ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានទទួលជួបពិភាក្សាជាមួយ លោកស្រី ម៉ារីស ផេន ( Marise PAYNE ) រដ្ឋមន្ត្រីការបរទេស និងកិច្ចការនារី នៃប្រទេសអូស្ត្រាលី នៅវិមានសន្តិភាព នាព្រឹកថ្ងៃទី០៨ ខែវិច្ឆិកា ឆ្នាំ២០២១នេះក្នុងឱកាសមកបំពេញទស្សនៈកិច្ចនៅកម្ពុជា ។
លោក អ៊ាង សុផល្លែត ជំនួយការសម្តេចតេជោ ហ៊ុន សែន បានឱ្យដឹងថា៖ លោកស្រី ម៉ារីស ផេន បានជម្រាបសម្តេចតេជោ ហ៊ុន សែន ថា លោកស្រី បានមកកាន់ព្រះរាជាណាចក្រកម្ពុជាពីរលើកកន្លងមកហើយ គឺលើកទី១ នៅឆ្នាំ២០០២ និងលើកទី២ នៅឆ្នាំ២០០៥លោកស្រី បានសង្កេតឃើញថា កម្ពុជាមានការអភិវឌ្ឍយ៉ាងខ្លាំង ដោយបានគោរព និងអបអរសាទរយ៉ាងខ្លាំងចំពោះសម្ដេចតេជោ ហ៊ុន សែន ក្នុងការអភិវឌ្ឍប្រទេស។
លោកស្រី ម៉ារីស ផេន ( Marise PAYNE )ក៏បានគោរពវាយតម្លៃខ្ពស់ចំពោះវិធានការ នៃការទប់ស្កាត់ការរាលដាលជំងឺកូវីដ១៩ របស់រាជរដ្ឋាភិបាលកម្ពុជា តាមរយៈការចាក់ស្រោចវ៉ាក់សាំងដល់ប្រជាពលរដ្ឋ និងការចាប់ផ្ដើមឲ្យសិស្សចូលរៀនឡើងវិញ ហើយបើកប្រទេសឲ្យប្រជាពលរដ្ឋរស់នៅតាមបែបគន្លងថ្មី។
លោកស្រី ក៏បានបង្ហាញនូវការរីករាយចំពោះកិច្ចសហប្រតិបត្តិការជាមួយកម្ពុជាទាំងទ្វេរភាគី និងក្របខ័ណ្ឌពហុភាគី ។ នៅក្នុងទ្វេរភាគី លោកស្រី បានបង្ហាញការសប្បាយរីករាយដែលបានទទួលផ្លែការអំពីកិច្ចសហប្រតិបត្តិការផ្នែកកសិកម្ម វិស័យយោធា វិស័យអប់រំនិងការប្រយុទ្ធប្រឆាំងជំងឺកូវីដ១៩ ។
លោកស្រី ក៏បានគោរពជម្រាបជូនសម្ដេចតេជោ ហ៊ុន សែន ថា រដ្ឋាភិបាលអូស្ត្រាលី បានសម្រេចផ្ដល់ជូនកម្ពុជានូវវ៉ាក់សាំងប្រឆាំងជំងឺកូវីដ១៩ ចំនួន ៣លាន ២សែន ៥ម៉ឺនដូស។ ក្នុងនោះ ចំនួន១លានដូស នឹងផ្ដល់ជូនកម្ពុជានៅបំណាច់ឆ្នាំ២០២១នេះ។
នៅក្នុងក្របខ័ណ្ឌពហុភាគី លោកស្រី ក៏បានសម្ដែងនូវអំណរសាទរចំពោះកម្ពុជា ដែលបានទទួលធ្វើជាប្រធានអាស៊ាន ហើយលោកស្រី ក៏បានបង្ហាញនូវការពេញចិត្តចំពោះកិច្ចសហប្រតិបត្តិការរវាងអាស៊ាន និងអូស្ត្រាលី ហើយលោកស្រី ក៏បានគោរពជម្រាបជូនសម្ដេចតេជោផងដែរថា អូស្ត្រាលី នឹងជួយកម្ពុជាធ្វើយ៉ាងណា ឱ្យកម្ពុជាក្នុងនាមជាប្រធានអាស៊ាន ទទួលបានជោគជ័យ។
លោកស្រី ក៏បានជម្រាបជូនសម្ដេចតេជោ ហ៊ុន សែន អំពីមេត្រីភាពរវាងអូស្ត្រាលី អង់គ្លេស និងសហរដ្ឋអាមេរិក។សម្ដេចតេជោ ហ៊ុន សែន បានឯកភាពចំពោះការវាយតម្លៃរបស់លោកស្រីរដ្ឋមន្ត្រីការបរទេសអូស្ត្រាលី អំពីទំនាក់ទំនងរវាងអូស្ត្រាលី និងកម្ពុជា ទាំងទ្វេរភាគី និងពហុភាគី។
សម្ដេចតេជោ ហ៊ុនសែន ក៏បានមានប្រសាសន៍ថា អូស្ត្រាលី បានជួយកម្ពុជាច្រើន ជាពិសេសលើវិស័យកសិកម្ម ក្នុងការបង្កើតវិទ្យាស្ថានស្រាវជ្រាវ និងបង្កាត់ពូជស្រូវ រួមទាំងវិស័យយោធា និងវិស័យអប់រំ តាមរយៈការបង្កើតសាលាភាសានៅកម្ពុជា ហើយបើកឲ្យសិស្សកម្ពុជាទៅរៀននៅអូស្ត្រាលី។ ចំពោះវិស័យសុខាភិបាលវិញ គឺអូស្ត្រាលី ក៏បានជួយផ្ដល់វ៉ាក់សាំងដល់កម្ពុជា។ សម្ដេចតេជោ ហ៊ុន សែន ក៏បានថ្លែងអំណរគុណដល់អូស្ត្រាលី ដែលបានផ្ដល់វ៉ាក់សាំងជួយកម្ពុជា។
នៅក្នុងក្របខ័ណ្ឌអាស៊ាន សម្ដេចតេជោ ហ៊ុន សែន បានមានប្រសាសន៍ថា សម្ដេចសង្ឃឹមថា អូស្ត្រាលី នឹងចូលរួមជាមួយបណ្ដាប្រទេសអាស៊ាន ដើម្បីប្រយុទ្ធប្រឆាំងជំងឺកូវីដ១៩ ក្នុងការឆ្ពោះទៅកាន់ការតភ្ជាប់អាស៊ានវិញ បន្ទាប់ពីមានការកាត់ផ្ដាច់ដោយជំងឺកូវីដ១៩។
គួរបញ្ជាក់ថា ដំណើរទស្សកិច្ចផ្លូវការមកបណ្តាប្រទេសក្នុងអាស៊ានរបស់ប្រមុខការទូតអូស្ត្រាលីនេះ ធ្វើឡើងនៅប្រទេសចំនួន៤រួមមាន ម៉ាឡេស៊ី កម្ពុជា វៀតណាម និងឥណ្ឌូនេស៊ី។ មុនមកដល់កម្ពុជា លោកស្រីម៉ារីស ផេន បានធ្វើទស្សនកិច្ចនៅប្រទេសម៉ាឡេស៊ី ដោយបានជួបពិភាក្សាជាមួយរដ្ឋមន្ត្រីការបរទេសម៉ាឡេស៊ី លោកសៃហ្វូតឌីន អាប់ដុលឡា អំពីភាពជាដៃគូយុទ្ធសាស្ត្រគ្រប់ជ្រុងជ្រោយ និងការគាំទ្រការស្តារឡើងវិញក្រោយវិបត្តិកូវីដ១៩៕
