ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហាញការរំជួលចិត្តចំពោះកុមារាម្នាក់ដែលព្យួរកាតចាក់វ៉ាក់សាំងកូវីដ១៩ ច្រកក្នុងថង់កៅស៊ូតម្រង់ជួរចូលរៀនវិញ។
តាមរយៈហ្វេសបុកផ្លូវការ សម្តេចតេជោ ហ៊ុន សែន នាព្រឹកថ្ងៃទី២ ខែវិច្ឆិកា ឆ្នាំ២០២១នេះ បានសរសេរថា “ទោះជារូបភាពមួយសន្លឹកនេះ ខ្ញុំមិនដឹងថា នៅទីណា? និងចៅតូចនេះឈ្មោះអី អាយុប៉ុន្មាន? តែខ្ញុំពិតជាមានមោទនភាពចំពោះចៅៗដែលចង់រៀនសូត្រ។”
សម្តេចតេជោ ហ៊ុន សែន បានបន្ថែមថា “ប័ណ្ណចាក់វ៉ាក់សាំងពាក់នៅក បង្ហាញថា ខ្ញុំបានចាក់ វ៉ាក់សាំងរួចហើយ និងចូលរៀនដោយគ្មានការភ័យខ្លាច ជាមួយនឹងការពាក់ម៉ាស់បានត្រឹមត្រូវ។ ទោះចៅ មិនមានស្បែកជើងពាក់ តែតាជឿថា ចៅច្បាស់ជាលាងដៃ និងរក្សាអនាម័យបានល្អ។” សូមជម្រាប់ថាបន្ទាប់ពីបានឃើញរូបភាពនេះសម្តេចតេជោបានផ្ញើសារជាសម្លេងឲ្យអាជ្ញាធរនិងនាយកសាលាអនុញ្ញាតិកុមារប្រើកាតហ្វូតូកូពីមកបង្ហាញបានដើម្បីធានាថាបណ្ណដើមមិនបាត់ឬខូចខាត។សម្រាប់កុមារខាងលើនេះបន្ទាប់ពីមានសំណេររបស់នាយករដ្ឋមន្ត្រីគេឃើញមានសប្បុរសជនខ្លះចេញមុខជួយឧបត្ថម្ភផងដែរក្នុងនោះឧកញ៉ាឡេងណាវ៉ាត្រាអតីកម្មករមកពីកូរ៉េប្រកាសជួយ២០លានរៀលភ្លាមៗផងដែរដល់គ្រួសារ។
សូមជម្រាបថា អត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី០១ ខែវិច្ឆិកា ឆ្នាំ២០២១ មាន ១០០,០៥% ធៀបជាមួយចំនួនប្រជាជនគោលដៅ ១០លាននាក់ និងលើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៩៧,៩៣% ធៀបជាមួយចំនួនប្រជាជនគោលដៅ ជាង ១លាន៨សែននាក់ និងលើកុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០១,៤៦% ធៀបជាមួយនឹងប្រជាជនគោលដៅ ជិត១លាន ៩សែននាក់៕
