បន្ទាយមានជ័យ ៖ មនុស្សយ៉ាងហោច៧នាក់បានស្លាប់ដោយពុលអាលកុលនៅមណ្ឌលចត្តាឡីសក័នៅភូមិកូបធំក្រុងប៉ោយប៉ែតខេត្តបន្ទាយមានជ័យកាលពីថ្ងៃទី១១ខែវិច្ឆិកា២០២១ ។
ហេតុការណ៍ ពលករពុលអាលកុលនោះ បានធ្វើឲ្យពលករ យ៉ាងហោច៧នាក់ស្លាប់ ក្នុងនោះម្នាក់ជាស្រី សរុបអ្នកពុល ចំនួន២៥នាក់ ជាពលករធើ្វចំណាកស្រុក មកពីប្រទេសថៃ ។អ្នកឃើញហេតុការណ៍ជាក់ស្តែងបាន ឲ្យដឹងថា÷ ពួកគាត់មកពីថៃ សរុប១០នាក់ ពេលមកដល់ មណ្ឌលធើ្វចត្តាឡីស័កកូបធំ បាន១៤ថ្ងៃ ស្រាប់តែ ឃើញក្រុមយុវជន ដែលជាពលករ ជាប់ឃុំខ្លួន ក្នុងមណ្ឌលនាំគ្នាជួបជុំផឹកស្រាស ហេតុការណ៍ផឹកស្រាសនោះ កើតមានតាំងពីថ្ងៃទី០៨វិច្ឆិកាមកម្លេះ ។
ក្រោយមកត្រូវមន្ត្រី សន្តិសុខដឹងហើយហាម មិនឲ្យមានអ្នកលក់ដូរស្រា ឬ បៀរនោះទេ តែមិនដឹងយ៉ាងម៉េច ស្រាប់តែថ្ងៃទី០៩វិច្ឆិកា២០២១នេះ ក្រុមអ្នកញៀនស្រា បានទិញទឹក អាលកុល មកច្នៃ លាយជាមួយទឹក ស្អាត នាំគ្នាហូបជួបជុំ ។ស្ត្រីដែលឃើញហេតុការនោះ បានឲ្យដឹងទៀតថា ក្រុមខ្លះលាយ អាលកុលជាមួយ និងទឹក ស្អាត ខ្លះទៀតលាយ ជាមួយទឹកក្រូច ពណ៌ក្រហមនិង ភេសជ្ជៈ ស្ទីងជាដើម ។ គាត់ថាអ្នកដែល ស្លាប់អាចផឹកច្រើន និងមិនហូបអាហារទ្រាប់ពោះ ចំណែកអ្នក ពុលស្រាលៗ អាចផឹកតិច ។ ស្ត្រីដដែលបានបន្តថា បើតាមគាត់ដឹង គឺ ស្លាប់៦នាក់មានម្នាក់ស្រី ពុលសរុប២១នាក់ ក្នុងចំណោមអ្នកផឹកនោះ ។
ពលករខ្មែរដែលស្នាក់នៅ ធ្វើចត្តាឡីស័ក ក្នុងមណ្ឌល កូបធំស្នើឲ្យអាជ្ញាធរ រឹតបណ្តឹង កុំឲ្យមានមនុស្សផឹកស៊ីលេងល្បែង ក្នុងមណ្ឌលតទៅទៀត ជាមួយគ្នានេះសូម ឲ្យអាជ្ញាធរដោះស្រាយបញ្ហា ប្រឈមនានា ដូចជា កង្ហារ បាយទឹកឲ្យបាន គ្រប់គ្រាន់ផង ។លោក ឱក ទីណា ប្រធានពេទ្យបង្អែក ក្រុងប៉ោយប៉ែត នៅព្រឹកថ្ងៃទី១២វិច្ឆិកា២០២១នេះ មិនអាចសុំឲ្យលោកធើ្វការ អធិប្បាយជុំវិញហេតុការបង្កឲ្យពុល មនុស្សស្លាប់នោះបានទេ ព្រោះទូរស័ព្ទតេចូលច្រើនដង គ្មានអ្នកទទួល ។
ទាក់ទិននឹងករណីនេះ លោក រឿន សុធី អនុប្រធានមន្ទីរសុខាភិបាល និងជាអ្នកនាំពាក្យ មន្ទីរសុខាភិបាលខេត្តបន្ទាយមានជ័យ បានឱ្យកាសែតដឹងថា ជនរងគ្រោះដែលបានពុលមានចំនួន ២៥នាក់ មានរោគសញ្ញា ក្នុងនោះមកទល់ពេលនេះ អ្នកពុលបានស្លាប់កើនដល់ចំនួន៧នាក់ហើយ គិតត្រឹមម៉ោង៩ព្រឹក ថ្ងៃទី១២ ខែវិច្ឆិកា ឆ្នាំ២០២១។ ចំពោះហេតុការណ៍កើតតាំងពី ថ្ងៃទី១១ ខែវិច្ឆិកា ឆ្នាំ២០២១ ប្រហែលជាម៉ោង២រសៀលមកម្លេះ។
លោក ឡេ ចាន់សង្វាត ប្រធានមន្ទីរសុខាភិបាលខេត្តបន្ទាយមានជ័យ ប្រាប់ថាជាប់រវល់ខ្លាំង គ្មានពេលជួប អ្នកសារព័ត៌មានទេ ។
យ៉ាងណាក៏ដោយ ពាក់ព័ន្ធករណីពុលអាហារ លើពលរដ្ឋ ដែលស្នាក់នៅធ្វើចត្តាឡីស័ក នៅខេត្តបន្ទាយមានជ័យ នេះគឺកើតឡើង ញឹកញាប់ហើយដែរ ៕
