ភ្នំពេញ ៖ កម្ពុជានឹងចុះត្រជាក់រហូតដល់១៥អង្សាសេនៅតំបន់ជួរភ្នំនិងខ្ពង់រាបភាគឦសាននៅសប្តាហ៍ទី៤ក្នុងខែធ្នូឆ្នាំ២០២១ដល់ខែកុម្ភៈឆ្នាំ២០២២ខណៈដែលបណ្តាខេត្ត-រាជធានីផ្សេងៗទៀត កម្រិតចុះត្រជាក់ដល់១៨អង្សាសេ។នេះបើតាមសេចក្តីជូនដំណឹងរបស់ក្រសួងធនធានតឹកនិងឧត្តុនិយម។
ក្នុងសេចក្តីប្រកាសព័ត៌មាន បានសរសេរថាៈ លក្ខណៈបែបខាងលើ ធ្វើឲ្យព្រះរាជាណាចក្រ កម្ពុជា ក្នុងរដូវរំហើយ ចាប់ពីខែធ្នូ ឆ្នាំ២០២១ ដល់ខែកុម្ភៈ ឆ្នាំ២០២២ មានស្ថានភាព ធាតុអាកាស ដូចខាងក្រោមៈធាតុអាកាស នឹងចាប់ផ្តើមចុះត្រជាក់លើកទី១ ដោយចាប់ពីសប្តាហ៍ទី១ ខែធ្នូ ដល់សប្តាហ៍ ទី៣ ខែធ្នូ ឆ្នាំ២០២១។ នៅក្នុងអំឡុងពេលចុះត្រជាក់ មានថ្ងៃខ្លះ ធាតុអាកាស អាចនឹងចុះ ត្រជាក់ ក្នុងកម្រិតពីមធ្យម ទៅបង្គួរ សម្រាប់បណ្តាខេត្ត នៅភាគខាងលើ (ជើង) ក្នុងភូមិសាស្ត្រ តំបន់ជួរភ្នំដងរែក និងខ្ពង់រាបភាគឦសាន សីតុណ្ហភាព អប្បបរមា នឹងធ្លាក់ចុះ ដល់រង្វង់ពី ១៧ អង្សាសេ ទៅ ១៩ អង្សាសេ។ សម្រាប់រាជធានី និងខេត្តដទៃទៀត សីតុណ្ហភាព អប្បបរមា ស្ថិតក្នុងរង្វង់ពី ១៩ អង្សាសេ ទៅ ២១ អង្សាសេ។ ធាតុអាកាស ចុះត្រជាក់ លើកទី២ ដោយចាប់ពីសប្តាហ៍ទី៤ ខែធ្នូ ឆ្នាំ២០២១ ដល់ខែកុម្ភៈ ឆ្នាំ២០២២ ។
ក្នុងអំឡុងចុះត្រជាក់ មានថ្ងៃខ្លះ ធាតុអាកាស អាចនឹងចុះត្រជាក់ ដល់កម្រិតពីមធ្យម ទៅបង្គួរ ជាប់ៗគ្នា ច្រើនថ្ងៃ ដូចជា បណ្តាខេត្ត នៅភាគខាងលើ (ជើង) ក្នុងភូមិសាស្ត្រ ជាប់តំបន់ភ្នំ និងតំបន់ខ្ពង់រាបភាគឦសាន សីតុណ្ហភាព អប្បបរមា អាចចុះមកនៅក្នុងរង្វង់ពី ១៥ អង្សាសេ ទៅ ១៧ អង្សាសេ។ សម្រាប់រាជធានី និងខេត្តដទៃទៀត សីតុណ្ហភាព អប្បបរមា ស្ថិតក្នុងរង្វង់ពី ១៨ អង្សាសេ ទៅ ២០ អង្សាសេ។ក្រសួងធនធានទឹក និងឧតុនិយម បានសរសេរទៀតថាៈ ខ្លួនកំពុងបន្តតាមដាន យ៉ាងយកចិត្ត ទុកដាក់ លើបាតុភូតធម្មជាតិនេះ ហើយនឹងជម្រាបជូនព័ត៌មាន ជាបន្តបន្ទាប់ទៀត ក្នុងករណីអាកាសធាតុ មានការប្រែប្រួល សូមជ្រាបជាដំណឹង។ចឹងទេប្រជាពលរដ្ឋត្រូវរកអាវក្រាស់ៗពាក់ការពារផងទៅព្រោះកូវីតមិនទាន់អស់ឡើយទេ!៕
