ខេត្តសៀមរាប ៖ មន្ត្រីប៉េអឹមខេត្តសៀមរាប ម្នាក់បាញ់ ១គ្រាប់ គម្រាមប៉ូលីសអន្តរាគមន៍បណ្តាលឲ្យរងរបួសស្រាលនៅវេលាម៉ោង២៣ និង០៥នាទី ថ្ងៃទី១ ខែវិច្ឆិកា ឆ្នាំ២០២១ នៅចំណុចទីតាំងការ៉ាស់សាំង សូរិយា ស្ថិតនៅក្នុងភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប។
ជនបង្កជាមន្ត្រីអាវុធហត្ថឈ្មោះ អាង សែន នាយការិយាល័យប្រឆាំងការជួញដូរមនុស្ស កងរាជអាវុធហត្ថខេត្តសៀមរាប។ប្រភពពីសមត្តកិច្ចបានឲ្យដឹងថាមុនពេលកើតហេតុ នៅទីតាំងការ៉ាស់សាំង ស្ថិតនៅភូមិតាវៀន ដែលមានម្ចាស់ឈ្មោះយ៉ា ភេទស្រី អាយុប្រហែល៤០ឆ្នាំ ដោយឈ្មោះ អាំង សែន (ហៅ ចិត្រ) ជាប៉េអឹម បានទៅផឹកស៊ីនៅទីតាំងខាងលើ ដោយក្នុងនោះក៏មានមនុស្សប្រុសម្នាក់ទៀតឈ្មោះ ហាត សុភា ភេទប្រុស អាយុ៣៧ឆ្នាំ មុខរបរអាជីករ ទីលំនៅភូមិឃុនមោគ ឃុំកណ្តែក ស្រុកប្រាសាទបាគង ខេត្តសៀមរាប។
បន្ទាប់មកក៏កើតមានទំនាស់ពាក្យសម្តីគ្នា ហើយឈ្មោះ ហាត សុភា ក៏បានទូរសព្ទ័ហៅសមត្ថកិច្ច អោយជួយអន្តរាគមន៍។ពេលសមត្ថកិច្ចទៅដល់ហើយកំពុងសាកសួរបានបន្តិច ប៉េអឹមឈ្មោះ អាំង សែន បានបាញ់ទាំងកំរោលលើសាបមុខផ្ទះតែម្ដង បណ្តាលអោយខ្ទាតបំណែកថ្មត្រូវឈ្មោះ ហាត សុភា រលាត់ក្រោមត្របកភ្នែកខាងស្តាំ បណ្តាលអោយរបួសស្រាល។
ក្រោយពេលកើតហេតុ កម្លាំងជំនាញនៃកងរាជអាវុធហត្ថខេត្តសៀមរាប បានចុះទៅដល់កន្លែងកើតហេតុ ដោយបាននាំខ្លួនលោក អាង សែន និងវត្ថុតាងយកមកទីបញ្ជាការដើម្បីធ្វើការសាកសួរអនុវត្តតាមនីតិវិធី។ករណីនេះ ជនរងគ្រោះបានដាក់ពាក្យបណ្ដឹងនៅការិយាល័យនគរបាលព្រហ្មទណ្ឌខេត្តសៀមរាបឲ្យជួយរកយុត្តិធម៍ហើយ ៕
