ភ្នំពេញ៖ នារសៀលថ្ងៃទី១៥ ខែវិច្ឆិកា ឆ្នាំ២០២១នេះ នៅទីស្ដីការក្រសួងកសិកម្ម រុក្ខាប្រមាញ់ និងនេសាទ លោក ហ៊ាន វណ្ណហន រដ្ឋលេខាធិការ បានទទួលជួបកញ្ញា ស៊ូវណ្ណា ហ្គោនឡែត នាយិការប្រតិបត្តិនៃអង្គការសម្ព័ន្ធមិត្តសត្វព្រៃ និងបានចុះហត្ថលេខាលើកិច្ចព្រមព្រៀងអនុវត្តគម្រោងរវាងក្រសួងកសិកម្ម រុក្ខាប្រមាញ់ និងនេសាទ នៃព្រះរាជាណាចក្រកម្ពុជា ជាមួយអង្គការសម្ព័ន្ធមិត្តសត្វព្រៃ ស្តីពី “កម្មវិធីសង្គ្រោះ និងថែរក្សាសត្វព្រៃ” (Wildlife Alliance)។
លោក ហ៊ាន វណ្ណហន បានឱ្យដឹងថា កិច្ចសហប្រតិបត្តិរវាងអង្គការសម្ព័ន្ធមិត្តសត្វព្រៃ (Wildlife Alliance) និងក្រសួងកសិកម្ម រុក្ខាប្រមាញ់ និងនេសាទ ចាប់ពីឆ្នាំ២០០១-២០២១ បានអនុវត្តគម្រោងប្រកបដោយជោគជ័យគួរឱ្យគត់សម្គាល់ ក្រោមការដឹកនាំរបស់ កញ្ញា ស៊ូវណ្ណា ហ្គោនឡែត ដែលបានអនុវត្តគម្រោងស្ដីពី “កម្មវិធីសង្គ្រោះ និងថែរក្សាសត្វព្រៃ”។ ក្នុងកំឡុងពេលអនុវត្តគម្រោង (២០០១ ដល់ ២០២១) អង្គការ បានប្រើប្រាស់ថវិកាសរុបចំនួន ១៩,១៤៦,០០០ ដុល្លាអាមេរិក។
លោក ហ៊ាន វណ្ណហន បានឱ្យដឹងទៀតថា បច្ចុប្បន្នអង្គការសម្ព័ន្ធមិត្តសត្វព្រៃ ក៏នៅតែបន្តកិច្ចសហប្រតិបត្តិការជាមួយរាជរដ្ឋាភិបាលកម្ពុជាដដែល លើការអនុវត្តគម្រោងស្ដីពី “កម្មវិធីសង្គ្រោះ និងថែរក្សាសត្វព្រៃ” ដែលមានទីតាំងអនុវត្តគម្រោង គឺមជ្ឈមណ្ឌលសង្គ្រោះសត្វព្រៃភ្នំតាម៉ៅ និងគ្រប់ខេត្ត-ក្រុងទាំងអស់ នៃព្រះរាជាណាចក្រកម្ពុជា ដែលមានថវិកាសរុបចំនួន ២,៨២៣,៤០០ ដុល្លារអាមេរិច សម្រាប់ឆ្នាំ២០២២ រហូតដល់ ឆ្នាំ២០២៤។សូមចូលរួមសហការ ការពារសត្វព្រៃទាំងអស់គ្នា ដោយ ខល់មកលេខ 012 500 094 (Hot line)
