ខេត្តកំពង់ឆ្នាំង: ព្រឹកថ្ងៃព្រហស្បតិ៍ ១៤រោច ខែអស្សុជ ឆ្នាំឆ្លូវ ត្រីស័ក ព.ស. ២៤៦៥ ត្រូវនឹងថ្ងៃទី៤ ខែវិច្ឆិកា ឆ្នាំ២០២១ ម្សិលមិញនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងគណៈប្រតិភូ បានអញ្ជើញចុះទស្សនកិច្ចសិក្សាពិនិត្យមើលការបែងចែកកញ្ចប់សម្ភារសិក្សានៅផ្ទះ និងការបើក ដំណើរការសាលារៀនឡើងវិញនៅសាលាបឋមសិក្សា ប៊ុន រ៉ានី ហ៊ុន សែន រមាស និងតាមបណ្តុំក្នុងទីរួមស្រុកទឹកផុស។
ក្នុងពិធីនោះ ឃើញមានការអញ្ជើញចូលរួមពីសំណាក់
១. លោកជំទាវ Carmen Mereno អគ្គរដ្ឋទូតសហភាពអឺរ៉ុបប្រចាំកម្ពុជា
២. លោកស្រី Foroogh Foyouzat ប្រធានអង្គការ UNICEF ប្រចាំកម្ពុជា
៣. លោក Magnus Saemundsson អគ្គលេខាទី១ ទីភ្នាក់ងារអភិវឌ្ឍអន្តរជាតិប្រទេសស៊ុយអែតប្រចាំកម្ពុជា
៤. លោកស្រី Caitlyn McElroy តំណាងទីភ្នាក់ងារអភិវឌ្ឍអន្តរជាតិសហរដ្ឋអាមេរិកប្រចាំកម្ពុជា
៥. ឯកឧត្តម ស្រ៊ន សំឬទ្ធី អភិបាលរងនៃគណៈអភិបាលខេត្តកំពង់ឆ្នាំង. ថ្នាក់ដឹកនាំមន្ទីរ អប់រំ យុវជន និងកីឡា ខេត្តកំពង់ឆ្នាំង អភិបាលនៃគណៈអភិបាលស្រុកទឹកផុស និងមន្ត្រីអប់រំក្នុងស្រុកទឹកផុស ជាច្រើននាក់ទៀត។
នៅក្នុងពិធីដ៏អធិកអធ័មនោះ ឯកឧត្តមបណ្ឌិតបានផ្ដាំផ្ញើឱ្យលោកគ្រូ-អ្នកគ្រូ និងសិស្សានុសិស្ស មានការប្រុងប្រយ័ត្នខ្ពស់ចំពោះជំងឺឆ្លងដ៏កាចសាហាវនានា ពិសេសជំងឺកូវីដ19 នៅពេលប្អូនៗ ក្មួយៗមកសិក្សារៀនសូត្រនៅសាលារៀន ក៏ដូចជាការប្រាស័យទាក់ទងនៅក្នុងសហគមន៍ដែលប្អូនៗ ក្មួយៗរស់នៅ។ក្នុងគ្រានោះដែរឯកឧត្តមបណ្ឌិតនិងប្រតិភូបានត្រួតពិនិត្យការបែងចែកកញ្ចប់សំភារៈសិក្សានៅផ្ទះ ចែកសម្ភារៈនិមិត្តរូបរូប ត្រួតពិនិត្យការបើកឲ្យដំណើរការសាលារៀនឡើងវិញទៅសាលាបឋមសិក្សាប៊ុនរ៉ានីហ៊ុនសែនរមាសនិងតាមបណ្ដុំ ក្នុងទីរួមស្រុកទឹកផុស ខេត្តកំពង់ឆ្នាំង៕
