កំពង់ធំ៖ មន្ដ្រីសាលាស្រុកសណ្ដាន់ ១រូបត្រូវបានគេនិយាយថា បានយកតួនាទីរបស់ខ្លួនជាមន្ដ្រីរដ្ឋបាលសាលាស្រុកសណ្ដាន់ ទៅរកស៊ីដឹកជញ្ជូនឈើយ៉ាងសកម្ម តែគ្មានសមត្ថកិច្ចជំនាញបង្ក្រាបឡើយ។
លោក តាន់ ផាន់នីមន្ត្រីសង្កាត់រដ្ឋបាលព្រៃឈើសណ្ដាន់ បានឲ្យដឹងថាលោក លន ចាន់ថា គឺដឹកគ្មានច្បាប់ទម្លាប់នោះទេ។បើតាមអ្នកឃ្លាំមើលបទល្មើសព្រៃឈើនិយាយថា បទល្មើសដឹកឈើរបស់លោក លន ចាន់ថា ដឹកចេញពីច្រកតោល៩៩ ក្នុងភូមិសាស្ត្រឃុំមានរិទ្ធ ស្រុកសណ្តាន់ ដឹកជញ្ជូនឆ្ពោះទៅភូមិតាអោក ក្នុងទឹកដីស្រុកប្រាសាទសំបូរ ខេត្តកំពង់ធំវិញ។
ការដឹកជញ្ជូនឈើរបស់លោក លន ចាន់ថា តាមគោយន្ត ចេញពីច្រកតោល ឃុំមានរិទ្ធ ដោយមានអ្នកបើកដៃ និងមានមន្ត្រីមួយចំនួនទៀតដែលគាំទ្រ និងផ្សំគំនិតឲ្យលោក លន ចាន់ថា ដឹកបទល្មើសព្រៃឈើយ៉ាងរលូន។អ្នកឃ្លាំមើលបទល្មើសព្រៃឈើ និងពលរដ្ឋសុំណូមពរ លោក ងួន រតនៈ អភិបាលខេត្តកំពង់ធំ ចាត់វិធានការទៅលើបុគ្គលឈ្មោះ លន ចាន់ថា ដែលបានរងការចោទប្រកាន់ថាធ្វើទង្វើមិនប្រក្រតីនោះ។
រឿងនេះ លោក លន ចាន់ថា ប្រាប់កាសែតថា រូបលោកបានទិញឈើពីពលរដ្ឋនៅក្នុងឃុំ មានរិទ្ធ ជាលក្ខណៈគ្រួសារ ហើយលោកមិនមែនជាអ្នកកាងឈើនោះទេ គឺលោកជាអ្នកទិញ និងជាអ្នកលក់បន្តទៅឲ្យអ្នកភូមិធ្វើផ្ទះតើ!។
