បាត់ដំបង ៖ កាំភ្លើងជាង១០ ដើមទៀត ត្រូវបានសមត្ថកិច្ច រកឃើញជាបន្តបន្ទាប់ ដែលបានលាក់ទុក នៅចំណុចចំការមៀន ស្ថិតក្នុងក្រុមទី២ ភូមិអូររំដួល ឃុំអូររំដួល ស្រុកភ្នំព្រឹក ខេត្តបាត់ដំបង បន្ទាប់ពី ប្រជាពលរដ្ឋប្រទះឃើញ កាលពីថ្ងៃទី១២ ខែវិច្ឆិកា ឆ្នាំ២០២១។
ករណីយ៍នេះ លោកឧត្តមសេនីយ៍ឯក ឆាយ គឹមខឿនអ្នកនាំពាក្យ អគ្គស្នងការដ្ឋាន នគរបាលជាតិ បានប្រាប់កាសែតថាៈ “ រហូតមកដល់ពេលនេះ (ទី១៦វិច្ឆិកា)យើងបានរកឃើញ កាំភ្លើងចំនួន ៥៣ ដើមហើយ និងកំពុងស្ថិតនៅក្នុងការបន្តស្រាវជ្រាវ”។ទាក់ទងករណីកាំភ្លើងអនាមិកនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យសមត្ថកិច្ចស្រាវជ្រាវរកឲ្យឃើញម្ចាស់កាំភ្លើងជាង ៣០ ដើម ដែលបានលាក់ទុក នៅចំណុចចំការមៀន ស្ថិតក្នុងក្រុមទី២ ភូមិអូររំដួល ឃុំអូររំដួល ស្រុកភ្នំព្រឹក ខេត្តបាត់ដំបង ហើយដែលត្រូវបាន ប្រជាពលរដ្ឋប្រទះឃើញ កាលពីរសៀល ថ្ងៃទី១២ ខែវិច្ឆិកា ឆ្នាំ២០២១។
នាយឧត្តមសេនីយ៍ សន្តិបណ្ឌិត ខៀវ សុភ័គអ្នកនាំពាក្យបាន បញ្ជាក់ថាៈ “អ្វីដែលយើងគិត រូបភាពទី១. អាចជាការរត់ពន្ធអាវុធ ពីយើងទៅភូមា ពីព្រោះសព្វថ្ងៃនេះ ភូមាត្រូវការអាវុធ ដើម្បីធ្វើសឹកសង្គ្រាម។ ទី២. អាចពាក់ព័ន្ធទៅនឹងចលនា ពួកឧទ្ទាម នៅក្នុងស្រុកយើង យកអាវុធលាក់ទុកដើម្បីរង់ចាំផ្ទុះអាវុធ ប៉ុន្តែលទ្ធភាពនឹងដូចជា តិចទេ និងទី៣. យើងអាចគិតថា ចោរប្លន់ប្រដាប់អាវុធ។ ប៉ុន្តែរូបភាពទាំងអស់នេះ យើងគិតថា រូបភាពទី១ ច្រើនជាង (អាចជាការរត់ពន្ធអាវុធ ពីយើងទៅភូមា) ”។
តាមសេចក្តីរាយការណ៍របស់ ប្រជាពលរដ្ឋ កាលពីថ្ងៃទី១២ ខែវិច្ឆិកា ឆ្នាំ២០២១ សមត្ថកិច្ច បានទៅរកឃើញ កាំភ្លើងចំនួន ៣៣ ដើម ប្រភេទ AK ស្វ័យ ៣០ដើម និងអាវុធ M79 ចំនួន ៣ ដើម រួមទាំងបង់ចំនួន ៤០ បង់ ហើយបានយកអាវុធទាំងអស់ មករក្សាទុកនៅអធិការដ្ឋាន នគរបាលស្រុកភ្នំព្រឹក ហើយកំពុងតែត្រួតពិនិត្យ ដើម្បីរកតម្រុយ ក្នុងការស្រាវជ្រាវ រកប្រភពអាវុធ ។
