ប្រទេសថៃ៖ ប្រទេសថៃស្វាគមន៍រាជរដ្ឋាភិបាលកម្ពុជា ក្នុងការផ្តល់វ៉ាក់សាំងបង្ការជំងឺកូវីដ១៩ ដើម្បីចាក់ជូនប្រជាពលរដ្ឋខ្មែរកំពុងរស់នៅ និងធ្វើការនៅប្រទេសថៃ។ តែសម្រាប់ការចាក់ គឺត្រូវអនុវត្តដោយមន្ត្រីសុខាភិបាលថៃ។
ការអះអាងត្រូវបានធ្វើឡើងដោយលោកឧបនាយករដ្ឋមន្ត្រីនៃរាជរដ្ឋាភិបាលថៃ លោក វិស្នុ គ្រឿងង៉ាម ក្នុងពេលជួបពិភាក្សាការងារជាមួយលោក សុខ សុក្រឹត្យា ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជារដ្ឋលេខាធិការក្រសួងទេសចរណ៍នៅទីក្រុងបាងកក ប្រទេសថៃ នាពេលថ្មីៗនេះ។សម្រាប់លោក សុខ សុក្រឹត្យា បានថ្លែងថា ក្នុងជំនួបនោះលោកក៏បានលើកពីបំណងរបស់សម្តេចតេជោ ហ៊ុន សែន រកកិច្ចសហប្រតិបត្តិការ ដើម្បីបានផ្តល់ជាវ៉ាក់សាំងចាក់ជូនប្រជាពលរដ្ឋនៅក្នុងប្រទេសថៃផងដែរ។
ឆ្លើយតបសំណើស្តីពីកិច្ចសហប្រតិបត្តិការដើម្បីផ្តល់វ៉ាក់សាំងជូនពលរដ្ឋខ្មែរនេះ លោកឧបនាយករដ្ឋមន្ត្រីថៃក៏បានបញ្ជាក់ថា រដ្ឋាភិបាលថៃ បានជជែក ហើយក៏បានសម្រេចដែរថា កម្ពុជា អាចផ្តល់វ៉ាក់សាំងសម្រាប់ចាក់ជូនពលរដ្ឋរស់នៅ និងធ្វើការក្នុងប្រទេសថៃបាន។ ប៉ុន្តែមិនអាចទៅចាក់ដោយខ្លួនឯងបានឡើយ ពោលគឺកម្ពុជា អាចផ្តល់វ៉ាក់សាំង ហើយមន្ត្រីសុខាភិបាលថៃជាអ្នកចាក់ជូន។
ទោះជាយ៉ាងណាមន្ត្រីកម្ពុជា អាចចូលរួមសង្កេតការណ៍លើការងារចាក់នេះបាន។ លោកបានគូសបញ្ជាក់ថា ពេលនេះមន្ត្រីក្រសួងការបរទេសនៃប្រទេសទាំងពីរ កំពុងជជែកគ្នាលើការងារនេះ ដើម្បីរកយន្តការកិច្ចសហប្រតិបត្តិការឈានទៅការផ្តល់វ៉ាក់សាំងជូនពលរដ្ឋខ្មែរនៅថៃ។បច្ចុប្បន្នមានពលរដ្ឋខ្មែរប្រមាណជា ១លាននាក់កំពុងធ្វើរស់នៅ និងធ្វើការក្នុងប្រទេសថៃ ហើយរដ្ឋាភិបាលថៃ បានចាក់ជូនពលរដ្ឋខ្មែរបានប្រមាណ ២សែនដូសហើយ.។
សូមបញ្ជាក់ដែរថានៅថ្ងៃទី០៤ ខែវិច្ឆិកា ឆ្នាំ២០២១នេះ ស្ថានទូតថៃ បានប្រកាសថា ប្រទេសថៃ បានដាក់បញ្ចូលកម្ពុជា ទៅក្នុងបញ្ជីឈ្មោះនៃក្រុមប្រទេសចំនួន៦៣ ដែលប្រជាជនចាក់វ៉ាក់សាំងពេញលេញរួចរាល់ចំនួន២ដូសឡេីងទៅ អាចធ្វើដំណើរចូលទៅកាន់ប្រទេសថៃបាន តាមផ្លូវអាកាស ហើយត្រូវបានលើកលែងពីការធ្វើចត្តាឡាស័ក គិតចាប់ពីថ្ងៃទី០១ ខែវិច្ឆិកា ឆ្នាំ២០២១តទៅ។
តាមរយះការប្រកាសស្ថានទូតថៃ បានបញ្ជាក់ថា អ្នកមានបំណងចូលទៅប្រទេសថៃ ត្រូវដាក់ពាក្យស្នើសុំការអនុញ្ញាតចូលប្រទេសថៃ ដែលហៅថា «Thailand Pass» ដែលនេះជាទម្រង់ថ្មី ជំនួសទម្រង់ចាស់ ដែលគេហៅថា Certificate of Entry (COE) សម្រាប់អ្នកដំណើរតាមផ្លូវអាកាស។ សម្រាប់ ប្រជាពលករកម្ពុជាដែលមានបំណងធ្វេីដំណេីរទៅប្រទេសថៃគួរដាក់ពាក្យសុំ Thailand Pass តាមប្រព័ន្ធអនឡាញឱ្យបានមុន ព្រោះដោយសារមានអ្នកដាក់ពាក្យច្រេីនមកពីជុំវិញពិភពលោកអាចត្រូវការពេលយូរ។
តាមរយៈពាក្យស្នើសុំទម្រង់ថ្មីនេះ គឺមានជម្រើស៣សម្រាប់អ្នកដំណើររួមមាន៖
ជម្រើសទី១៖ «Test and Go» គឺជាជម្រើសមិនចាំបាច់ធ្វើចត្តាស័ក ក្រោយធ្វើតេស្តអវិជ្ជមានពេលទៅដល់ប្រទេសថៃ។ ជម្រើសនេះប្រើសម្រាប់ទៅតំបន់ដែលអាជ្ញាធរថៃបានបើក និងមិនមានហានិភ័យនៃការឆ្លងជំងឺកូវីដ១៩។
ជម្រើសទី២៖ «Sandbox Programme» គឺត្រូវស្ថិតនៅតំបន់ដែលកំណត់មួយរយៈ មុនអាចធ្វើដំណើរដោយសេរី។ ជម្រើសនេះ សម្រាប់ការធ្វើដំណើរទៅតំបន់ ដែលអាជ្ញាធរថៃមិនទាន់បើកទូលាយ ឬនៅមានភាពប្រឈមនៃការឆ្លងរាលដាលជំងឺកូវីដ១៩។
ជម្រើសទី៣៖ «Alternative Quarantine» គឺត្រូវធ្វើចត្តាឡីស័កធម្មតា។ ជម្រើសនេះ គឺសម្រាប់បុគ្គលដែលមិនទាន់បានចាក់វ៉ាក់សាំងបង្ការជំងឺកូវីដ១៩៕
