ភ្នំពេញ៖ នៅព្រលប់ថ្ងៃទី២៥ ខែវិច្ឆិកា នេះធនាគារជាតិនៃកម្ពុជាបានប្រកាសស្វែងយល់បន្ថែមទៀតអំពីប្រភពនៃបញ្ហានេះ ហើយនឹងចាត់វិធានការតាមនីតិវិធីទាក់ទងនិងធនាគារABAគាំងប្រតិបត្តិការ។
តាមសេចក្តីជូនដំណឹង ស្តីពីបញ្ហារអាក់រអួលប្រព័ន្ធធនាគារស្នូលរបស់ធនាគារABAចុះថ្ងៃទី២៥ វិច្ឆិកានេះបានឲ្យដឹងថា ប្រព័ន្ធបច្ចេកទេសរបស់ធនាគារ ABA បានជួបបញ្ហារអាក់រអួលតាំងពីម៉ោង ៣និង០០នាទីព្រឹក រហូតមកបង្កឱ្យមានបញ្ហារអាក់រអួលនិងផលវិបាកដល់សាធារណជន ក្នុងការបើ ប្រាស់សេវាធនាគាររបស់ធនាគារ ABA។
ក្នុងសេចក្តីប្រកាសរបស់ខ្លួន ធនាគារជាតិនៃកម្ពុជា សូមក្រើនរំលឹកដល់គ្រឹះស្ថានធនាគារនិងហិរញ្ញវត្ថុទាំងអស់ត្រូវយកចិត្តទុកដាក់អនុវត្តសេចក្តីជូនដំណឹងលេខធ.៧០១៩.៥៧៥ សជណ ស្ដីពី ការដាក់ឲ្យអនុវត្តគោលការណ៍ណែនាំលើការគ្រប់គ្រងហានិភ័យព័ត៌មានវិទ្យា ចុះថ្ងៃទី២២ ខែកក្កដា ឆ្នាំ២០១៩ ដែលតម្រូវគ្រឹះស្ថាននីមួយៗត្រូវដោះស្រាយរាល់ភាពរអាក់រអួលផ្នែកបច្ចេកទេសក្នុងរយៈពេល ២ម៉ោងយ៉ាងយូរ។ ចំពោះករណីធនាគារ ABA ធនាគារជាតិនៃកម្ពុជានិងស្វែងយល់បន្ថែមទៀតអំពីប្រភពនៃបញ្ហានេះ ហើយនឹងចាត់វិធានការតាមនីតិវិធី។
ភ្នាក់ងាររបស់ធនាគារ ABA បានប្រាប់ ថា ទាក់ទងជាមួយបញ្ហាជាប់គាំង Mobile App ក្រុមហ៊ុនកំពុងធ្វើការ Updating។ ដូច្នេះអតិថិជនមិនអាចចូលប្រើប្រាស់បានទេ។ ភ្នាក់ងាររូបនេះ បាននិយាយថា «ខ្ញុំសូមបញ្ជាក់ថា ទាក់ទងជាមួយ App មិនមានបញ្ហាអីទេ ក៏មិនមានជាការ Hack អីដែរ…ព្រោះថា បញ្ហានេះគឺខាងយើងធ្វើការកែតម្រូវជាមួយ App ដើម្បីឲ្យមានភាពងាយស្រួលក្នុងការប្រើប្រាស់ជាងមុនជូនអតិថិជនរបស់យើង»។ធនាគារ ABA បានបញ្ជាក់ថា នៅម៉ោង ២រសៀល ថ្ងៃទី២៥ ខែវិច្ឆិកា ឆ្នាំ ២០២១តនេះទៅ អតិថិជននឹងអាចប្រើប្រាស់ Mobile App ជាធម្មតាវិញបាន ក្រោយក្រុមហ៊ុនធ្វើការ Updateរួច។
លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា បានបង្ហាញការយល់ឃើញថា «សម្រាប់ធនាគារវិញ គាត់ខាតសេវាច្រើនណាស់ បើសិនជាយើងគិតទៅក្នុងវិស័យធនាគារវិញ សម្រាប់ធនាគារ ABA ខ្លួនឯងហ្នឹងគាត់ខាតច្រើន ជាជាងអ្នកប្រើប្រាស់ទៀត អញ្ចឹងហើយ ខ្ញុំជឿថា ធនាគារគាត់ប្រាកដជា នឹងស្វែងរកដំណោះស្រាយ ដើម្បីកុំឲ្យបញ្ហានេះ កើតមានជាថ្មីម្ដងទៀត ៕
