ភ្នំពេញ ៖ សេចក្តីជូនដំណឹង លេខ៣១៧២/២១ សជណ ចុះថ្ងៃទី១១ ខែវិច្ឆិកា ឆ្នាំ២០២១ របស់ក្រសួងមហាផ្ទៃ ស្តីពីការប្រើប្រាស់សន្លឹកអត្តសញ្ញាណប័ណ្ណសញ្ជាតិខ្មែរគំរូថ្មីដែលមានសញ្ញាសុវត្តិភាពពិសេស(Hologram)។ទោះជាយ៉ាងណាអត្តសញ្ញាណបណ្ណចាស់នៅបន្តប្រើរហូតដល់ផុតសុពលភាព!.។
សូមបញ្ជាក់ថានៅក្នុងកិច្ចប្រជុំតុមូលថ្នាក់រដ្ឋមន្ដ្រីស្ដីពីការអភិវឌ្ឍប្រព័ន្ធអត្រានុកូលដ្ឋានមួយដ៏រឹងមាំការបញ្ចូលបទពិសោធន៍ពីការរាតត្បាតនៃជំងឺកូវីដ ១៩ ទៅក្នុងដំណាក់កាលទី ២ នៃទសវត្សរ៍អត្រានុកូលដ្ឋាន និងស្ថិតិអត្រានុកូលដ្ឋាន កាលពីថ្ងៃទី ១៩ ខែវិច្ឆិកា តាមប្រព័ន្ធវីដេអូសម្តេចក្រឡាហោមលោក ស ខេង រដ្ឋមន្ត្រីក្រសួងមហាផ្ទៃថ្លែងថា កម្ពុជានឹងវិនិយោគលើប្រព័ន្ធចុះបញ្ជីអត្រានុកូលដ្ឋានដោយប្រព័ន្ធកុំព្យូទ័រ ដែលអាចចុះបញ្ជីតាមរយៈវេបសាយ និងបច្ចេកវិទ្យាទូរស័ព្ទ ដែលនឹងសម្រួលដល់ការផ្តល់សេវាអត្រានុកូលដ្ឋាន។លោកថ្លែងថា៖ “កម្ពុជានឹងវិនិយោគលើប្រព័ន្ធចុះបញ្ជីអត្រានុកូលដ្ឋានដោយប្រព័ន្ធកុំព្យូទ័រ ដែលអាចចុះបញ្ជីតាមរយៈវេបសាយ និងបច្ចេកវិទ្យាទូរស័ព្ទ និងកំណត់អំពីការកែសម្រួលរបៀបរបបការងារដែលនឹងសម្របសម្រួលដល់ការផ្តល់សេវា និងការចុះបញ្ជីអត្រានុកូលដ្ឋាន”។
លោក ស ខេង សរសេរក្នុងហ្វេសប៊ុក ថា ទិន្នន័យស្ថិតិអត្រានុកូលដ្ឋានគ្រប់ជ្រុងជ្រោយ និងទាន់ពេលវេលា ដែលផលិតចេញពីបញ្ជីអត្រានុកូលដ្ឋាន នឹងជួយឱ្យរាជរដ្ឋាភិបាលកម្ពុជាកំណត់គោលដៅ និងមានការឆ្លើយតបយ៉ាងមានប្រសិទ្ធភាពទៅនឹងគ្រាអាសន្ន ឬគ្រោះមហន្តរាយ។
កម្ពុជាកំពុងតែអនុវត្តនូវការផ្ដួចផ្ដើមមួយចំនួនដែលមានចែងនៅក្នុងផែនការយុទ្ធសាស្ត្រជាតិ ស្ដីពីអត្តសញ្ញាណកម្មរយៈពេល ១០ ឆ្នាំ ២០១៧-២០២៦ ក្នុងគោលបំណងជួយដល់ប្រព័ន្ធអត្រានុកូលដ្ឋាន និងស្ថិតិអត្រានុកូលដ្ឋាន៕
