អាមេរិកចិន៖ ជំនួបតាមប្រព័ន្ធវីដេអូប្រមាណជាង ៣ម៉ោង នៅថ្ងៃអង្គារ៍ទី១៦វិច្ឆិកា (ម៉ោងនៅទីក្រុងប៉េកាំង) ប្រធានាធិបតីអាមេរិក លោក ចូ បៃដិន និងប្រធានាធិបតីចិន លោក ស៉ី ជិនពីង បានសន្យាថាមានទំនាស់គ្នាតែនឹងមិនឲ្យកើតសង្គ្រាមឡើយ! ។
សារព័ត៌មានចិន CNA នៅរសៀលថ្ងៃអង្គារ ទី១៦ ខែវិច្ឆិកា ឆ្នាំ២០២១បានឲ្យដឹងថា៖។ក្រោយជំនួបខាងលើ សេតវិមានអាមេរិកបានចេញសេចក្តីថ្លែងការណ៍យ៉ាងដូច្នេះថា «លោកប្រធានាធិបតី ចូ បៃដិន បានលើកឡើងនូវក្តីបារម្ភ អំពីបញ្ហាសិទ្ធិមនុស្សនៅតំបន់ស៉ីនជាំង, តំបន់ទីបេ, និងទីក្រុងហុងកុង ហើយលោកថែមទាំងបានប្រាប់លោក ស៉ី ជិនពីង ថា សហរដ្ឋអាមេរិកនៅតែគោរព គោលនយោបាយចិនតែមួយ ទាក់ទងនឹងតៃវ៉ាន់»។ ក្រៅពីនេះ មេដឹកនាំទាំងពីរ ក៏បានសន្យាធ្វើការជាមួយគ្នា លើបញ្ហាផ្នែកថាមពល និងអាកាសធាតុផងដែរ។
ដោយឡែក បើតាមប្រព័ន្ធផ្សព្វផ្សាយចិន ពាក់ព័ន្ធនឹងលទ្ធផលនៃជំនួបដដែល លោក ស៊ី ជិនពីង បានបញ្ជាក់ប្រាប់ លោក ចូ បៃដិន វិញថា៖ ប្រទេសចិននឹងចាំបាច់ត្រូវចាត់វិធានការម៉ឺងម៉ាត់ ប្រសិនបើចលនាទាមទារឯករាជ្យរបស់តៃវ៉ាន់ ហ៊ានឈានជើងផ្លោះរំលងខ្សែបន្ទាត់ក្រហម។ លោក ស៊ី បានសង្កត់ធ្ងន់ប្រាប់លោក បៃដិន ថា ការគាំទ្ររបស់អាមេរិក ចំពោះចលនាឯករាជ្យតៃវ៉ាន់ នឹងប្រៀបដូចជាការប្រលែងលេងជាមួយភ្លើងយ៉ាងដូច្នោះ។តាមសេតវិមាន លោកប្រធានាធិបតី ចូ បៃដិន បាននិយាយប្រាប់ប្រធានាធិបតីចិនថា អាមេរិកប្រឆាំងដាច់ខាតរាល់ការប្រឹងប្រែងជាឯកតោភាគី ដើម្បី ផ្លាស់ប្តូរ Statut quo ឬការប៉ុនប៉ងទាំងឡាយណាដើម្បី បំផ្លាញសន្តិភាព និងស្ថិរភាពនៅច្រកសមុទ្រតៃវ៉ាន់។
នៅត្រង់ចំណុចនេះ ប្រធានាធិបតីអាមេរិកបានអំពាវនាវឲ្យគេគោរពStatut quo ពោលគឺបច្ចុប្បន្នយ៉ាងម៉េច ទុកឲ្យវានៅដូច្នេះដដែល។ សាររបស់អាមេរិកមានន័យសម្រាប់ទាំងចិន និងតៃវ៉ាន់ ព្រោះថា ទៅតាមStatut quo អាមេរិកគោរពគោលការណ៍ ចិនតែមួយ ហើយ ក៏មិនគាំទ្រឲ្យតៃវ៉ាន់ប្រកាសឯករាជ្យភាព។ ប៉ុន្តែ បើសិនតៃវ៉ាន់រងការវាយប្រហារឈ្លានពាន នោះ អាមេរិកនឹងចេញមុខការពារ តៃវ៉ាន់ ទៅតាមច្បាប់ Taiwan relation act។ ច្បាប់ ដែលអាមេរិកបានបង្កើតឡើង នៅឆ្នាំ ១៩៧៩ នៅក្រោយអាមេរិក ត្រលប់ទៅទទួលស្គាល់ រដ្ឋាភិបាលសាធារណរដ្ឋប្រជាមានិតចិន (ចិនដីគោក) ហើយទទួលស្គាល់ថា តៃវ៉ាន់គឺជាផ្នែកមួយនៃប្រទេសចិន មិនមែនជារដ្ឋឯករាជ្យ(នយោបាយចិនមួយ)។
ទោះបីយ៉ាងណា មេដឹកនាំនៃប្រទេសមហាអំណាចទាំងពីរ ក៏បានលើកឡើងពីភាពទទួលខុសត្រូវរៀងៗខ្លួន សម្រាប់ពិភពលោក ដើម្បីបញ្ចៀសសង្គ្រាម។ លោក ចូ បៃដិន បានថ្លែងយ៉ាងដូច្នេះថា «សម្រាប់លោក ក្នុងនាមជាមេដឹកនាំចិន និងសហរដ្ឋអាមេរិក គឺត្រូវធានាឲ្យបានថា ការប្រកួតប្រជែងរវាងប្រទេសយើង នឹងមិនប្រែក្លាយទៅជាការផ្ទុះសង្គ្រាមឡើយ»។ ចំណែក លោក ស៊ីវិញ បានថ្លែងថា «ក្នុងនាមជាមហាអំណាច សេដ្ឋកិច្ចធំបំផុតទាំងពីររបស់ពិភពលោក នឹងជាសមាជិកអចិន្ត្រៃយ៍ នៃក្រុមប្រឹក្សាសន្តិសុខអង្គការសហប្រជាជាតិ (UNSC) ប្រទេសចិន និងសហរដ្ឋអាមេរិក ចាំបាច់ត្រូវបង្កើនការទំនាក់ទំនង និងកិច្ចសហប្រតិបត្តិការជាមួយគ្នាបន្ថែមទៀត»៕