ក្រៅពីអនុប្រធានទី១រដ្ឋសភាសម្តេចអគ្គមហាពញាចក្រី ហេង សំរិន ប្រធានរដ្ឋសភា ក៏បានប្រកាសនូវលទ្ធផលនៃការបោះឆ្នោតជ្រើសតាំងប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម និងគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ដែលមានសមាសភាពដូចតទៅ៖១៖ លោក ឈាង វុន ត្រូវបានជាប់ឆ្នោត ជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម(ជំនួសលោកជាមយៀប)។
២៖ លោក សួស យ៉ារ៉ា ត្រូវបានជាប់ឆ្នោត ជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន(ជំនួសលោកឈៀងវុន)៣៖ លោក នឹម ច័ន្ទតារា ត្រូវបានជាប់ឆ្នោត ជាអនុប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន
៤៖ លោក ទី សុគន្ធ ត្រូវបានជាប់ឆ្នោត ជាលេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន៕
