ភ្នំពេញ ៖ ក្រសួងសុខាភិបាលនៅថ្ងៃទី០៣ ខែវិច្ឆិកា ឆ្នាំ២០២១ បានអនុញ្ញាតឱ្យប្រើប្រាស់ឱសថព្យាបាលជំងឺកូវីដ-១៩ ១ប្រភេទទៀត ឈ្មោះ Molnupiravir ក្នុងលក្ខខណ្ឌបន្ទាន់ លេខ CAM 015 EUA-2021។ នេះបើយោងតាម វិញ្ញាបនបត្រអនុញ្ញាតប្រើប្រាស់ ក្នុងលក្ខខណ្ឌបន្ទាន់ ដែលចុះហត្ថលេខាដោយ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ។ ឱសថនេះផលិតនៅប្រទេសឥណ្ឌា ជាប្រភេទឱសថគ្រាប់ប្រើតាមមាត់ ប្រឆាំងនឹងមេរោគកូវីដ-១៩ ដែលមានសុវត្ថិភាព និងប្រសិទ្ធភាពខ្ពស់សម្រាប់ព្យាបាលជំងឺកូវីដ-១៩។នាយកដ្ឋានឱសថកម្ពនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង នឹងដឹកនាំអង្គភាពពាក់ព័ន្ធដទៃទៀត ដើម្បីអនុវត្តផែនការគ្រប់គ្រងហានិភ័យ ដោយផ្អើកលើ Risk Management Plan (RMP) ដែលផ្ដល់ដោយក្រុមហ៊ុន ឬអាចរកបានពីអង្គការសុខភាពពិភពលោក។
លោក ម៉ម ប៊ុនហេង បានបន្តថា មណ្ឌលព័ត៌មានឱសថកម្ពុជានៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង និងអង្គភាពពាក់ព័ន្ធដទៃទៀត ត្រូវរាយការណ៍អំពីប្រតិកម្មរំខាន និងតាមដានការប្រើប្រាស់ រួមទាំងកំណត់ត្រាលេខឡូតិ៍ដែលបានចែកចាយទៅទីកន្លែងព្យាបាល និងដែលផ្ដល់ជូនអ្នកជំងឺ។
ឱសថសម្រាប់ព្យាបាលត្រូវសហការជាមួយអង្គភាពដទៃទៀត ដើម្បីបង្កើនសមត្ថភាពគ្រប់គ្រងគ្លីនិកក្នុងការឆ្លើយតបបន្ទាន់ និងទាន់ពេលវេលាចំពោះប្រតិកម្មរំខាន បន្ទាប់ពីពីប្រើប្រាស់ឱសថនេះ។