ប្រទេសថៃ÷ យ៉ាងហោចណាស់មានមនុស្សម្នាក់ត្រូវបានរងរបួស និងព្រមទាំងឆេះ រថយន្តចំនួន៤គ្រឿង ខណៈដែលមានការផ្ទុះធុងហ្គាស់ជាច្រើនធុងនៅកណ្តាលទ្រូងផ្លូវ ដោយសារតែការធ្វេសប្រហែសរបស់អ្នកដឹកធុងហ្គាសដើម្បីដើរចែកចាយ ។ ហេតុការណ៍នេះបានកើតឡើងកាលពីវេលាម៉ោង ១០ និង០០នាទី ថ្ងៃទី៣០ ខែសីហា ឆ្នាំ២០១៦ នៅលើកំណាត់ផ្លូវ ថៃរ៉ាត ខាងមុខច្រកចូលផ្សារ វង់សៈកន នាទីក្រុងបាងកក ប្រទេសថៃ ជិតសាលារៀនអន្តរជាតិឃូខុត ។
តាមរបាយការណ៍ពីទីនោះបានអោយដឹងថា នៅមុនពេលកើតហេតុ គឺមានរថយន្ត កូរេ ប្រភេទកង់៦ មួយគ្រឿងបានដឹកធុងហ្គាសពេញដើម្បីដើរចែកចាយតាមអាហារដ្ឋាននិងភោជនីយដ្ឋាន ។ ដោយសារតែល្បឿនលឿនផង ហើយផ្លូវមានលក្ខណៈកោងផង ធ្វើអោយរថយន្តនោះក្រឡាប់នៅកណ្តាលផ្លូវតែម្តង ដោយបានធ្វើអោយធុងហ្គាសទាំងអស់ដែលនៅលើរថយន្ត បានធ្លាក់រមៀលពេញផ្លូវ ចៃដន្យគឺមានរថយន្តមកពីក្រោយបានបុកទៅលើធុងហ្គាស់នោះ ធ្វើអោយផ្ទុះតែម្តង ព្រមទាំងមានអណ្តាតភ្លើងឆាបឆេះឡើង យ៉ាងសន្ធោសន្ធៅ ដោយបានឆាបឆេះទៅលើរថយន្តដទៃទៀតអស់ចំនួន៤គ្រឿង ហើយក៏បានបង្កអោយមានមនុស្សម្នាក់រងរបួសផងដែរ ដែលជាអ្នកបើករថយន្តដឹកហ្គាស់ នោះតែម្តង ។
នៅវេលាម៉ោងប្រមាណជា១១ នាថ្ងៃដដែល ទើបគេសង្គេតឃើញមានក្រុមពន្លត់អគ្គីភ័យបាន ចុះទៅដល់ ដោយបានទប់ស្កាត់មិនអោយភ្លើងនេះរាលដាលទៅកន្លែងផ្សេងទៀត គឺបានទប់ស្កាត់រលត់ទាំងស្រុង បន្ទាប់ពីមានការកកស្ទះចរាចរណ៍អស់រយៈពេលមួយម៉ោងពេញ ៕
