ខេត្តបាត់ដំបង៖ នគរបាលការិយាល័យចរាចរណ៍ នៃស្នងការដ្ឋាននគរបាលខេត្តបាត់ដំបង គេមើលឃើញថាបានចុះពង្រឹងរិតបន្តឹងអនុវត្តច្បាប់ចរាចរណ៍ផ្លូវគោកក្រោមអនុវត្តតាមបញ្ជាផ្ទាល់របស់លោកឧត្តមសេនីយ៍ទោ ស ថេត ស្នងការនគរបាលេត្តបាត់ដំបង ក្រោយកើតនូវហេតុការណ៍គ្រោះថ្នាក់រវាងរថយន្តបែនដឹកដី បុកនិងរថយន្តសាំយ៉ុងដឹកផ្ទុកអ្នកដំណើរបណ្តាលឱ្យអ្នកស្លាប់និងរងរបួសរហូតដល់១៣ នាក់ ក្នុងភូមិសាស្ត្រស្រុកមោងប្ញស្សី ខេត្តបាត់ដំបងកាលពីកន្លងទៅថ្មីៗនេះ ។
ការចុះរិតបន្តឹងអនុវត្តច្បាប់ចរាចរណ៍បានធ្វើឡើងនៅព្រឹកថ្ងៃទី៣១ ខែសីហា ឆ្នាំ២០១៦ ស្ថិតគោលដៅចំនួន៧កន្លែង លើ កំណាត់ផ្លូវជាតិលេខ៥ និងផ្លូវជាតិលេខ៥៧ ក្នុងភូមិសាស្ត្រខេត្តបាត់ដំបង ជាពិសេសរិតបន្តឹងនៅចំណុចទីតាំង ដែលប្រឈមគ្រោះថ្នាក់ជាញឹកញាប់ធ្ងន់ជាងគេ នៅក្នុងភូមិសាស្ត្រស្រុកមោងប្ញស្សី នោះតែម្តង។
លោកវរសេនីយ៍ឯក សាធ គឹមសាន្ត នាយការិយាល័យនគរបាលចរាចរណ៍ខេត្ត ប្រាប់ឱ្យដឹងថា កិច្ចការងារអនុវត្តច្បាប់ចរាចរណ៍ផ្លូវគោក នៅខេត្តបាត់ដំបងកន្លងមក បានអនុវត្តជាប្រចាំ ហើយការចុះត្រួតពិនិត្យរបស់កម្លាំងននគរបាលចរាចរណ៍នៅពេលនេះក្នុង គោលបំណងចុះពង្រឹងច្បាប់ចរាចណ៍ផ្លូវគោកបន្ថែមទៀត ឱ្យបានម៉ឺងម៉ាត់ជាងមុន ដើម្បីការពារអាយុជីវិតបងប្អូនព្រជាពលរដ្ឋ ជាពិសេសឱ្យអ្នកបើកបរយានយន្តគ្រប់ប្រភេទ កែប្រែឥរិយាបថ នាំគ្នាចូលរួមគោរពច្បាប់ចរាចរណ៍ ឱ្យបានស៊ីជម្រៅខ្លាំងឡើង ក្នុងការចូលរួមកាត់បន្ថយអត្រាគ្រោះថ្នាក់ ដែលបណ្តាលឱ្យមនុស្សស្លាប់ និងរងរបួសជាបន្តបន្ទាប់មកនោះ ។
លោកនាយការិយាល័យបានបញ្ជាក់ទៀតថា ការចុះអនុវត្តច្បាប់ចរាចរណ៍នៅពេលនោះ នគរបាលបានត្រួតពិនិត្យ ផ្នែកបាញ់ល្បឿនរថយន្តដែលបើកបរលើសល្បឿនកំណត់ រថយន្តអត់បំពាក់ឧបករណ៍គ្រប់គ្រាន់ អ្នកបើបរថយន្តអត់ពាក់ខ្សែក្រវ៉ាត់ រថយន្តដឹកសំពីងសំពោង អ្នកបើកម៉ូតូអត់ពាក់មួកសុវត្ថិភាព ម៉ូតូអត់បំពាក់កញ្ចក់មើលក្រោយជាដើម ។ ជាលទ្ធផល ត្រួតពិន្យិរកឃើញយានយន្តល្មើស ច្បាប់សរុប១០២គ្រឿង ក្នុងនោះរថយន្ត៤០គ្រឿង ម៉ូតូ៦២គ្រឿង អប់រំអ្នកបើកបរល្មើសតិចតួចចំនួន២២នាក់ស្មើនិង២២គ្រឿង និងធ្វើការផាកពិន័យ យានយន្តតាមច្បាប់សរុបចំនួន៨០គ្រឿង។
សូមបញ្ជាក់ថា កត្តាដែលបង្កឱ្យគ្រោះថ្នាក់ចរាចរណ៍ គឺគេកត់សំគាល់មើលឃើញថា ភាគច្រើនផ្តើមឡើង ដោយអ្នកបើកយានយន្តគ្រប់ប្រភេទបើកបរល្បឿនលឿន ។ ដូចករណីគ្រោះថ្នាក់ រវាងរថយន្តបែនដឹកដី និងរថយន្តសាំយ៉ុងដឹកផ្ទុកអ្នកដំណើរនៅស្រុកមោងប្ញស្សី បណ្តាល ឱ្យអ្នកស្លាប់និងរងរបួស១៣នាក់នោះសុទ្ធតែបង្កឡើងដោយល្បឿនលឿន ប្រជែងគ្មានការប្រុងប្រយ័ត្ន ។
សូមរំលឹកដែរថា ក្រោយពីកើតឡើងគ្រោះថ្នាក់ចរាចរណ៍ រថយន្តដឹកដីបុករថយន្តសាំយ៉ុងដឹកផ្ទុក អ្នកដំណើរ នៅក្នុងភូមិសាស្ត្រស្រុកមោងប្ញស្សី កាលពីរសៀល ថ្ងៃទី២៩ ខែសីហា ឆ្នាំ២០១៦ កន្លងទៅនោះបណ្តាលឱ្យមនុស្សស្លាប់រងរបួសរួចមក។ នៅព្រឹកថ្ងៃទី៣១ ខែសីហា នេះ នៅជំនុចកើតហេតុ មានរៀបចំពិធីសាសនា និមន្តព្រះសង្ឃ៣០អង្គ និង សមត្ថកិច្ច មន្ត្រីរាជការ ប្រជាពលរដ្ឋជាង២០០នាក់ ធ្វើពិធីសូត្រមន្តបង្សកូល រាប់បាត្រ ឧទន្ទិសវិញ្ញាណក្ខន្ធ ដល់ជនរងគ្រោះបាត់បង់ជីវិត និងសូត្រមន្តដេញឩបទ្រពចង្រៃ ដែលជាអពមង្គល ចាកឆ្ងាយផុត និងសុំសេចក្តីសុខសេចក្តីចំរើនដល់ជនរួមជាតិដែលធ្វើដំណើរឆ្លងកាត់ជួបតែសុវត្ថិភាពគ្រប់ពេលវាលា៕
សំ វិច្ឆិកា