ប្រទេសថៃ៖ សភាជាតិប្រទេសថៃ នៅថ្ងៃពុធនេះ បានច្រានចោលសេចក្ដីព្រាងច្បាប់ថ្មីមួយដែលមានគោលដៅកាត់បន្ថយអំណាច និងតួនាទីរបស់យោធាថៃ នៅក្នុងឆាកនយោបាយ។
ទីភ្នាក់ងារសារព័ត៌មាន Reuters នៅថ្ងៃពុធ ទី១៧ ខែវិច្ឆិកា ឆ្នាំ២០២១បានផ្សាយឲ្យដឹងថា៖ការច្រានចោលខាងលើ ធ្វើឡើងនៅក្នុងសម័យប្រជុំរួមមួយរបស់សភាជាន់ទាប និងព្រឹទ្ធសភាថៃ ដែលបានបោះឆ្នោតជំទាស់នឹងសេចក្ដីព្រាងច្បាប់នេះក្នុងសំឡេងជំទាស់ ៤៧៣ ទល់នឹង ២០៦សំឡេងគាំទ្រ និងអនុប្បវាទ ៦សំឡេង។
សេចក្ដីព្រាងច្បាប់នេះ គឺមានគោលដៅកាត់បន្ថយអំណាច និងតួនាទីរបស់ យោធាថៃ នៅក្នុងឆាកនយោបាយ តាមរយៈការធ្វើវិសោធនកម្មរដ្ឋធម្មនុញ្ញដែលត្រូវបានអនុម័តនៅក្រោមការដឹកនាំនៃរបបយោធាកាលពីឆ្នាំ២០១៧។
ប្រសិនបើពិនិត្យលើទិដ្ឋភាពច្បាប់លោកប្រាយុទ្ធនៅតែមានកម្លាំងក្នុងការគ្រប់គ្រងគណបក្សចំរុះក្នុងរដ្ឋាភិបាលតាមរយៈផ្តល់ផលប្រយោជន៍អ្វីតាមជាក់ស្តែងនៃស្ថានភាពនយោបាយស្រុកថៃ។ព្រោះគណបក្សប្រឆាំងពិសេសគណបក្សភឿថៃមិនអាចប្រមូលកម្លាំងបង្ក្រាបលោកប្រាយុទ្ធបានឡើយ។
គួរបញ្ជាក់ថា សេចក្ដីព្រាងច្បាប់ថ្មីខាងលើដែលទទួលបានការគាំទ្រពីអ្នកដាក់ញ្ញតិចំនួន ១៣០,០០០នាក់ ក៏មានបំណងលុបចោលអាសនៈសមាជិកព្រឹទ្ធសភា តែងតាំងដោយយោធាថៃ ចំនួន ២៥០រូបផងដែរ។ ប្រទេសថៃធ្លាប់បានឆ្លងកាត់ការធ្វើវិសោធនកម្មចំនួន ២០លើក និងរដ្ឋប្រហារ ១៣លើករួចមកហើយ គិតចាប់តាំងពីឆ្នាំ១៩៣២មក៕
