អារ៉ាប់រួម៖ ព្រះរាជាណាចក្រកម្ពុជា ទទួលបានសិទ្ធិធ្វើជាម្ចាស់ផ្ទះ នៃការប្រកួតកីឡាយុវជនអាស៊ី នាឆ្នាំ២០២៩ ជាផ្លូវការហើយដោយទទួលបានការអបអរសាទរពីបណ្តាប្រទេសដែលចូលរួមទាំងអស់។
លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) និងលោក ឃួង ស្រេង អភិបាលនៃគណៈអភិបាលរាជធានីភ្នំពេញ បានចុះហត្ថលេខាទទួលសិទ្ធិជាផ្លូវការ នៅទីក្រុងឌូបៃ ប្រទេសអារ៉ាប់រួម នៅល្ងាចថ្ងៃអាទិត្យ ទី២១ ខែវិច្ឆិកា ឆ្នាំ២០២១។
លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ គណៈកម្មាធិការជាតិអូឡាំពិកកម្ពុជា នៅក្នុងពេលដែលដំណើរការសន្និបាតក្រុមប្រឹក្សាកីឡាអូឡាំពិកអាស៊ី និងពិធីចុះហត្ថលេខាជាផ្លូវការបានបញ្ជាក់ថា «កម្ពុជាពិតជាមានមោទនភាពចំពោះការទទួលបានសិទ្ធិជាផ្លូវការធ្វើជាម្ចាស់ផ្ទះ ការប្រកួតកីឡាយុវជនអាស៊ី លើកទី៥ ឆ្នាំ២០២៩ ដោយជោគជ័យ នៅក្នុងសន្និបាតក្រុមប្រឹក្សាកីឡាអូឡាំពិកអាស៊ី នៅទីក្រុងឌូបៃ ប្រទេសអារ៉ាប់រួម នាពេលនេះ។ តំណាងប្រទេសទាំងអស់នៃទ្វីបអាស៊ី៤៥ប្រទេសបានអបអរសាទរជូនចំពោះ ព្រះរាជាណាចក្រកម្ពុជា ដែលទទួលបានសិទ្ធិធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ២០២៩ ជាមួយនឹងការមើលឃើញពីការរីកចម្រើនខាងផ្នែកកីឡា ក៏ដូចជាការអភិវឌ្ឍ និងសន្តិភាពរបស់កម្ពុជា»។
លោក វ៉ាត់ ចំរើន មានប្រសាសន៍បន្ថែមទៀតថាកម្ពុជានឹងមានបណ្តាប្រទេសនានានឹងចូលរួមជួយដល់ការរៀបចំការប្រកួតកីឡាយុវជនអាស៊ីរបស់ម្ចាស់ផ្ទះ កម្ពុជាយើងផងដែរ។ ដូច្នេះមោទនភាពនេះគឺបានកើតមានឡើងក្រោមចក្ខុវិស័យប្រកបដោយគតិបណ្ឌិតដ៏ខ្ពង់ខ្ពស់បំផុតរបស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានអនុញ្ញាតឲ្យគណៈប្រតិភូកម្ពុជាមកចូលរួមចុះហត្ថលេខាទទួលសិទ្ធិធ្វើជាម្ចាស់ផ្ទះកីឡាយុវជនជាប្រវត្តិសាស្ត្រប្រចាំអាស៊ីមួយនេះ។
នេះជាសំណាងរបស់យុវជនរបស់កម្ពុជាយើង និងជាសំណាងរបស់ប្រទេសកម្ពុជាយើង ដែលទទួលបាននូវកិត្តិយស កិត្យានុភាពជាតិ ពេញមុខ ពេញមាត់ ពេញសមត្ថភាពនៅលើឆាកអន្តរជាតិ។ ប្រព័ន្ធផ្សព្វផ្សាយជាតិប្រទេសអារ៉ាប់ទាំងអស់ និងបណ្តាយផ្សព្វផ្យាយអន្តរជាតិបានចូលរួមផ្តិតយករូបភាពពីពិធីចុះហត្ថលេខានេះទៅផ្សព្វផ្សាយទូទាំងពិភពលោក។
ក្នុងនាមគណៈប្រតិភូកម្ពុជា ក្នុងបេសកកម្មអន្តរជាតិនេះ លោក វ៉ាត់ ចំរើន សូមថ្លែងអំណរគុណដ៏ជ្រាលជ្រៅបំផុតជូនរាជរដ្ឋាភិបាលកម្ពុជា និងប្រជាពលរដ្ឋកម្ពុជាទាំងអស់ ដែលបានគាំទ្រដល់វិស័យកីឡាជានិច្ច ព្រមជាមួយនឹងការរួមចំណែកកសាងអភិវឌ្ឍសេដ្ឋកិច្ចសង្គមកម្ពុជាយើងទាំងមូល។
