ភ្នំពេញ៖ លោក រដ្ឋមន្ត្រី វេង សាខុន និងលោក Pablo Chiho Kang ឯកអគ្គរដ្ឋទូតអូស្ត្រាលីប្រចាំព្រះរា ជាណាចក្រកម្ពុជា បានជួបពិភាក្សាការងារ និង ពិគ្រោះយោបល់លើកម្មវិធីអភិវឌ្ឍន៍សេដ្ឋកិច្ច ដែលនឹងរួមបញ្ចូលផងដែរអំពីនិរន្តរភាព នៃវិស័យកសិកម្ម។
ជំនួប នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាថ្ងៃទី២៨ ខែតុលា ឆ្នាំ២០២១,លោកឯកអគ្គរាជទូតអូស្ដ្រាលីបានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការយ៉ាងល្អប្រសើររបស់លោកមរដ្ឋមន្ត្រី ថ្នាក់ដឹកនាំក្រសួង អគ្គនាយកដ្ឋាន និងមន្ត្រីជំនាញគ្រប់ជាន់ថ្នាក់ធ្វើឲ្យការអនុវត្តគម្រោង ឬកម្មវិធីដែលជាជំនួយឧបត្ថម្ភរបស់រដ្ឋាភិបាលអូស្ត្រាលីសម្រេចទទួលបានលទ្ធផលជាផ្លែផ្កាដូចការគ្រោងទុក ហើយសមទ្ធិផលនេះបាននិងកំពុងចូលរួមចំណែកអភិវឌ្ឍសេដ្ឋកិច្ច និងសង្គមកម្ពុជានាពេលបច្ចុប្បន្ន។
លោកទូតបានថ្លែងថា ជាក់ស្តែង កម្មវិធី CAVAC បានរួមចំណែកជំរុញផលិតកម្មស្បៀងតាមរយ:ការលើកកម្ពស់គុណភាពគ្រាប់ពូជដំណាំ ការធ្វើពិពិធកម្មកសិកម្ម ការកែលម្អខ្សែច្រវាក់តម្លៃ ការផ្តល់ធាតុចូលកសិកម្ម ទីផ្សារកសិផល និងការកែលម្អប្រព័ន្ធស្រោចស្រព ជំងឺដំឡូងមី សត្វល្អិតចង្រៃ ក្នុងគោលបំណងបង្កើនផលិតភាព និងប្រាក់ចំណូល របស់គ្រួសារកសិករខ្នាតតូច និងពាណិជ្ជកម្មស្រូវ-អង្ករ បន្លែ ចិញ្ចឹមសត្វ និងដំណាំផ្សេងៗទៀត។
ឯកអគ្គរដ្ឋទូតបានបញ្ជាក់ជូនថារដ្ឋាភិបាលអូស្ត្រាលីនឹងនៅតែជាដៃគូយ៉ាងជិតស្និទ្ធជាមួយរាជរដ្ឋាភិបាលកម្ពុជាក្នុងការអភិវឌ្ឍន៍ប្រទេស និងជាពិសេសការលើកកម្ពស់ផលិតកម្មស្បៀងស្របពេលដែលកម្ពុជា ក៏ដូចពិភពលោកកំពុងប្រឈម និងក្រោយពេលបញ្ហាកូវីដ-១៩ ត្រូវបានបញ្ចប់។
លោក រដ្ឋមន្ត្រី វេង សាខុនបានថ្លែងអំណរគុណយ៉ាងជ្រាលជ្រៅជូនចំពោះប្រជាជន និងរដ្ឋាភិបាលអូស្ត្រាលី ដែលបានចូលរួមចំណែកយ៉ាងសកម្មក្នុងការស្តារ កសាង និងអភិវឌ្ឍប្រទេសកម្ពុជា ក្នុងនោះក៏មានវិស័យកសិកម្ម តាមរយ:គម្រោងកម្មវិធីអភិវឌ្ឍ ការស្រាវ ជ្រាវ និងការបណ្តុះបណ្តាលធនធានមនុស្ស ដែលបានចូលរួមចំណែកយ៉ាងសំខាន់ក្នុងការអភិវឌ្ឍវិស័យមួយនេះឲ្យមានការរីកចម្រើនជាបន្តបន្ទាប់ពីប្រទេសអសន្តិសុខស្បៀង មកជាប្រទេសផលិតស្បៀងបានគ្រប់គ្រាន់ និងឈានទៅជាប្រទេសនាំចេញកសិផលទៅកាន់ទីផ្សារអន្តរជាតិ ៕
